КЫДЗИ МЕ ВИСЬМЫЛІ

Татшӧм мисьтӧмторйыд мекӧд тшук эз эськӧ ло, вӧлі кӧ бабӧ гортын. Но сійӧ муніс Серегов курортӧ шойччыны, и менам артмис кыдзкӧ. А сэсся мамӧ сэтшӧм жӧ, оз куж бабӧ моз садьмӧдныд. Бабӧ радио включитас да кык кыв и вӧлі шуас: «Шондіа юр, зарядка», и ме звирк чеччывлі быд пӧрйӧ, эг некор нюжмасьлы, а сійӧ асывнас...

Энлӧ, лючки-ладнӧ висьтала ставсӧ.

Сійӧ асывнас сэтшӧм неокота вӧлі чеччыны. Лэптылі жӧ эськӧ юрӧс радиоысь зарядка заводитчӧмтӧ кылі да, но, видзӧда да, ывлаыс пемыд на. Мый нӧ, мися, сэтшӧм водз талун зарядкасӧ вӧчӧны, — думышті ме, да бӧр дзеби юрӧс эшкын улӧ. Ещӧ, мися, недыр кӧть куйлышта.

А зарядка, кылӧ, помасис нин, и мамӧ пондіс чуксавны:

— Чеччы, пиук, сёрман школаад!

— Д-да... М-м... — заводиті ме вишкӧдчыны эшкын улад.

— Тэ эн-ӧ висьмы? — Мам инмӧдчыліс ки пыдӧснас менам кымӧсӧ.

— Ой, пӧсь ӧд и эм юрыс! — повзьӧмӧн горӧдіс сійӧ батьлы, а сэсся юаліс менсьым: — Горшыд висьӧ?

Менам эськӧ некыт оз вись, но чӧв ола. И пӧръясьны абу лӧсьыд и чеччыны неокота.

— Коньӧрӧй, бара висьмис. Мыйкӧ тэ менам ӧтторъя висьны пондін, — заводитіс лывкйӧдлыны мамӧ, ачыс меліа малалӧ менсьым юрӧс.

Мыйла нӧ тадз шуӧ — бара пӧ висьмин? Быттьӧ ме частӧ висьла? Куим порция мороженӧй тай коркӧ неважӧн сёйлі да висьмыліс горшӧй, а сэсся эг на некор висьлы. Но мамӧлы кажитчӧма, мый ме частӧ вися.

— Вай ӧні жӧ лекарство ю. И ковмас куйлыны, — шуис сійӧ медбӧрын.

«Куйлыны?» — Ме звирк чеччи вольпась вылысь. — Оз менам некыт вись! — горӧді.

— Со, сійӧ пыр сідзи! Кыдзи лекарство юны, сідзи и оз кывзысь! — дӧзмис мамӧ да шлапкерис аслыс бокъясас. — Саша, тэ кылан? — горзӧ нин батьлы. — Тшӧкты! Тэнӧ кывзас! Хроническӧй ангина лоӧ да сэсся вийсьы сыкӧд!

Ок и ог радейт лекарствотӧ юны! Курыд. Да юны быть ковмис: сэтшӧм зык мамӧ лэптіс.

Юи. Мый керан? Кезйывла да юа.

— Вот и бур, пиукӧй! А ӧні сэсся вод бӧр. Вод, дитя, вод, — меліа сідз пондіс кайтны мамӧ.

Тшӧктӧ кӧ мамыд, быть вод. Воді.

Вӧлись мамӧ лӧнис, инас ӧшйис. Папалы шуӧ:

— Ӧтнассӧ висьысь кагаӧс кыдзи и пондам кольны? Тэ звӧнитлы менам уджаланінӧ, висьтав, пиӧй пӧ висьмис да сёрмыштас мамыс. Поликлиникаӧ тшӧтш звӧнит и. Мед волас врачыс.

Папа кӧсйысис и муніс. А мамӧ вежис менам вольпась вылысь бельёӧс, микробӧсьсӧ пӧ шыбитам, сэсся маннӧй рок пуис, и, медым ме сійӧс азымджыка сёйи, сетіс тшӧтш сьӧд сэтӧрысь варенньӧ. О, варенньӧнад радпырысь панялі роктӧ! Мамӧлӧн радыс!

Медбӧрын сійӧ мӧдӧдчис жӧ удж вылас. Дасысь закажитіс, мед ме ог чеччы вольпасьысь.

Муніс мам, а ме куйла. Лӧсьыд шоныд вольпасяд. А сэсся дышӧдіс жӧ нюжвидзнытӧ. Школаын, мися, пӧди перемена вылӧ нин петісны, думышті ме, и друг сэтшӧм окота лои ывла вылӧ петавны. Чеччи крӧватьысь. Видзӧдлі ӧшинь пыр. Ывлаыс сэтшӧм гажа! Шонді мыччысьӧма, ӧшиньясысь гыӧрыс сывны заводитӧма. Гулюяс жбыръялӧны. Балкон вылӧ быдса котыр пуксисны, кургӧны, сёян корӧны. Ме кватиті няньтор да восьса форточкаті понді шыблавны налы крӧшкияссӧ. А ывла вылас кыськӧ петкӧдчис кыз Андрюха. Даддьӧн шливъялӧ-ислалӧ йи чойті. Завидь лои. Горӧді:

— Андрюш!

Сійӧ чатрасьӧ, бергалӧ, оз гӧгӧрво, кысянь ме сійӧс чуксала. Сэсся аддзис жӧ. А ме сылы бара горза:

— Иславныд лӧсьыд?

— О-о! Юасян! Лӧсьыд, дерт! Лок пет!

— Мем оз позь, — шуа ме, — ме вися!

— Сідзкӧ, лым мачасьыштам! Ме тэныд шыбита, а тэ бӧр меным, — вӧзйис Андрей. Сэсся кватитіс кок увсьыс лым комок и шыбитіс мем. Форточка пырыд, дерт, меным эз веськав, а стеклӧӧ веськаліс! Зильмуніс сӧмын.

— О, ӧні позьӧ петны балкон вылӧ! — дзик пыр и радлышті ме, но мӧд здукас повзьӧм босьтіс: мамӧ мый шуас? Ӧшиньсӧ ӧд жугӧдімӧ!

— Андрюша! Андрюш! — шыала ме повзьӧм гӧлӧсӧн. А сійӧ сулалӧ ӧшинь улын и тільӧ синъяссӧ:

— Ме ӧд эг нарошнӧ... Ме сӧмын тэкӧд ворсыштны кӧсйи. Ы-ы-ы! — лимзӧмӧн бӧрддзис менам другӧй.

— Эн бӧрд, ми шуам, мися, кысук жугӧдіс. Сійӧ пыр гоньялӧ ӧшинь вылын, виж синъяснас дзоръялӧ, гулюясӧс кӧсйӧ кватитны, — такӧда ме мый верма бӧрдысь зонкаӧс.

Андрей здук кежлӧ ланьтліс, нюмдыштліс весиг, а сэсся бӧр дузгысис.

— Оз позь пӧръясьны, — шуис сійӧ. — Ми жугӧдім, а коньӧр каньӧс пинявны пондасны, нӧйтны на вермасны дай. Ме жугӧді, мед менӧ и пинялӧны.

Тӧдінныд кӧ, кутшӧм яндзим Андрюшаысь лоис. И Мурка водзын тшӧтш. Со, мися, Андрюша ичӧтик и эм, а эз повзьы, ассьыс мыжсӧ эз понды кодкӧ вылӧ вештыны, йӧзлысь каньӧс жалитыштіс и. А ме... Да ме — гад! Вот коді! И пӧръячка! И лодырь!

Быдсяма ногыс на эськӧ ме ачымӧс виді да пинялі, но ывлаын друг чилзӧм лыбис. Вӧлӧмакӧ, мамӧ! Аддзӧма жугалӧм балкон ӧшиньтӧ да ойзӧ.

Регыд и доктор локтіс. Сӧмын сылы ковмис мамӧӧс лечитны-лӧньӧдны. А меным, морӧсӧс да мышкуӧс кывзӧм бӧрын, шуис: дзоньвидза пӧ. Асывнас пӧ мыйӧн садьман, колӧ зарядка вӧчны, а не нюжмасьны.

Ме ӧд сідзи и водзті вӧчлі. Асывки ог бара-й нюжмасьныд кут, физзарядка кежлӧ чечча! А ті вӧчанныд зарядкатӧ? Онӧ кӧ, аскисянь тожӧ заводитӧй.