* * *

Пемыд ӧшинь сайын лӧвтӧ
Дурмӧм турӧб коймӧд лун,
Татшӧм бушков дырйи, дерт жӧ,
Исласьнытӧ он тай мун.

Паччӧр вылын нускӧ пӧчӧ,
Керка пытшкын шыч ни рач,
Гашкӧ, вӧрын ручӧ-чойӧ,
Дзик ме моз жӧ ломтӧ пач?

Пачын пескыс ӧзйис, трачкӧ.
Полыштакодь, гажтӧм мем.
Кильчӧ ӧдзӧс ворсӧ, шлачкӧ —
Быттьӧ кодкӧ сэні эм.

Гашкӧ, тайӧ гегдӧм кӧчиль
Шоныдінад вӧзйысьӧ?
Гашкӧ, кӧин локтіс вӧрысь,
Сёйны менӧ дасьтысьӧ?!

Ог, ог пов ме, кӧин, тэысь,
Эн и вӧзйысь, он на пыр!
Кильчӧ иган батьлӧн миян
Бура видзӧ олан жыр!

Ыджыд пес чурка вот босьта,
Пета да и кильчӧ восьта,
Гегдӧм кӧчиль кӧ сэн — лэдза,
А горш кӧиныс — мед пезьдас.