СО И МИШУК ЗБЫЛЬ НИН ЫДЖЫД
Асывнас садьмис Мишук, но зэв дыш вӧлі чеччыны вольпассьыс.
— Мишук, чеччы, садикад сёрман! — чукӧстіс мамыс.
— Ог сёрмы, вӧскресенньӧ талун, — вочавидзис Миша да бара на юрсӧ сюйис эшкын улас. Батьыс вильшалыштіс Мишаӧс:
— Кикуруллю! Чеччы! Миша, Миша, чеччы! Бокыд пӧжсяс, вомыд шоммас, юрыд дурмас! Аддзан ывлаас лым усьӧма, тӧв пуксьӧма? Ми Алёшакӧд лызьӧн иславны нин мӧдім.
— И ме тшӧтш! — звирк чеччис Мишук вольпассьыс.
— Вай мыссьӧй да сёйӧй, сэсся петӧй да лунтыр кӧть исласьӧ да лыммачасьӧ, — шуӧ мамыс.
Мишуклы унаысь тшӧктӧм эз бара-й ков. Мыссьӧма нин, локтіс мамыс дорӧ кухняӧ.
— Мамӧ, аддзан, кутшӧм бандзибъяс гӧрдӧсь, кӧдзыд ваӧн мысси. Ӧні ме ывлаад ог кынмы! Вай ӧдйӧджык сёя да пета!
Зэв азыма Мишук гӧгыльтіс кык пуӧм кольк кынӧмас, кампета чай юис дай мӧдіс пасьтасьны.
— Мишук, — шуӧ мамыс, — тӧвся пальтотӧ нин талун пасьтав дай вурун кепысь. Шарфтӧ эн вунӧд и.
— Ог вунӧд, ог...
Таво Мишук ачыс нин кӧмасьӧ-пасьтасьӧ, оз виччысь мам-батьсянь отсӧг. Сӧмын тай тӧвся пальто сосъясыс гырддзаӧдзыс лоӧмны.
— Мый нӧ тайӧ? — Дзик бӧбмис Мишук пальтосӧ пасьталӧм бӧрын. Мамыс лапкерис кияснас:
— Аттӧ, Мишук, гожӧмбыдӧн кыдз быдмӧмыд! Выль кышӧд ковмас ньӧбны! Аски жӧ ветлам магазинӧ, «Малышокӧ». А талун, дитяӧй, пукав гортын.
— А папа да Лёшик мунасны?
— Мед мунӧны, исласьӧны. Тэ ӧд аски мунан жӧ. Выль пальтоӧн. Вай талун мамыдлы отсась. Ме кута гладитчыны, а тэ ваӧн пызйы, мед бурджыка гладитчас кӧлуйыс. Первой тэнсьыд и дӧрӧмтӧ гладитам. Сэсся Лёшиклысь, сэсся батьыдлысь, сэсся пӧдушка эжӧд, сэсся ӧшинь занавес. Со и миянлы лунтыр кежлӧ удж, некор лоӧ гажтӧмтчыны...
Рытнас, кор мамыс да батьыс гладитӧм тюль занавесъяссӧ пондісны ӧшлыны ӧшиняс, Мишук горӧдіс:
— Ой, мамӧ, видзӧдлы, ӧшиньыд быдмӧма! Ме моз тшӧтш быдмӧма! — Сэсся недыр чӧв оліс, мӧвпаліс да зэв збыльысь шуис:
— А ӧшиньыд ӧд абу ловъя. Сійӧ оз вермы быдмыны. Буракӧ, песлалӧм бӧрад тюлльыд пуксьӧма.
Батьыс серӧктіс. А мамыс зэв меліа шуис:
— Ӧні ме аддза, тэ и збыль быдмӧмыд да вежӧра лоӧмыд, миян муса пиукӧй. Регыд школаӧ мунан кад.
