ТӦВСЯ РЫТ

Паччӧр вылын ружтӧ пӧльӧ,
Пӧсялӧма брӧд,
Ӧшинь сайын лӧвтӧ турӧб,
Сайкалӧм оз тӧд.

Мам и чой-вок вольпасьынӧсь,
Вӧталӧны вӧт,
Сӧмын Толя лыддьысьӧмысь
Некыдзи оз пӧт.

Паськыд саридз шӧрын дітор,
Кащей пӧльлӧн горт,
Пемыд гуын ойзӧ-лӧвтӧ
Чепӧн дорӧм морт.

Багатырӧс, удал зонмӧс,
Корсьӧ мича ныв,
Кащей пӧльлы, мустӧм пӧльлы,
Корсьӧ ёран кыв.

Сьӧлӧм лыддьысьысьлӧн тіпкӧ,
Мый нӧ водзӧ, мый?
Кодкӧ мелі синсӧ тупкӧ,
Он тай сійӧс кый.

Ӧшинь сайын век на турӧб,
Сьылӧ сьыланкыв,
Пызан саяс нускӧ Толя,
Нинӧм дзик оз кыв.

Со и очсалӧ нин батьыс,
Пилы шуӧ — вод!
Сэтшӧм уна лыддьысьӧмсьыд
Юрыд мед оз пот.