ВОШИС ВИТЬКА

Витька — Мишуклӧн понпиыс. Болонка. Вайис сійӧс Мишуклы батьыс питшӧгас. На пӧ козин тэд.

Кепысь ыджда и эм понпиыс, а визув, бесыд! Сідзи и гӧглясьӧ еджыд пушистӧй комӧгӧн Мишук бӧрся, ӧдйӧ ӧта-мӧд дорас велалісны кык ичӧтыд, ӧтлаын олісны и узьлісны. Мишук крӧвать вылас, Витька крӧвать улын. Асывнас муртса лӧзӧдны пондас, Витька чеччӧма нин, катӧ Мишукӧс, чеччы пӧ, другӧ, а то садикад сёрман. Колльӧдас другсӧ садик ӧдзӧс дорӧдз, сэсся лунтыр гортас гажтӧмтчӧ, виччысьӧ Мишукӧс. А воас — лыбас налӧн ворсӧм да котралӧм. Гажа кыкнанныслы.

И со, вошис Витька. Петіс Алёша вокыскӧд ывлаӧ гуляйтны и эз лок. Ни рытнас, ни аскинас.

— И мыйла ме тшӧтш сыкӧд эг пет? Эськӧ эз и вош. Ӧбидитчис ме вылӧ дай пышйис.

— Воас на, гашкӧ, эн шогсьы, — такӧдӧ Мишукӧс мамыс. Горшыд, шуан, висьӧ, вай вод, ме тэныд мойдышта.

— Ог ме кӧсйы мойдтӧ, ме Витяӧс кӧсъя, — лимӧстіс Мишук.

— А ме Витя йывсьыд и висьтала. Сійӧ ворсіс-ворсіс ӧшинь улын дай ылаліс, вӧрӧ веськаліс...

— А вӧрас кӧинъяс? Сёйисны Витяӧс! — дзикӧдз бӧрддзис Мишук.

— Йӧюк тэ, — шуис сылы мамыс. — Тӧдан кутшӧм гораа миян Витяным увтчӧ? Увтны кутіс дай став кӧиныс повзисны, пышйисны ылӧ-ылӧ. А Витяным миян шуӧ: ӧні пӧ гортӧ мӧда, Мишук, пӧди, гажтӧмтчис, виччысьӧ.

— Да-а, зэв ёна виччыся, — вирснитіс нырнас Мишук.

— А ӧні узь, пиук, узь. Локтас Витяыд.

— А кор локтас? Аски?

— Ог тӧд. Гашкӧ аски, гашкӧ аскомысь. Ылӧ ӧд вӧрас мунӧма, дыр локнысӧ...

Локтіс Витя нёль лун бӧрын сӧмын, но мыйлакӧ эз тӧд Мишукӧс дай дзик абу ас кодьыс лоӧма.

— Витя, Витя! Тайӧ жӧ ме, Мишук! Вай бурась ме вылӧ да ворсыштам!

Мамыс видзӧдліс батьыс вылӧ да мыйлакӧ нюмдіс.