МИ КЫПӦДАМ КЕРКА

Ӧти асылӧ папа чушкыль-чошкылькерис менсьым юрсиӧс да шуис:

— Талун ми выль керка тэчны заводитам, кӧсъян кӧ, ветлам, аддзылан, кыдзи керкаыс кыптӧ.

— Кыдз ог кӧсйы?! Кӧсъя! — долыдми ме.

— Но вот и бур. Ветлам. Сӧмын сёй крепыдджыка: уджавныд он вермы. Кӧнкӧ ӧд окота лоӧ тшӧтш уджалыштны?

Папа ме вылӧ вильышакодь видзӧдлывлӧ. А бабӧ пыр жӧ и заводитӧ сійӧс велӧдны да ышӧдны:

— Нулы, нулы, мед видзӧдлас.

Мӧдӧдчим ми, восьлалам папакӧд орччӧн. Гырысь воськовъясӧн тэрмасьтӧг папа мунӧ. Мем ковмӧ сы бӧрся вӧтчыны котӧрӧн сорӧн.

Воим стрӧитчанінӧ медводдзаясӧн. Мыйлакӧ площадкаӧн керка стрӧитанінсӧ папа шуӧ, кӧть эськӧ некутшӧм площадка и абу сэні.

Папа менӧ новлӧдлыштіс площадка вывті, висьталіс да петкӧдліс сэтысь мыйсюрӧ.

Регыд пондісны и мукӧдъяс локтавны. Пашакӧд ставныс киасялісны. Унаӧн и меным чургӧдлісны кинысӧ да шулісны:

— Кыкӧн талун. Кык норма ковмас сетны.

— Сетам, — шыасьліс папа и кытчӧкӧ карланьыс видзӧдігтыр содтыліс: — Мед сӧмын растворнас оз сёрмыны, ас кадӧ ваясны.

И ми заводитім уджавны.

Папа менам каменщик, кирпич стен тэчӧ. Кык отсасьысь сылӧн ещӧ эм.

Зиночка ӧтиыс. Сійӧ ведраӧн вайис папа дорӧ растворсӧ, а мӧд отсасьысьыс, Федя, папалы кирпичьяс мыччаліс. А папа тэльӧбӧн, мастерок шусьӧ, босьтас ведрасьыс растворсӧ, нильӧдас сійӧн кирпич стенсӧ и шняпкӧ сы вылӧ выль кирпич, ӧти бӧрся мӧдӧс.

Тайӧс ме бӧрынджыкнас на видзӧді. А первойсӧ мекӧд кыкӧн тэчыштім. Видзӧд пӧ, кыдзи ме вӧча, шуис папа да петкӧдліс кыдзи колӧ, а сэсся меным тшӧктіс: на пӧ видлы, артмас оз тэнад.

Артмис менам, артмис! Шнёпки-пукті кирпичтӧ и папа моз жӧ тутш-тотшкери мастерок воропӧн кирпичсӧ. «Молодеч» — шуис папа. Федя да Зиночка тшӧтш ошкыштісны. А ме ещӧ и ещӧ тэча. Дасысь уна кирпич пукті. Сэсся папа менӧ ыстіс Федялы да Зиночкалы отсасьны.

Уна кирпич ваялі. Киӧй быдӧн вабольтчис.

— Мича да ыджыд и керка стрӧитам татшӧм отсасьысьнад! — ошкыштіс менӧ Зиночка да мыччис кампет, зэв пӧ зіля уджалан да. Сёй пӧ кампетсӧ да шойччышт, шуис сійӧ. А папа чирыштіс Зиночкаӧс татшӧм кывъяссьыд. Шойччыны пӧ кутас сэк, кор ставыс шойччӧны. Миян сэтшӧм правилӧ. И ыстіс менӧ видзӧдлыны, кыдзи сувтӧдісны кран миян керка дорӧ.

Ме водзті эг и тӧдлы, мый кӧрт рельсъяс вылӧ крансӧ сувтӧдӧны. Кӧсйӧ кӧ, краныс водзӧ мунӧ, кӧсйӧ кӧ, бӧрыньтчӧ! Лӧсьыдыд! Вот эськӧ крановщикӧн лоны! Пукав кабинаын да веськӧдлы сӧмын рычагӧн! Быдӧнӧс тэ аддзан, ставыс гӧгӧр тыдалӧ! Но ме папалы кӧсйыси нин сы моз жӧ каменщикӧн лоны.

Кран сувтӧдӧм бӧрын папа менӧ чукӧстіс ас дорас и шуис, локтін кӧ пӧ папыдлы отсасьны, ковмас ещӧ ӧти мог вӧчны.

— Кутшӧмӧс? — юала, ачым рад, мый верма отсавны папалы.

— Регыд пажын кад, — шуис папа, — мун ӧні жӧ гортӧ да отсышт бабыдлы, ӧд кык мужиклы талун колӧ пуны.

— У, татшӧм могыд! — кӧрыштлі ме нырӧс, но папа шуис: вӧч пӧ, мый тшӧктӧны. И ме мӧдӧдчи.

Кильчӧ помӧ менӧ суӧдіс Женя. Лок пӧ купайтчыны лэччылам.

— Мем оз позь, — шуа ме. — Ме задание вылын.

— Кутшӧм задание вылын? — шензьыштіс Женя.

— Он ӧмӧй аддзы, ме удж вывсянь, — вочавидза Женялы и петкӧдла гӧрд кирпич бусӧн лякӧссьӧм киясӧс. — Со... Ваболь и быдӧн артмис... Ме папакӧд стрӧительство вылын вӧлі, кирпич новлі и ачым джуджыд стен тэчи. А ӧні... бабӧлы колӧ отсыштны.

Видзӧда, Женялӧн жугыльмис чужӧмыс.

— Ладнӧ, — шуа, — гашкӧ, инӧ и лэччылам, удита кӧ.

— Удитан! — горӧдӧ Женя. — Вай пырам да кыкӧн отсыштам бабыдлы, а сэсся... Ме тшӧтш кӧсъя строительство вылад.

«А-а, со мый вӧсна тэнад жугыльмӧма чужӧмыд, — думышті ме, — завидь лои менам ваболь вылӧ».

— Босьтас кӧ папа, ветлам! — шуа ме и содта эскӧдана кыв: — Босьтас! Тэнӧ босьтас!