НӦДКЫВЪЯС* * *Шонді петалӧ кӧть оз, Пыр дзик пемыд миян поз. Но ми ог и ёна шогсьӧй, Дзескыд вольпасьын ог ноксьӧй. Тӧдам: ӧдзӧс кодкӧ восьтас, Небыд кекӧньясас босьтас.(Анькытш пуртӧс.)* * *Кынӧм гӧгрӧс, польдӧма, Вокӧй гӧрдӧдз банйӧма, Менам вӧсни кыш, Чӧскыд водз и мыш.(Помидор.)* * *Муртса босьта сійӧс киӧ, Мися, уджалыштам миӧ, Пондас котравны дзик пыр, Мича серпас лоас тыр.(Карандаш.)* * *Ок-ок-ок! Ёкмарьёк! Кутшӧм тэрыб сылӧн кок! Муртса вӧлі коз пу улын, Со нин тӧвзьӧ ылын-ылын!(Кӧч.)* * *Дугдывтӧг котӧрта-котӧрта водзӧ, Варова висьтала помасьтӧм мойд, Кияс и кекӧньяс босьтлӧны соддзас, Век жӧ, оз чин менам ни ӧти войт.(Шор.)* * *Ворсӧ мекӧд пыр, Войнас кыйӧ шыр, Сылӧн лэчыд гыж, Пушыд бӧж и мыш.(Кань.)* * *— Мм-ме! Ме-е! Ме-е! — баксӧ меж. А коді гӧрдлӧ: — Чожа кеж! И-го-го пӧ, сӧв ме вылӧ! Вартӧдам ми тэкӧд ылӧ!(Вӧв.)* * *Котсӧ курӧг: — Ко-ко-ко! Регыд вая ме тэд кольк! Нявзӧ кань, а кравзӧ рака. Коді восьлалӧ зэв тшапа? Нюрсьыд пӧ ме ог и пов, Ӧкта сэтысь туримоль.(Тури.)* * *Видз вылысь муртса лысваыс косьмас, Дзоридзьяс пӧвстас сійӧ нин ноксьӧ. Мый сійӧ корсьӧ, жужгӧ лунтыр? Тӧдан он, Машук, ичӧтик ныв?(Мазі.)* * *Тулыснас козьнала ме коляоз, Тшӧкыда ме пытшкӧ ур вӧчлӧ поз, Висьтав вай, коді ме? Тӧдан-ӧ, он, Выль восӧ метӧг пасйывлан он?(Коз.)* * *Кокӧй менам вӧсни, еджыд, Юрӧй веж да пашкыр, ыджыд! Тӧвнас пасьтӧг ола, Тулыс-гожӧм платтьӧ новла. Арнас платтьӧ зарни овлӧ, Сӧмын шыбитны тай ковлӧ.(Кыдз пу.)* * *Воклы горза: — Кут! Кут! Кут! Кодкӧ нерӧ: — Ут! Ут! Ут! — Ме ог увтчы, абу пон! Сійӧ воча: — Весась вон! Мый тэ татчӧ эськӧ шуан, Вокӧ, код нӧ тадзсӧ дурӧ?(Йӧлӧга.)* * *Катшыс чомсьыс мыччис нырсӧ, Аддзис тӧлысьыслысь джынсӧ, Пондіс омлявны да увтны, Код пӧ удитӧма юкны?! Кодкӧ лун на вӧлі быдса, Талун кӧлӧб джынйыс муртса!(Тӧлысь.)* * *Муртса вӧлі понӧль улын, Со и чеччалӧ нин ылын, Ок и тэрыб сылӧн кок! Ок и туйыс сылӧн нок! Тӧвнас лым кодь еджыд гӧна, Гожӧмнас пӧ рудов рӧма, Бӧжыс дженьыд, пельыс кузь. Гашкӧ, челядь, тайӧ сюзь?(Кӧч.)
