«ВЫЛЬ ПӦВ НУӦДНЫ СЬӦЛӦМ ПЫРЫД»

Овлӧны сэтшӧм здукъяс, кодъясӧс окота лолӧ выль пӧв нуӧдны сьӧлӧм пырыд либӧ жӧ казьтыштны гажа серамӧн, а колӧкӧ, и ымзӧм-бӧрдӧмӧн. Ме тай ӧні на, уна во кольӧм бӧрын, кор кыла водз асывнас кӧрт туй вокзал дорысь поезд увӧдчӧмсӧ да кӧлеса татшӧдӧмсӧ, тшӧкыда казьтыла томдырӧс: быттьӧ муна поездӧн, а орччӧн гажаа шыннялӧны-варовитӧны верӧслӧн ёртъясыс — поёлса Скрипов Вась да пожӧгса Шахов Борис, Гриша Шешуков, Костя Лиханов — да шмонитӧны ме вылын.

Борис медся варов. Сійӧ менам верӧскӧд куим во чӧж ӧти жырйын оліс общежитиеас Ухтаса горно-нефтянӧй техникумын велӧдчигӧн.

— Тэ, кебур-шабур, Куратов ёртӧ, медся на сюсь вӧлӧмыд, со кыкӧн гозйӧн мунанныд, а ми зонъяскӧд — ӧтка пӧткаяс, — шуӧ Борис.

— Аддзӧма, мый вӧсна шогсьыны, — шенасьӧ Скрипов Вась. — Тэнад варовлунӧн и немка-нывкаӧс на сэтӧн крукыштан. Шуӧны, немеч нывъясыс пӧ коми нывъяс кодь жӧ зэв мичаӧсь да варовӧсь.

Сійӧ здукас миян дорӧ пырӧ министерствоса ёртным, стрӧгакодь шуасьӧ:

— У, варовмӧмныд. Регыд кутам граница вуджны, разӧдчӧй асланыд вагонъясӧ.

— Да, да, — шуӧ Борис. — Ми Ниночкаӧс гажӧдны пырыштлім. Коми сьылан сьылыштім. Сэсся ӧд сэтчаньын комисӧ оз кут кывны.

— Вернӧ шуан. Но ӧдйӧ велалад немецкӧйӧн сёрнитны. Аддза, ті зонъясыс зэв славнӧйӧсь, Нина вӧсна тӧждысянныд.

Та бӧрын ми здук кежлӧ нӧшта аддзысьлім Зигмарын, Карл-Маркс-Штадтса микрорайонын, кӧні вӧлі миян «Висмут» акционер обществолӧн контораыс, и сэсся ставӧн муналім разнӧй каръясӧ. Скрипов Васькакӧд сӧмын ӧти пӧраӧ олім ӧти карын, орчча патераясын.

Регыд миянлы кывсис, Шахов Борис пӧ ёна доймӧма да ыстӧмаӧсь бӧр гортӧ, Союзӧ. Аддзысим Борискӧд сӧмын 1956 воын Ухта кӧрт туй станцияын. Воӧма миянӧс вочаавны «Победа» машинаӧн. Сэки сійӧ вӧлі Ухта районса комсомоллӧн секретар. «У, иностранечьяс, — шуӧ. — Добро пожаловать гортӧ!»

Сэки ми эгӧ кольччӧй Ухтаӧ, а мунім Интаӧ дас витӧд шахта-миллионерка стрӧитны и олім сэні 1960 воӧдз. Но кор локтім Сыктывкарӧ, верӧсӧс Совнархозӧ вуджӧдлісны уджавны да, кык друг бара на тшӧкыда пондісны аддзысьлыны, варовитны, гажӧдчыны да ӧтувъя государственнӧй уджъяс нуӧдны. То Борис Шахов локтӧ Ухтасянь командировкаӧ, то верӧсӧй мунӧ Ухтаӧ удж кузяыс. А нӧшта ме гижысь Котырад куті уджавны, да аддзысьлім Борискӧд тшӧкыда, ӧд вокыс — Шахов Петырыс — сэки «Войвыв кодзув» журналын уджаліс главнӧй редакторӧн. Вокыс дорӧ быть нин пыралас Борисыд Сыктывкарӧ волігас. А сэсся и ачыс босьтчис гижны. Гижан-йӧзӧданторйыд сылӧн ӧд тырмымӧн вӧлі, уна йӧзкӧд волысис да...