МЕ ЛОИ ПИОНЕРӦН

Урӧк помасьӧм бӧрын миян классӧ пырис пионервожатӧй да юӧртіс, мый Ленин чужан лунӧ кутасны примитавны пионерӧ миян классысь бурджыкъяссӧ.

— Пионерӧ! — ме быдӧн чеччыштлі радӧйла да тувйышті орччӧн пукалысь Катя Чередоваӧс, мися, гӧрд галстукъяс регыд пондам новлыны!

— Тэныд гӧрд галстук? — пыр и чокышсис сійӧ ме вылӧ. Сэсся бырс чеччис да ыкшаа шуис: — Наперво Пыстинӧс огӧ примитӧй-а. Сійӧ век дурӧ урӧкъяс вылын...

— Ме дура?!

— Дуран, — шуӧ Катя ни ӧти падъявтӧг. — Дай перемена дырйи котралан-горзан. И менӧ пыр ӧбижайтан... Ӧні на со сэтшӧма тувкнитін.

— Колантор, ӧбижайтны... — ырыштчылі ме, но век жӧ жугыльмышті, оз кӧ, мися, примитны и, Катятӧ кывзасны да. Но кыла, мышсянь кодкӧ дорйыштіс менӧ:

— Пыстин лызь вылын медбура котралӧ!

— Дай макулатура медся уна чукӧртіс! — шыасис мӧд.

— И велӧдчӧ бура! — горзӧ коймӧд.

Дорйыштісны менӧ да тайкӧ ог бӧрддзы. А пионерӧ пырны сэтшӧм окота, сэтшӧм окота! Лов кутӧмӧн виччыся, мый вожатӧй шуас.

А сійӧ, буракӧ, дӧзмис миян вылӧ:

— Тадзинад кӧ, миян нинӧм оз артмы. Ставныд горзанныд да, — шуис сійӧ и, учительница улӧс вылӧ пуксьӧм бӧрын, восьтіс класснӧй журнал:

— Вайӧ список серти лючки-бура ставнытӧ видзӧдлам. Артёмова Лена, — лыддьӧ сійӧ медводдза овсӧ. — Лена, тэ кӧсъян пионерӧ?

— Кӧсъя, — шуӧ мӧдыд.

— Мый верманныд висьтавны Лена йылысь? Лэптӧй кинытӧ, коді кӧсйӧ сёрнитны, — лабутнӧя вӧзйӧ вожатӧй.

— Лена велӧдчӧ бура. Кывзысьӧ. Ленаӧс позьӧ примитны пионерӧ, — тайӧ Васёк Шустиков кыв босьтӧма, висьталӧ.

— Позьӧ! Позьӧ! — горӧдӧны и мукӧдъяс.

— Гижам, — шуӧ вожатӧй да бара лыддьӧ: — Буткин Юра...

«Уй, ме кӧнкӧ список помас, — думайта ме, — переменаыс помасяс, а меӧдз тадзтӧ оз и воны».

Пырис учительница и мыйын делӧыс тӧдмалӧм бӧрын нюмдыштіс да шуис: — Ме чайта, миян классысь ставныс вермасны лоны бур пионеръясӧн, зільӧны бура велӧдчыны, кывзысьӧны...

Ме кокньыдика ышловзи, мися, тадз кӧ учительница шуӧ, гашкӧ, примитасны жӧ.

Ок, ті кӧ тӧдінныд, кыдзи ме велӧді пионерскӧй клятва!

— Ме, том пионер... Аслам ёртъяс водзын... — Кымын лун и юргис менам гӧлӧсӧй керка тырӧн!

— Шондіа юр, — шуыштас сӧмын бабӧ, — тӧкӧтьӧ ньӧжйӧнджык.

Пионерӧ пыран лун вӧлі праздникӧн не сӧмын меным, но став миян семьялы, и дасьтысим сійӧ праздник кежлас ми ставӧн. Мамӧ выль еджыд дӧрӧм меным ньӧбӧма, вӧччӧдіс праздник асывнас. Бабӧ ноксис кухняын, чӧскыд пирӧг пӧ пӧжала, рытнас пасйыштам Юриклысь пионерас пырӧмсӧ юмов пирӧгӧн да чайӧн. А папа... Папа удж вылас мунігӧн лапкыштліс меным пельпомӧ кисӧ, шуис: — Сиа став бурсӧ!

Примитісны миянӧс пионерад кар шӧр площадь вылын, Ленин памятник дорын. У, йӧзыс мыйта вӧлі! Паськыд дзордзалысь видз вылынӧсь быттьӧ. Гӧгӧр еджыд дӧрӧмъяс да алӧй галстукъяс. А дзик памятник дорас морӧс тырыс орденъяса да медальяса дядьӧяс да тётяяс. Тайӧ войнавывса да уджвывса ветеранъяс воӧмны миянӧс чолӧмавны.

И музыка юргӧ, и горн, и барабан, но медся юргисны миян гӧлӧсъяс, ӧд ми сетім клятва велӧдчыны да овны бура, кыдзи Владимир Ильич велӧдліс:

— Пионер — честнӧй, смелӧй, активнӧй!

— Пионер — став челядьлы пример!

— Пионер радейтӧ удж, сійӧ некор оз дышӧдчы!

— Пионер радейтӧ Рӧдина!

— Пионер пыр дась Ленин делӧ вӧсна нуӧдны тыш!

Та бӧрын миянлы, вӧвлӧм октябрёнокъяслы, кӧрталісны сьыліаным гӧрд галстукъяс. Меным — Петя Забоев, миян звездочкаса вожатӧй. Но, шуас, беринӧсь ныр, кут вылынджык юртӧ, тэ ӧні пионер!

«Ме ӧні пионер!» — тайӧ мӧвпсьыс мышкуӧй пӧсявліс и кӧдзавліс. И кажитчис, мый лэба ме став этайӧ дзордзалысь видз весьттіыс, йӧз юръяс вывтіыс! Ме — пионер! — сьыліс мыйкӧ морӧс пытшкын.

Бӧрыннас ми котӧртім карса улича кузя гортлань и долыда сералім, а вильыш тӧв сідзи и летіс миянлысь гӧрд галстукъяснымӧс.

— Помнитан, — горза ме Женялы, — «Народъяслӧн дружба» ордентӧ тай кор сетісны миян Коми республикалы. Ленин памятник дорад пионеръяс сулалісны часӧвӧйяс моз. Ӧні и ми вермам! Ми ӧні тшӧтш пионеръяс!..