МЕТАЛЛОЛОМ
Ме кӧнкӧ аслам висьтын гарыштлі нин, мися, куим порция мороженӧй сёйи да горшӧй кык лун висис. Куйлі, эг чеччыв.
Коймӧд луннас муні школаӧ, Катя Чередова пырысь-пыр и уськӧдчис ме вылӧ: — Мыйла школаад эн волы?
— Горшӧй висис, — шуа.
— Дерт нин горшыд! Уджавнытӧ дыш да сійӧн и эн волы. Ми со кияс доймытӧдз уджалімӧ, металлолом чукӧртім.
— Эн ышнясь, чукӧртныд кӧ! Колӧкӧ ті ме чукӧрта! Быдса тонна кӧть! — горӧді ме Катя вылӧ дӧзмӧмла.
— Быдса тонна?
— Быдса тонна!
— Но и чукӧрт!
— Чукӧрта!
Заводитчис урӧк, и ми дугдім вензьыны. Но учительница быттьӧ нарошнӧ паніс сёрни металлолом йылысь. Ошкыштіс, бура пӧ уджалінныд металлолом чукӧртігӧн. Но медбӧрас содтіс, мый 3«б»-лӧн миян дорысь унджык чукӧрмӧма.
— Тэ вӧсна, тэ эн волы да сійӧн и этшаджык миян! — парсӧ чушкӧдӧмӧн броткӧ ме вылӧ Катя да парта улын ӧтторъя чужйӧ меным кокнас.
— Шуи: чукӧрта! Мый ещӧ...
Ме тӧкӧтьӧ ог тшӧтш чужйы Катькалы, да тӧд вылӧ уси коркӧяыд, кутчыси, эг сійӧс чуткы.
Перемена дырйи аддзысим Женякӧд, радным! Кыдзи нӧ, кык лун эг аддзысьлӧй. Воліс эськӧ рытнас сійӧ ме дорӧ, да бабӧ эз лэдз сёрнитныс, оз пӧ позь висьысьыскӧд, ачыд висьман.
— Тарыт кино тан, школьнӧй залын, волам? — вӧзйӧ медбӧрын Женя.
— Ог, — дзӧрӧда ме юрӧн.
— Мыйла он? Лӧсьыд ӧд, военнӧй!
— Некор меным, — шуа ме. — Металлолом колӧ чукӧртны. Ачыд тӧдан, виси, эг вӧв субботник вылад.
— А тӧдан мый! — горӧдӧ Женя. — Ме тшӧтш тэкӧд ветла! Удитам чукӧртны и кино вылӧ на пырны! Ме тӧда сэтшӧм места, кӧні металлоломыд — ну, чӧлӧй склад!
— Склад кӧ нӧ, мый ачыд эн чукӧрт сэтысь? — юала. Менам эз эскыссьы сійӧ кывъяслы.
— Сэтчӧдз эг ветлӧй. Ылын ӧд, выль котельнӧй дорын.
Урӧкъяс бӧрын сразу и мунім ми Женякӧд котельнӧй дорад.
А сэті, видзӧдам да, ӧградитӧма. Кыдзи и пыран? Аддзимӧ ӧграда сайсьыс дядьӧӧс, горзам:
— Эй, дядюкӧй, эм тіян сэн металлоломыд? Позьӧ, ми пыралам да ӧктам?!
— Сійӧ добраыд бара-й сюрас, — броткыштӧ дядьӧ да шеновтӧ кинас, эсытчӧ пӧ, вороталаньыс локтӧй, лэдза пырнытӧ.
Ми уськӧдчим ӧграда пытшкад.
— То этайӧс ставсӧ кӧть нуӧй, — индӧ дядьыд кирпич стен бердӧ валитӧм нюгыля-вегыля труба чукӧр вылӧ.
— У, тайӧс ми дасысь нуам, дай ещӧ кольӧ на! — шензьӧ и радлӧ Женя. — Ме тай шулі...
Ме тшӧтш рад: тонна ӧд кӧсйыси. А тані тоннаыд и лоӧ!
Босьтім ми Женякӧд морт ӧти трубаӧн и котӧрӧн школалань.
Вайим. Мудзим, пӧсялімӧ.
— Ещӧ ветлам? — юалӧ Женя.
— Ветлам!
Бара мунімӧ. А сійӧ дядьыд век сэні. Аддзис миянӧс, нюмдіс.
— Ещӧ воинныд?
А кыдзи нӧ! Миянлы уна колӧ! Миян субботник... Соревнуйтчам ми... — висьтасям ми Женякӧд. А дядьыд кывзіс-кывзіс миянӧс дай шуӧ: — Ті, ребятки, со мый... Эн на вӧрӧдлӧй. Ме дзик пыр! — сійӧ тэрыбакодь веськӧдчис котельнӧй ӧдзӧслань.
Мый нӧ, шуам, гашкӧ, оз нин кӧсйы сетны да? Али начальникыслысь юавны пырис?
Дядьыд бӧр регыд петіс. А сыкӧд мӧд морт, том, мича свитера.
— Но, мый тіян тан? — шыасьӧ мича свитераыд миян дорӧ.
Мый... Ми падмыштлім здук кежлӧ, но миян дядьӧыд мездіс миянӧс, шыасис:
— Ме тай висьталі нин, мися, старательнӧйӧсь зонкаясыс, отсыштны колӧ. Кыдзкӧ сӧвтамӧ, а тэ ну машинанад.
— А-а, — паськыда серӧктіс зонмыд. — Понятно! Нуны, значит? Кытчӧ нӧ нунысӧ эськӧ колӧ?
— Кытчӧ? Школа дорӧ, дерт!
Ми вӧлисти Женякӧд гӧгӧрвоим, мый миянлы нунытӧ отсавны кӧсйӧны, да радным сідзи и ызбыльтны кутіс. Но пырысь-пыр гӧгӧрвоим, мый водз на радлыссьӧма. Шофёрыд кутіс шуны, мый пӧ ме сыысь имеитны понда, нуа кӧ.
— Кыдзи мый? Аттьӧ шуам! — ӧтырышъя вӧзъям ми Женякӧд.
Шофёрыд сералӧ: аттьӧсьыд пӧ вӧд он вур платтьӧ. Ми шӧйӧвошыштім, он кӧ, шуам, ну, ми огӧ жӧ мырдӧн тшӧктӧй. Асьным новлам.
Сэки дядьыд кватитіс свитерӧдыс зонтӧ и стрӧгакодь шуис:
— А куим шайт тэд тырмас? Эм менам кӧнкӧ... — Сійӧ пондіс лукйысьны аслас гач зептын.
— Ой, и миян эм сьӧмыд! — горӧдӧ Женя. — Кыкнаннымлӧн кызь урӧн!
— Да мунӧй ті... — скӧрысь ӧвтыштсис том мортыд. — Шутитыштны ли мый оз позь? Тэ, Панфилыч, сэтшӧм жӧ! Куим шайт... Озыр морт аддзысьӧмыд.
— Ме абу «сэтшӧм жӧ», а тэ сэтшӧмыс! Вай мун машинатӧ! Аддзӧмыд челядькӧд шутитны...
Шофёр нинӧм шыавтӧг муніс и вайӧдіс машинасӧ дзик кӧрт чукӧр дорад и шуис миянлы: — Шутка шуткой, а делӧ делом. Вайӧ сӧвтӧй! — сэсся чеччыштіс кабинасьыс да тшӧтш пондіс сӧвтны.
Кыкнан дядьныс миянлы отсалісны. И асьным пессьыштім. Абу на кокни кӧрта кӧлуйнад вӧдитчыны. Ставсӧ тэчим кузовад, нинӧм эгӧ кольӧй.
Кабинаас пуксьӧдӧм бӧрын шофёрыд миян шуис:
— Со Панфилычлы аттьӧ шуӧй, не кӧ сійӧ, куйліс эськӧ вежон на тан тіян добраныд.
— Аттьӧ, аттьӧ, Панфилыч! — горзам ми ӧшинь пырыс.
— Да мый сэн... Нинӧмысь аттьӧсӧ, — кинас ӧвтыштӧ миянлы дядьӧыд.
Ӧдйӧ журкнитім-воим школа дорӧдз. А сэні буретш чукӧртчӧмны став школьникыс, кино вылӧ пырны лӧсьӧдчӧны. И миян Катя Чередова сэн жӧ.
— Эй, Катя! — горза кабинасянь.
— Пыстин, тэ мыйла сэтчӧ кавшасин? — Катялӧн синъясыс гӧгрӧсӧсь. — Бара дуран, учительницаыдлы ӧд висьтала!
— Висьтав! Пыр дай висьтав, шу, чӧлӧй тонна металлолом вайӧма.
— Кутшӧм металлолом? Ой, збыль? Пыра чукӧста пионервожатӧйӧс, мед гижас миян класслы! Ми ӧні первой местаын лоам!
— А гашкӧ, ог ми, гашкӧ — 3«б»? Со ӧд и Женя Синицын мекӧд тшӧтш.
— Мед, всё равно! Мед ми 3«б»-кӧд первой местаын лоамӧй! Пыра!
Наян да горш жӧ Катяыд вӧлӧма!
Менӧ та бӧрын эз кут пинявны, сійӧ кӧть бур. А горшасьӧмсьыс коркӧ велӧдасны жӧ.
