МЕДГЛАВНӦЙ УДЖ

Ӧтчыд гожӧмнас мамӧ ветліс совхозлы турун пуктыны. Локтіс рытнас гожъялӧм чужӧма, мудз и дӧвӧльнӧй. Ох и мудзи, шуас, а аслас вомыс нюмвидзӧ.

— Асывсяньыс турун бергӧдлімӧ. А сэсся юрасим. Машина куртӧ миянлы, а ми горалам. Вӧвъясӧн новлӧны, — висьтасис мамӧ аслас удж йылысь. — А сэтшӧм лӧсьыд сэні! Пӧрччим паськӧмнымӧс, ньӧти ном абу, пӧттӧдз гожъялім. А сынӧдыс! Ветлам, Юрка, аски мекӧд.

— Ветлы, ветлы, шондіа юр, — ышӧдыштіс менӧ бабӧ. — Кӧмтӧгыд котралыштан дай куртны тшӧтш велӧдчан. Ме эськӧ ачым муні, да висьӧдча мыйкӧ.

Мый сэтшӧм кургӧмыс, ме ог тӧд, но збоя бабӧлы вочавидза:

— Куртныд ме верма!

Мамӧ серӧктіс, верман пӧ, дерт. А бабӧ и збыльысь шуӧ:

— Верман, верман, шондіа юр. Важӧн ми сизим арсянь куртлім, куртӧмыд челядь удж и лыддьыліс.

Ме муртса и виччыси аскиа лунсӧ. Войнас весиг вӧтаси видз вывті котралӧм. Но збыль вылассӧ видз вылад вӧлӧма ёна интереснӧджык мамӧ висьтасьӧм дорысь.

Мунім сэтчӧ теплоходӧн. Чеччим, ичӧтик вӧр куст и вуджим, миян видзным тыдовтчис. Па-а-ськыд!

— Тані и кутам уджавны? — юала мамӧлысь.

— Тані со зорӧдъяс нин да. Неуна водзӧ муныштам.

Ме пӧрччи сандалиясӧс, шыбиті ичӧтик кӧрзинаӧ, кодӧс вӧлі кута киын, и мӧді вартӧдны мамӧяс водзын. «И-го-го!» — горза вӧв моз. А мыш вылын и збыль вӧв гӧрӧктӧм шы кыліс. Видзӧда — навыскокалӧны кык верзьӧма. Ме ыджда кымын жӧ зонкаяс. Гожъялӧм еджыд юраӧсь, дӧрӧмъясыс парус моз пӧльтчӧмны, шпоракылӧны.

Ӧтиыс сідзи и лыйыштіс ме бокті, цоп-цоп сӧмын вӧв кок шыыс кыліс. Мӧдыс тпрунитіс да сувтӧдіс ме дорӧ вӧвсӧ:

— Талялі кӧ эськӧ! — шуис сійӧ.

— У, менӧ он на таляв! — збоя шыаси ме.

— А мый огыс! Видзсӧ портитанныд, ветланныд тшак вотысьяс! — дзоргис сійӧ ме вылӧ стрӧга, ме быдӧн повзьышті. Сэсся ньӧрнас видзпӧлӧнса вӧр вылӧ индігтыр сійӧ содтіс:

— Мед эз вӧв этатысь тшаксӧ ӧктӧма! Татысь ми асьным вотам да тшака шыд пуам турунасьысьяслы. Зоя, пӧварика миян, тадз кӧсйӧ.

— Колас меным тэнад тшакыд! — дӧзми ме. — Уджавны ми локтам, вот! Со мамӧ менам эстӧн тшӧтш локтӧ.

Зонкалӧн сразу чужӧмыс вежсис, бурмис и гажсяліс.

— Но, абу инӧ прӧста лытайтысьяс ті? А ме чайті... — шуис сійӧ нюмдыштӧмӧн и букыша видзӧдліс менам кӧрзина вылӧ.

— Вӧв вылад лӧсьыд ризъявнысӧ? — дзик пыр шыаси ме сы дорӧ. — Босьт менӧ тшӧтш.

Зонка видзӧдіс ме вылӧ дыркодь, быттьӧ гадайтіс, босьтны абу пӧ тайӧ гӧрд юрасӧ. Медбӧрын сьӧвзис ыджыд морт моз и важнӧя шуис:

— Ладнӧ, лок пуксьы.

Мамӧ эськӧ мыйкӧ, кылӧ, горзіс, Юрик пӧ, эн лысьт! Но ми гажаа равзігтыр резім нин вӧв вылад. Сӧмын тай ичӧт туй помыс вӧлӧма. Регыд и сувтімӧ кутшӧмкӧ бипур дорӧ.

— Уй, та мында и эм! — чушкӧдлі ме паръясӧс.

— Тырмас, — шуӧ менам выль другӧй. — Эгӧ ӧд ризъявны локтӧй — уджавны. Вот завтракайтыштам и доддясям.

Зонка сёрнитӧ мекӧд ыджыд морт моз, мем кажитчӧ весиг, мый важничайтӧ. Но ме ог дӧзмы сы вылӧ. Весиг эг скӧрмы сэк, кор сійӧ менӧ карсаӧн нимтыштіс да шуис, ті пӧ, карсаясыд, нинӧм он кужӧй турунасянінад вӧчны.

— Ме куртны кута, — вочавидзи ме падъявтӧг.

— Куртны? — зывӧкакодь вежыньтліс сійӧ вомсӧ. — Куртӧмыд сійӧ бабьей удж. Лок, бурджык, миянкӧд турун кыскавны. Вӧв вылас кӧть пукӧдышта, — вӧзйис сійӧ медбӧрын.

Ме чӧв олі, эг лысьт ни кӧсйысьны, ни ӧткажитны.

— Кӧсъян кӧ и курт! — дӧзмӧмӧн шыасьӧ зонка да содтӧ:

— Куртысьясыс миян оз жӧ тырмыны. Тэ кутшӧм классын велӧдчан? — друг юалӧ сійӧ.

— Нёльӧдӧ вуджи, — ошйысьышті ме, но зонка шутёвтіс: тэ пӧ тай ичӧт на. — Ми Серёгакӧд шестойӧ вуджим, — парскис сійӧ менӧ. — А турун пуктанінад мӧд во нин уджаламӧ. Лызь пара кыкнаннымлы колян во премия сетлісны! Он верит? Со юав кӧть Сергейлысь.

Миянлань тэрмасьтӧг матыстчис зонка, еджыд юра и беринӧсь чужӧма да кульсьӧм ныр выла. Сійӧ букышӧн, явнӧ вежӧгтӧмӧн дзоргис ме вылӧ, чайтіс, дерт, пыр кежлӧ нин мырдди ме другсӧ.

— Миш, а талун ӧтинымлы куртан машинаӧ пӧ ковмас доддясьны, — юӧртіс сійӧ другыслы выльторсӧ.

— Коді шуӧ? — юаліс менам Мишаыд.

— Со, бригадиршаным, — Сергей индіс кудриа юра нывбаба вылӧ, коді чатрасис енэжлань, корсис быттьӧ мыйкӧ сэтысь.

Менам другӧй пыр и шыасис бригадирпу дорад:

— Мый, Елена тьӧтка, куртан машинаӧ ли мый доддясьны? Вай ме! Со менам выль ёрт, карса, куртны локтӧма, сыкӧд.

Бригадирпу сюсякодь видзӧдліс ме вылӧ, сэсся серӧктіс:

— Но, зэв тай ыджыд уджалысь воӧма! Кодлӧн нӧ тайӧ? Ӧтнас ли мый?

Ме повзи, оз кӧ мися менӧ босьт уджавныд бригадиршаыд и. Но шыаси збоя: — Абу ме ӧтнам. Мамӧкӧд. Сійӧ тӧнлун уджаліс нин тані.

— А-а, — нюжӧдыштіс бригадирпу. — Бур, бур! Локтӧй куртӧй, уджалӧй, миян ставныдлы уджыд тырмас! Со кутшӧм мича поводдяыс!

Бригадирпу веськӧдчис бипур дорӧ, кӧні ӧшаліс ыджыд пӧрт и пӧся руасисны кык ведра. Ми тшӧтш зуйгим бипур дорад.

Еджыд колпака и партука нывка, пӧварика, тыдалӧ, ноксис бипур дорын. Кузь тьӧсъясысь вӧчӧм пызан сайын пукалісны кык дядьӧ, юисны чай.

— Ок, нылук, талун сэтшӧм чӧскыд чайыд! — азыма пӧсь чай гыньлалігтыр горӧдлісны найӧ еджыд партука нывкалы.

— Сэтӧрӧн завариті да ӧд, дерт, чӧскыд, — варова вочавидзис налы нывка. — Юӧй, наздоровйӧ! Со и ещӧ куим мужик локтӧны! (Сійӧ миянӧс: менӧ, Мишаӧс да Сергейӧс мужикъяснад шуис). Меным сэтшӧм рад лои. Гораа «здрасьте» горӧді.

— Чолӧм, чолӧм, он кӧ шутит, — шыасис ӧти дядьӧыс, а мӧдыс, уска, негрлӧн кодь еджыд пиньяса, шпыньмуніс паськыда:

— О, шогся, мися, зорӧд талялысь абу! Со и локтіс! Кутан мем, пиук, зорӧдсӧ тальны? — юаліс менсьым. Ме гогйӧдла юрӧн, кута, мися, и тожӧ жерйӧдла вомӧс. Гажа мем сэтшӧм лои, быттьӧ нэмӧс тані, турун пуктанінас, олі да уджалі.

Мамӧяс кашӧварня дорад воисны, а ме чай нин выль тӧдсаяскӧд юа кыз преникӧн. Прениксӧ Сергей мем сетіс.

— Юра! Со сійӧ пызан сайын нин! — вачкучкысис мамӧ. Ошкис менӧ али дивитіс, ме эг гӧгӧрво.

Ме преник тыра вомӧн вочавидзи:

— Уджавны кӧ воӧма, нинӧм жуйявны. Тэрмася ме...

— Аддзанныд, сійӧ тэрмасьӧ! — серӧктіс мамӧ.

— Да, Юраыдкӧд ми кутам куртны машинаӧн, — юӧртӧ мамӧлы Миша, менам выль другӧй.

— Оз жӧ куртны! — шыасис и негрлӧн кодь еджыд пиньяса дядьӧыд. — Сійӧ меным зорӧд талявны нин кӧсйысис!

— Кӧсйысьныд эськӧ кытчӧ на он кӧсйысь да. Бригадирыс кытчӧ ыстас, колӧ юавны, — мудериника нюмсер сетӧм бӧрын шуӧ мамӧ.

— Уджтӧг некодӧс ог кольӧй! — шыасис татчӧ и бригадирпу. — Быдӧнлы индам. Ме вот думайта да Юралы ковмас талун вӧчны медглавнӧй уджсӧ. Со Зоя пӧварика нӧк вайӧма, кӧсйӧ свежӧй тшакӧн чӧсмӧдыштны турун пуктысьясӧс. Ӧтнаслы сылы сьӧкыд лоӧ сымда тшактӧ вотны. Юрочка сылы и отсыштас. Пионер ӧд, пӧдикӧ, сійӧ, кӧні сьӧкыд, сэтчӧ и пионеръясыд мунӧны.

— Дерт жӧ отсыштас. Тшактӧ вотны вермас. Сюсь тайӧ, — пырысь-пыр суитчис мамӧ, быттьӧ сылысь юалісны.

Ме вом доръясӧс чушкӧдлі, мися, аддзӧмныд тай медглавнӧй удж. Но Сергей и Мишка ӧвтчыны кутісны кияснас, сӧгласитчы пӧ, сӧгласитчы! Ме сӧгласитчи. Кыдзи он сӧгласитчы, кор ставныс кутісны шуны, зэв дельнӧй удж вылӧ пӧ тай Юрочкаӧс индісны.

Завтракайтӧм бӧрын ставныс удж вылӧ разӧдчисны, коді куртны, коді тэчны, а ми Зоякӧд сюмӧд наберушкаяс босьтім и пырим видздорса вӧрас.

Меным сразу и масляяс пондісны сюравны, но Зоя шуис, масляяссӧ пӧ огӧ ӧктӧй, чиститныс найӧс сьӧкыд, еджыд гоб пӧ сӧмын вотам.

— А кӧнӧсь найӧ? — юала.

— А со ӧти и меным сюри, — шуӧ Зоя копыртчанмозыс, а сэсся: горӧдӧ: — Мӧд! Коймӧд!

Зоялы гобъясыд сюралӧны, а меным оз.

— А меным оз сюравны да, — шогсьышті ме.

— А тэ сюсьджыка видзӧд, — велӧдӧ Зоя. — Найӧ мудерӧсь, шляпаясыс налӧн дзик му рӧмаысӧсь.

Сэсся друг кыдз Зоя серӧктас! Тэ пӧ тальччӧмыд да!

И збыль тальччысьӧма. Шляпасӧ жугӧдлӧма, а кокыс, кыз гӧгрӧс бӧчка кодь, сутшвидзан-сулалан кольӧма. Ах, мися, кватиті, нетшыштны кутлі, да Зоя ӧлӧдіс. Оз пӧ ӧд позь нетшкынытӧ, тшакыслысь вужсӧ тшыкӧдан. Колӧ пӧ пуртӧн вундыны. Сеті жӧ пӧ ме тэныд ичӧтик пурттор.

Та бӧрын еджыд гобъясыд и меным пондісны сюравны. Ӧдйӧ и вотім наберушкаяс тыр. Зэв дӧвӧльнӧйӧсь локтім кашӧварня дорӧ.

— Но ӧні мун котралышт, Юрочка, шойччышт. Ӧні ме ӧтнам нин справитча. Тшак дорас ичӧтика картупель крӧшита, сэтшӧм чӧскыд тшака шыд лоӧ!

— А ме бабӧлы пыр отсала шыдад картупельтӧ крӧшитны, — шуа ме. — Вай тэныд тшӧтш отсышта.

— Да тэ тай зарниа пи вӧлӧмыд! — малыштӧ менсьым юрӧс Зоя и кӧрталӧ морӧсӧ еджыд партук. — Ладнӧ, — шуас, — лоан инӧ тэ меным помощникӧн, помповарӧн!

Картупель шыдӧ крӧшитігтыр ме вомгорулын сьылі: — Зоя пӧвар, а ме поварёнок, кӧть и важӧн нин абу октябрёнок!

Кор став тшакыд и картупельыд лоины пӧртйын би вылын, Зоя пӧрччӧдіс менам вылысь партуктӧ, сетіс нӧк стӧкан, сэсся шуис:

— Сёй нӧксӧ дай котӧрт, ставыслы висьтав, мый час бӧрти ӧбед лоӧ дась.

Горзӧм менам! Видз вывті котӧрта и ставыслы юӧртала: — Регыд ӧбедайтны кутам! Час бӧрти дась лоӧ шыдыд! Эй, кыланныд!

Дерт жӧ и Миша да Сергей дорӧ котӧртлі.

— Сюрис тшакыд? — юалӧ Миша. — Ми кӧсйим жӧ тіянлы отсыштны, шуам, вӧвъясӧс шойччӧдны сувтӧдлам дай пыралам, а ті вотӧмныд нин. Кӧсъян вӧв вылад пукалыштны?

Меным зэв окота вӧлі войялыштны вӧв вылад, но ӧткажитчи. Жаль лои вӧлыс: пӧсялӧма, ном и гут лясӧмны сы вылӧ. Сійӧ коньӧрӧй пыр бӧжнас ӧвтчӧ.

Миша эз ӧбидитчы менам ӧтказ вылӧ. Ладнӧ пӧ инӧ, бӧрти ме тэнӧ вӧв вылас колльӧда пристань дорӧдзыд. А ещӧ кӧсъян кӧ, сабля вӧчам льӧм пуысь пажын кадӧ.

— Кӧсъя, кыдз ог кӧсйы!

Радӧйла ме уськӧдчи Сергей дорӧ.

— Ми вӧчам сабля и пондам будённовецъясысь ворсны! — горза сылы.

Сергей дорсянь бӧр кашӧварня дінӧ, Зоя дорӧ, веськӧдчи.

— Ставыслы юӧрті! Регыд локтасны! — шуа.

— Со ӧд тэ кутшӧм отсасьысь менам вӧлӧмыд. Эн кӧ тэ вӧв, кыдзи эськӧ ме ӧтнаныс? — кутыштліс да мелуйтыштіс сійӧ менӧ. А кор ӧбедайтысьясыд пондісны ошкыны миянлысь тшака шыдтӧ, Зоя пыр и ме вылӧ индіс, Юрочка пӧ ӧд отсаліс меным татшӧм чӧскыд шыдсӧ пуны.

Меным любӧ, мый ошкӧны миянлысь шыдтӧ, нюмвидза. Нюмъялӧ и мамӧ, гортӧ пӧ локтам да ковмас бабыдлы висьтавны.

А гортын ӧмӧй та йылысь сӧмын висьталанторйыс лоӧ! Лунтырнад мыйтӧ и эг удит вӧчны! Ӧбед кадӧ купайтчим Эжваын, и будённовецъясысь ворсім, и льӧмйӧн удитім чӧсмасьыштны. А бӧрас Мишалы да Сергейлы вӧвъяссӧ доддявны тшӧтш отсаси, негр кодь уска дядьӧыдлы кыкысь зорӧд йӧрсӧ курті дай мамӧкӧд куртышті. Велалі дзикӧдз куртныд. Сӧмын вабольяс петісны кикарйӧ.

Рытнас гортӧ мунігӧн и Зоя-пӧварика, и бригадирпу, и Миша Сергейкӧд сёысь закажитісны, аски пӧ ещӧ волы.

А мый, и ветла! Жаль сӧмын Женя абу, пионерскӧй лагерӧ муніс, эськӧ сыкӧд кыкӧн ветлім, вермим на и концерт сетны турун пуктысьясыдлы.