ГОЖСЯ ЗЭР

Рытыввывсянь пемыд кымӧр,
Муткырасиг, кыптіс,
Тӧдысь пӧчӧ, шонді мамӧ,
Кымӧр пӧвстас кывтіс.
Ывла вылыс лои гу кодь,
Ставыс гӧгӧр лӧнис,
Гашкӧ, гортӧ колӧ косны,
Чорыда ӧд зэрмас?
Юр весьтын друг сявк да сявк!
Енэжкуыс потліс!
Илья пророк тайӧ, тшук,
Кымӧр пӧвстас йӧрмис.
Биа плетьнас шкув да шков,
Чибӧяссӧ кульӧ,
Енэж отсӧ чуж да чаж,
Косявлӧ да жулльӧ.
Бӧб моз сувті, баръялі жӧ,
Ок и кутшӧм страшнӧ!
Медбӧрын тай кобувтор кӧть
Удиті жӧ корсьны.
Сувтса зэр тай, шулывлӧны,
Ушатысь моз киссьӧ,
Кобув менам, сё мокасьтыд,
Ӧти здукӧн письтӧ.
А юр весьтын трук да трак,
Помасьлытӧг грымгӧ,
Повзьӧмла да кӧтасьӧмла,
Мышку ставнас сырмӧ.
Со нӧ никӧстӧм шы кыліс,
Полӧмӧй друг бырис,
Тайӧ Буско, миян пон,
Кобулӧ тшӧтш пырис.
Вай жӧ эновтам ми кобув,
Котӧртамӧ гортӧ,
Всё равно тай кыкнаннымӧ
Сулик кӧтасимӧ.
Кӧть и ставнас кӧтасимӧ,
Зэрнас зато мыссим,
Буско понкӧд кыкнаннымӧ
Ыджыдджыка быдмам.