ТАДЗИ ЁРТАСЯМ

Женя йылысь да ме йылысь шуӧны: тайӧясӧс пӧ кӧдзыд ваӧн он вермы торйӧдны ӧта-мӧд дорсьыс. Буракӧ, сідзи и эм. Кӧть эськӧ, шуам, видзӧднысӧ ми дзик абу ӧткодьӧсь.

Женя — лӧсьыдик чолкаторйӧн шырӧм юра. А менам вот юрсиӧй ньӧти оз кывзысь: шыльӧда, а сійӧ бара и торгӧдчас-лыбас бубулялӧн моз.

А гашкӧ, чайтанныд, мый ме чужӧмӧс ог мыськыв? Быд асыв мысся. Майтӧгӧн на мукӧд дырйиыс. Чужӧм пасьта эсійӧ лясвидзысь вижов чутъясыс абу няйт — берин тусьяс. Мыссьы кӧть эн мыссьы, всё равно оз мынны. А мый вомӧй жервидзӧ, бара жӧ абу дивӧ. Ме пыр сэтшӧм серамбана. Тэнӧ пӧ быттьӧ пыр гильӧдӧны, унаӧн нин меным шулісны. А ме ӧмӧй мыжа, сэтшӧмӧн чужсьылӧма да?

Юрсиӧй кӧть кывзысьтӧм, ачым ме быттьӧкӧ шань зонка. Мамаӧс и папаӧс, и учительницаӧс школаын кывза. И бабӧӧс тшӧтш. Но та йылысь, бурджык, гусьӧникӧн висьтала, а то кывлас бабӧ, пӧръячкаӧн шуас менӧ. Ӧти-кӧ, ог кывзы сійӧс пызан сайын. Тшӧктӧ маннӧй рок сёйны. А ме... Ме ичӧт кага ли мый? Кӧсъян кӧть он — кывзысьны ог вермы. Ог радейт маннӧй роктӧ.

Ещӧ бабӧ оз тшӧкты лым мачӧн шыбласьны, сарай вевтъяс вылӧ кавшасьны, джуджыд чойясті исласьны... Да уна мукӧдтор на! А ме ачым ог и тӧдлы, бара на лым мачыд менам киысь лэбыштас, вевт вылад кавшассяс, джуджыд чой кузяыд исковтсяс! Артмӧ — ог кывзысь бабӧӧс. А сідзсӧ, радейта ме сійӧс зэв ёна и кывзыся. Тшӧктас магазинӧ котӧртлыны — ме пырысь-пыр! Ем пысавны — кӧть дасысь! Шыдӧ картупель крӧшитны — бара жӧ! Тайӧ нӧ абу кывзысьӧм?

Ӧні ті верманныд юавны: а кутшӧмджык пӧ тэнад другыд? Вочавидза: дзик ме кодь жӧ. Кывзысьысь. Оз ӧд весьшӧрӧ шулыны: кутшӧм ачыд — сэтшӧм и друг.

А другъяс ми Женякӧд первой классянь. Ой, сӧра! Абу первойсянь. Ещӧ думыштанныд, мый ӧти парта сайын пукаламӧ. Ог. Весиг разнӧй классъясынӧсь. Сійӧ — «б»-ын, ме — «а»-ын.

Тӧдмасьлім ми водзджык нин, кор садикӧ на ещӧ ветлім. Бара думыштанныд, ӧти садйӧ пӧ, кӧнкӧ, ветлісны. Эг ӧти садйӧ ни. Стӧча кӧ висьтавны, тӧдмасим ми Синицынкӧд стадион вылын. Делӧыс сыын, мый менам бабӧ и Женялӧн тожӧ, вӧлӧмакӧ, ёна радейтӧны спорт, фигурнӧй исласьӧм, конькиӧн либӧ. Вот налы окота лоӧма вӧчны спортсменъясӧн миянӧс, ассьыныс вит арӧса внукъяссӧ.

Фигуристъяс миянысь, дерт, эз лоны, но кыдз аддзанныд, другъясӧн лоимӧ. Да кутшӧм другъяс! Унаӧн завидьтӧны!

Чайтанныд, пырысь-пыр и татшӧм другъяс лоимӧ? Дерт нин! Бабӧяс миян сӧмын первой лунсяньыс, кор стадион вылад аддзысьӧмны, сразу кыдзкӧ сяммӧмны дружитчыны. А ми эг. Помнита, частӧкодь ӧта-мӧдӧс кулакъясӧн тітшкӧдлімӧ. Бӧрынджык школаӧ нин пондім ветлыны, а зыксьылам унаысь на. Ёнджыкасӧ сы вӧсна, мый ме ошки ассьым первой «а» классӧс, а Женя — ассьыс первой «б»-сӧ.

— Дерт нин тэнад «беыд» бурджык! — шуа ме и заводита нерны Женяӧс баксысь ыж моз: — Бе-е! Бе-е-е!

— А-а! А-а-а! — вӧсньыдик гӧлӧсӧн пузчужӧм кага моз авзыны пондас и Женя. Менӧ тшӧтш нерӧ.

Ӧтчыд учительница кыліс миянлысь тадзи нерсьӧмтӧ, шуӧ:

— Ай-ай, Пыстин! Абу и яндзим? Октябрёноклы?

Меным эськӧ яндзим, но вочавидзи: — А сійӧ менӧ тшӧтш да!

Ковмис учительницаыдлы висьтасьны, мый вӧсна ми Женякӧд вензям.

— Вензьыны да ӧта-мӧдтӧ нерны нинӧмла, — менӧ кывзӧм бӧрын шуис учительница. — Регыд помасяс первой четверть, и ошкыны кутасны сійӧ классӧ, кӧні бурджыка велӧдчӧны. Оз «а» да «бе» вӧсна.

Ёна янӧдіс менӧ Надежда Павловна.

— Ме сэсся ог, ог кут некор нерсьыны, — кӧсйыси ме учительницалы.

Сійӧ луннас и школаысь мунігӧн ме висьталі Женялы, мися, тадз и тадз, чуксала тэнӧ ордйысьны. Нерсьыны огӧ кутӧй...

— А мый, ордйысям! — Эз и повзьы сійӧ. — Тӧдан мый, вай вӧчам гӧрд флажок! Кодным бурджыка кутам велӧдчыны, сы ордын мед и флажокыс лоӧ.

Меным весиг завидь лои, мый эг ме, а Женя флажок йывсьыс вӧзйис.

— Ог флажок, а знамя! Флажокыд сійӧ мый? Вот знамяыс! — шуи ме и вӧзйи Женялы: — Лок ӧні жӧ мунам миянӧ и вӧчам!

Эз кӧ бабӧ отсышт, миян эськӧ флажок ни знамя эз артмы. Кумач торйыс, ыджыд-ӧ тор, а некысь оз сюр. А кор бабӧ тӧдмаліс, мыйла миянлы кумачыс колӧ, мездіс. Сэтшӧмтор вылад пӧ сета ме тіянлы ассьым чибльӧгӧс. Важӧн нин пӧ сетлісны сійӧс меным кыдз комсомолка-активисткалы. Ӧні пӧ тайӧ чибльӧгыс мед и лоӧ тіянлы знамяӧн да водзӧ на бур делӧ керӧ...

Знамяыдлы ми вороптор вӧчим. Кӧсйим ляскыны гӧрд звёздочка, но гӧрд вылад гӧрдыд оз тӧдчы, и ми пондім думайтны, мыйӧн мичмӧдны ассьыным знамянымӧс. Регыд миян знамя вылын лясвидзисны журналысь вундӧм Сӧветскӧй Союзса Геройлӧн значок, Социалистическӧй уджвывса Геройлӧн значок, «Правда» газетысь вундӧм куимнан орденыс.

— Тэрмасьӧмныд эськӧ тайӧ значокъяссӧ да орденъяссӧ ляскавны, но ляскинныд нин кӧ, мый тіянкӧд керан? — шуис бабӧ, миянлысь знамятӧ видзӧдлӧм бӧрын. — Быть ӧні ковмас тіянлы геройяс моз велӧдчыны да овны.

Аслыным радыд! Этатшӧм знамя вӧчны сяммим!

Но вӧчны знамятӧ, вӧлӧмкӧ, ёна кокньыдджык. Вот кутныс ас ордад попробуйтлӧй, кор тільсян-тільсян да друг ляпкысяс тетрадь лист шӧрад зэв паськыд сыръя дора чернила войт. Либӧ нёль дінӧ нёль содтӧм бӧрын кыськӧ лоас ӧкмыс, кор тӧдан нин, мый кӧкъямыс колӧ.

А Женялӧн быттьӧ нарошнӧ ставыс лючки да бура артмӧ. Та понда и знамяыс век сы ордын кутіс лоны.

— Воштінныд кӧ нин знамятӧ-а? Мыйкӧ тай нӧ ог аддзыв? — юаліс ӧтчыд бабӧ, кор Женякӧд пуксим ӧтлаын гортса уджъяс вӧчны.

— Женя ордын, — шуа ме и льӧбйӧй заводитӧ дзӧрны.

— Но-о, — кайтыштӧ бабӧ, — пувъя пирӧг пӧжалі, мися, внучокӧс гӧститӧда, а, вӧлӧмкӧ, сійӧ зэв дыш.

— Абу, абу дыш Юраыд, зэв зіль зонка сійӧ, сӧмын тэрмасьӧ! — дорйыштіс менӧ Женя. — Ме кор тэрмасьлі, ӧшыбкаясыс вӧліны жӧ. Юраыд «5» вылӧ вермӧ велӧдчыны. Физкультураысь ӧні нин «5» сылӧн. А менам... «2» лоӧ.

Бӧръя кывъяссӧ Женя шуӧ зэв жугыля.

А бабӧ, кылӧ, малалӧ нин менсьым юрӧс да меліа кайтӧ:

— Ок-ок-ок, шондіа юр, сідзкӧ, тэнад физкультураысь отлично? Ме ӧд эг тӧд!

Ме бӧрын жалитыштіс и Женяӧс, тшӧтш юрӧдыс малыштіс:

— А тэнад нӧ, Женюк, мыйла бара двойкаыс? Оз мыйкӧ артмы? Эн жуглясь. Юриклӧн кӧ пять, сійӧ и отсыштас... Коді мыйӧн вынаджык, сійӧн и отсасьӧй, дитяяс, ӧта-мӧдныдлы.

— У-у! Ме физкультурасьыд змей кодь! Ме моз пелька некод классын оз вермы ни котравны, ни чеччавны, ни шыбласьны! — ошйысьышті ме, и синва сорӧн заводитӧ нин ызбыльтны серам. — Женя, кӧсъян, ме тэнӧ кута велӧдны?

— Вот тадз, вот тадз! — ошкыштӧ менӧ бабӧ да содтӧ: — Бӧрдӧны сӧмын коньӧр кодь зонкаяс, а тэ миян... Мунӧ мыськӧй кинытӧ да ӧбедайтны кутам. Ок, юмов компот менам талун пувъя пирӧгӧн!

Чайтанныд, та бӧрын ме некор нин эг шогӧ усьлы знамя вӧснаыд? Кымынысь на! Но век жӧ, знамяыс эз понды сӧмын Женя ордын гӧститны, вуджліс и ме дорӧ.

Чернила войтъясыд эськӧ ӧні эз нин пондыны ляпӧдны, но мукӧд дырйи пӧла бока на артмывлӧ шыпасыд, а то и кытчӧкӧ йӧюк моз кыв шӧрсьыс вошлас.

— Тэ кывзы, Юра, мый гижӧмыд, — менсьым тетрадь видлалігмоз шуас Женя: — «Миян кека зэв ыджыд». Бара на тэрмасян!..

Збыль вылассӧ ме тэрмасьлі и эм. Сы вӧсна, мый менӧ зэв ёна кыскӧ ывла вылӧ. Кыдзи нӧ верман пукавны гортын да тэрмасьтӧг гижны кутшӧмкӧ шыпасъяс, кор ывлаас сэтшӧм гажа да лӧсьыд, торъя нин тӧвнас. Пукалӧмсяыд бурджык иславны лыжиӧн. У, кыр йывсяньыс исковтны понда да сӧмын шутьлялӧ тӧлыс пельясын!

Лыжиӧн ветлыны пондіс велӧдчыны и Женя. Ме сійӧс эг кут гӧгӧрвоны. То шуас гортса удж вӧчигӧн «мыйла тэрмасян?», то горзӧ «ӧдйӧнджык, ӧдйӧнджык!» Тэ пӧ тӧвзьы-тӧвзьы ӧдйӧнджык! Мед ме коля кӧ. Всё равно пӧ коркӧ вӧтӧда!

Всё равно пӧ вӧтӧда! А ачыс муртса и пошиктӧ-кысйӧ. Вот серам петкӧдлысьыд! Менӧ кӧсйӧ вӧтӧдны! А тӧв нырсӧ оз кӧсйы?

Но Женя ыръян вӧлӧма. Тулысъявылыс, видзӧда да, повтӧг нин джуджыд Сыктыв кырйӧд дзужкнитас-исковтас. Кайныс сьӧкыда на кайӧ, но тільсьӧ-пессьӧ, оз пӧрччы лыжисӧ. А то ӧд, йӧз смек, ӧткымынӧн пӧрччылӧны кайнысӧ.

Мӧд тӧвнас Женя кокниа нин кутіс панйыны Шурик Поповӧс да Вася Шустиковӧс, миян классысь медся ыкшаяссӧ.

А таво тӧв весиг менӧ пондіс талявны. Панласигад сідзи и видзӧд — шутьнитас бокӧдыд, ордъяс. Но ме ог сы вылӧ таысь скӧрав. Ӧти-кӧ, сійӧ менӧ эз на панйыв, а мӧд-кӧ, урӧкъяс вӧчны меным век на отсавлӧ.

Тӧданныд, кор ме збыльысь другӧн Женяӧс понді лыддьыны? Таво тӧвсянь. Сійӧ луннас ми ордйысим лыжиӧн Женяяс класскӧд, 3«б»-кӧд.

Панласьӧм йывсьыд ме эг вунӧдлы вежон чӧж, сы йылысь думайтӧмла бара на «тройка» босьті роч кыв кузя. А вечернянас нин юалі Женялысь:

— Дасьтысян?

— Да, — шуӧ, — ӧні ме тэнӧ панъя!

«А збыль кӧ?» — ыркмуніс сьӧлӧмӧй.

Ок, кутшӧм ӧдйӧ ме котӧрті аскинас! Эг котӧрт, а лэби! Тӧвзя медводзас и шочиника видзӧдлывла мышвыв, дэльӧда, думысь, Женяӧс, мися, панйыны кӧсйин, а ачыд кольччӧмыд зэв ылӧ. Но а баръялігад мый вермас бурыс лоны? Чой горув кодьӧс буретш вӧлі шутёвта-лэчча. Друг!.. Веськыд лыжиӧй кежыштіс, татшкысис мыйӧкӧ. Ачым пурскыси лым пытшкас. Зэв ӧдйӧ бӧр чеччи. Видзӧда, лыжи пӧлӧй джынъя, кажмунӧма-чегӧма. Ок-ок-ок!.. Женяыд ӧні и панъяс! А кор видзӧдлі лыжня вылӧ, аддзи: шырзьӧ медводзас Васька Шустиков! Ад горшӧ, мый нӧ тайӧ? Кӧні нӧ Женяыс? А сійӧ, вӧлӧмкӧ, ме дорын нин. — Мый лоис? — юалӧ.

— Тэд кутшӧм делӧ?! — скӧрми ме. — Тэ мыйла ме дорӧ сувтін?! Васька со медводзас! Ышнясьны кутас!..

А сійӧ: мед пӧ, колӧкӧ, ышнясьӧ, а ме тэнӧ тадзи ог коль. Оз пӧ ков меным сэтшӧм вермӧмыд.

Со ӧд кутшӧм вӧлӧма Синицыныс!

Аскинас Женя вайис знамянымӧс миян классӧ. Тіян пӧ 3«а»-ыд панйис, мед тіянын и знамяыс лоӧ.

Ставӧн радлісны. Ме ышлолалі.

Сы бӧрын регыд миян 3«а» да 3«б» классъяслӧн вӧлі ӧтувъя собрание. Собрание вылӧ корлісны менсьым бабӧс. Бабӧ висьталіс миян знамя йылысь. Кыдзи сылы коркӧ важӧн, комсомольскӧй собрание вылын, сетлӧмаӧсь гӧрд чибльӧгсӧ — пемыд сиктса йӧзӧс грамотаӧ бура велӧдӧмысь. Кыдзи сійӧ чибльӧгсӧ видзӧма киссьӧмысь и шонді водзын быгалӧмысь да мыйла ӧні сетіс миянлы, Женялы да меным, знамя пыдди. Бабӧ сідз жӧ висьталіс, мый пыр на зэв сюся видзӧдіс миян костын ордйысьӧмным бӧрся. Медбӧрын шуис: мед пӧ тайӧ знамяыс лоӧ оз сӧмын Пыстинлӧн да Синицынлӧн, а кыкнан классыслӧн.

Ставӧн нимкодьмисны таысь. Зарни бумагаысь вундалім шыпасъяс да ляским знамя вылад кык кыв: «Медбур класслы».

Миян 3«а»-ын ӧні знамяыс. Но, веськыда кӧ шуны, пола — мырддясны. Ӧти-кӧ, Март 8-ӧд лун кежлӧ дасьтӧм концертыс вылын 3«б»-саяс гораджыка и лӧсьыдджыка лыддисны кывбуръяссӧ, мӧд-кӧ, классӧ мичаджыка налӧн вӧлі баситӧма, а коймӧд-кӧ, яндзим и висьтавнысӧ — поведениеысь менам лоис двойка. Артмис кыдзкӧ... Рисование урӧк вылын. Учительница шуис: рисуйтӧй пӧ талун мый кӧсъянныд, мый тіянлы медся ёна кажитчӧ.

— Ме дзоридзьяс рисуйта! — горӧдіс Катя Чередова, мекӧд орччӧн пукалысь нывка. Сійӧ пыр дзоридзьяс рисуйтӧ, садикын на велавлӧма. А ме... Ме заводиті рисуйтны ыджыд дас кык судта керка. Подъёмнӧй кран и быдӧн эм. И керка стрӧитысьясӧс, ичӧтик йӧзӧс, медвылі судтаас рисуйті. Ӧти, быттьӧ менам папа, кинас шенасьӧ: помалім пӧ керкатӧ! Радыд аслам, менам кодьтӧ мися, некод, кӧнкӧ, эз рисуйт. Васёк Шустиков, пӧдикӧ, лыжникӧс бара рисуйтӧ-а. Лыжнӧй соревнование дырйиыд первой местатӧ босьтіс да сысянь пыр ӧти сылӧн рисуйтанторйыс — лыжник.

Здук кежлӧ и бергӧдчыштлі, мися, кӧть видзӧдла сылысь лакӧмсӧ. И друг... Катя лэптіс сэтшӧм чилзӧм! Торкин пӧ менсьым серпасӧс, со кутшӧм кузь кока лоис катшасинмыс! А сэсся эг и тӧдлы, кыдзи менсьым дас кык судта керкатӧ и подъёмнӧй крантӧ мулс-малскерис сьӧд краскаӧн.

— Ой, Катька! — чуть ог бӧрддзы. — Сюрас ӧні тэныд! — шуи да сідз дзумниті мышкуас! А мый нӧ? Мед оз дай...

Кирпич керкатӧ эськӧ выльысь рисуйті, бурджыка на воддза дорсьыс, «5» пуктӧма Надежда Павловна, но мый сыысь, поведениеысь «2» да. Эн пӧ бергав урӧк вылад да нывкаяскӧд эн тышкась, шуис учительница. Быттьӧ Катькалы позьӧ йӧзыслысь рисунокъяссӧ тшыкӧдны...

3«б»-лӧн, ме висьталі нин, и концертыд бурджык артмис, и классӧ мичаджыка вӧлі баситӧма, и поведениесьыд некодлӧн двойка абу. А главнӧйыс — Май первой лун кежлӧ дасьтӧмны найӧ мича дзоридзьяс: нуӧмны Юбилейнӧй площадь вылӧ Ленин памятник дорӧ дай гражданскӧй война вылын усьӧм геройяслы обелиск дорӧ.

Ошйысьӧмыс Женялӧн! Ветлім пӧ, стихъяс лыддим, клятва сетім!

Кывзі ме ошйысьӧмсӧ и, дерт, завидьтышті, но век жӧ думайті, кыдзи парскыны сійӧс. Медбӧрын шуа:

— Аддзӧмыд ошйысянтор! Вот ми Победа лун кежлӧ, май 9 лун кежлӧ дасьтам!

Шуныд шуи, а мый сэтшӧмторсӧ дасьтыны, эг на тӧд. Кутшӧм мӧвпъяс сӧмын юрӧ эз волыны. Вот эськӧ, мися, миян классӧ кӧ волас встреча вылӧ самӧй главнӧй генералыс Москваысь! Либӧ, шуам, салдатъяс миян карса гарнизонысь босьтасны миян классӧс сьӧрсьыныс маршируйтны. Дерт, детинкаяссӧ сӧмын, Катька коддемъясӧс оз жӧ босьтны. Ме, дерт жӧ, медводзас восьлала салдатыскӧд орччӧн. Да унатор. Ставсӧ и лыддьӧдлыныд он вермы. Весиг вӧтӧн мыйкӧ сэтшӧмтор аддзылі.

А аскинас друг тӧд вылӧ уси, мый эм миян сэтшӧм книга, кӧні рисуйтӧма ветымын кымын геройлысь портретсӧ. И быдӧн йылысь гижӧма, кутшӧм подвиг да кыдзи сійӧ подвигсӧ вӧчӧма. Шусьӧ книгаыс «Висьталӧны пӧгибнитӧм геройяс».

Помнита, ми бабӧкӧд сійӧ книгасьыс ӧти герой йылысь лыддим. Бабӧ лыддигас чышкаліс синвасӧ да шуаліс:

— А дас ӧкмыс ар на ӧд и вӧлӧма зонмыслы, дзик на дитя. И мам, пӧди, сылӧн, сьӧлӧмшӧрлӧн, эм...

А сэсся шыасис ме дорӧ: шонді юр пӧ, мед эськӧ эз жӧ татшӧм страстьыс тіян юр вывті мун. А воюйтны кӧ быттьӧ ковмас, со эта ног, этайӧ зонмыс моз повтӧг тышкась...

Ме сэки вочавидзи бабӧлы, мися, ме Матросов моз кута.

Ӧні, сійӧ книгатӧ тӧд вылӧ уськӧдӧм бӧрын, мем мыйлакӧ зэв окота лоис тӧдмӧдны тайӧ геройясыскӧд и мукӧд челядьӧс. Босьті ножич и став геройяссӧ вундалі.

— Бабӧ, бабӧ! Тӧдан, кутшӧм стенд миян классын лоӧ! — ӧдзӧсӧд пыригкостіыс и уськӧдчи бабӧлы паныд да понді ошйысьны.

— Со тэ менам, шондіа юр, мый думыштӧмыд! Асьныд челядь али нӧ учительницаыд индӧд сетіс? Молодечьяс, абу вунӧдӧмныд Победа лунсӧ!

Тадзи ошкыштіс бабӧ, а сэсся юаліс:

— Кытысь нӧ та мындасӧ аддзинныд? И став карточкаыс ӧд зэв ясыд да ӧтгырся!

— Книгасьыд, кодӧс тай ми коркӧ тэкӧд лыддимӧ, — нинӧм эг и думышт да вочавидзи ме.

— Ок, грекӧ вӧйтысь, — повзис и дӧзмис ме вылӧ бабӧ. — Сійӧ книгаыс ӧд абу асланым! Татьяна бабыдлысь босьтлі лыддьыны!

Ме повзьышті жӧ: йӧзлӧн, Татьян баблӧн.

Бабӧ стрӧга видзӧдліс ме вылӧ да шуис:

— Тэ тшыкӧдін, тэныд и ковмас кыв кутны. Мун ӧні жӧ и ачыд висьтав Татьяна Васильевналы пакӧститчӧм йывсьыд. Прӧститас кӧ, тэнад чассьӧ, а оз кӧ и... Меным пыр кежлӧ яндзим лоӧ тэ вӧсна.

Жаль мем лоис бабӧ, но и абу зэв окота мунны висьтасьнысӧ.

— Гашкӧ, трус тэ да, полан ассьыд мыжтӧ висьтавны? — шуӧ бабӧ, быттьӧ гӧгӧрвоӧ менсьым думъясӧс.

— Ме трус? Ме... — чужӧмӧй менам сотчыны кутіс. Уськӧдчи ывла вылӧ и тэрыба понді восьлавны Женя керкалань. Буретш ӧшинь улас пуяс садитӧны морт вит-ӧ-квайт. Женя бабыскӧд сэнӧсь жӧ. Ме ачым эг и тӧдлы, кыдзи воськовъяс менам лаймалісны. Шог и майшасьӧм кокъясӧ быттьӧ пудъя гираӧн ӧшйисны. «Мый шуны, кыдзи висьтавны Женя баблы книга тшыкӧдӧм йывсьыс?» Ме нин чуть ог бӧр уйкнит, мися, ывлаас кыдзи книга йывсьыс сёрнисӧ панан? Бӧртиджык вола. Но менӧ найӧ аддзӧмны нин, чуксалӧны, лок пӧ тшӧтш отсышт миянлы.

Ме и рад отсасьнытӧ, оз кӧть сразу ковмы книга йывсьыд висьтасьнытӧ. Но бабыс Женялӧн мыйкӧ казялӧма нин, юасьӧ:

— Жугыль тай нӧ мыйкӧ. Эз-ӧ шог су кутшӧмкӧ?

Ме нурбыльті, мый медводз юрӧ воис: — Бабӧ висьмис...

— Чӧл! Неважӧн на лючки вӧлі да! Мыйысь нӧ?

— Книгасӧ кодкӧ косявлӧма да...

— Но, книга вӧснаыд ӧд эз жӧ висьмы! — шензьӧ бабӧ да видзӧдӧ ме вылӧ: он-ӧ пӧ тэ пӧръясь?

— Книгаыс ӧд абу аслас. Йӧзлӧн, — сибдыштӧм гӧлӧсӧн вочавидза ме.

— Кутшӧм ӧкаяннӧй нӧ эськӧ сідзсӧ вӧчӧма? Петшӧравны колӧ...

Эз сэсся тырмы вынӧй менам, лэдзи юрӧс. Ме, мися, косявлі. А книгаыс сійӧ тіян вӧлӧма, а ме эг тӧд. Ме геройяссӧ сӧмын... Стенд кӧсйи вӧчны Победа лун кежлӧ...

Меным окота лои висьтавны и висьтавны мыйкӧ, медым дырджык не кывны Татьян баблысь гӧлӧссӧ, но сійӧ быттьӧ гӧгӧрвоис менсьым кӧсйӧмӧс, торкис друг:

— Но, геройяссӧ кӧ сӧмын... Женя тай миян корсьӧ жӧ вӧлі кутшӧмкӧ картинаяс. Геройясӧс жӧ... Ті ӧд, кӧнкӧ, бара на ӧтвылысь сыкӧд...

— Ӧтвылысь! Ӧтвылысь! — горӧді ме да уськӧдчи котӧрӧн Женя бӧрысь вала.