ЖЕНЯЛӦН ПИСЬМӦЯС
Мам-батьыс Женялӧн геологъяс. Быд гожӧм бабыскӧд и кольлӧны сійӧс. А таво думыштӧмны гожся каникул кежлас судзӧдны сылы путёвка пионерскӧй лагерӧ Артекӧ.
Радыс Женялӧн! Да кыдзи нӧ он радлы? Радлан, дерт! Кодлы абу окота Артекад веськавны. И ме эськӧ кыв шутӧг муні, но кысь ещӧ мунан...
— Тэ этайӧтӧ... эн ӧбижайтчы ме вылӧ, ӧтнам муна да, — шуис меным янсӧдчигӧн Женя, — ме тэныд кута быд вежон гижны письмӧ. Быдтор, мый интереснӧйсӧ аддзыла, ставсӧ гижа.
— Гиж, — шуа ме, аслам завидьӧйла муртса и синва оз пет.
Янсӧдчим кык друг быдса тӧлысь кежлӧ. Ме понді виччысьны сысянь письмӧяс. Кыдзи, мый сэн Артекас? Кӧнкӧ, ёна и интереснӧ?!
Первой письмӧыс регыд и локтіс. Чӧлӧй тетрадь! Гортысь петӧм бӧрын мый аддзылӧма да кывлӧма, ставсӧ гижӧма. Ме тӧкӧтьӧ эг скӧр письмӧӧн сылы вочавидз. Вывті жӧ тай, мися, ошйысьӧмыд. Ме ӧд Москватӧ аддзылі жӧ, дай Чёрнӧй море дорад волі. Дерт, Панораматӧ эг аддзыв, эгӧ Севастопольӧ ветлӧй да, Сочиын вӧлімӧ да. Но унатор жӧ аддзылі интереснӧйсӧ. Цирк кыкысь видзӧдім, дендрарийӧ ветлім, и мореад купайтчи пӧттӧдз. Но ӧд ми договоритчылімӧ гижны ставсӧ ӧта-мӧдлы, и менам скӧрлунӧй лаймаліс.
Ошйысянторйыд и менам вежон чӧжнад унакодь чукӧрмис. Ветлімӧ папакӧд Эжва вылӧ вуграсьны. Менам вугырӧ шедіс дзодзув кодь чери. Пап шуис: стерлядь пӧ тайӧ. Сылы эз шед, а вот меным стерлядь шедіс! Тайӧ первой. А мӧд: совхозӧ турун пуктыны кык лун ветлі. Кык выль ёртӧс — Мишаӧс дай Сергейӧс нажӧвиті. Найӧ, кор карӧ воласны, ме дорӧ пыр кутасны пыравны. А ещӧ юӧрті Егор дед кулӧм йылысь. Тайӧс гижигӧн менам весиг синваӧй тёпнитіс кабала лист вылас. Жаль Егор дед. А Рекссянь Женялы тшӧтш чолӧм гижи. Ме ордын ӧні Рексушка олӧ, гуляйтам быд лун. Менӧ кывзысьӧ. Ме зэв рад, мый Ухтаас эз босьтны Рексӧс, всё равно эськӧ найӧ кодлыкӧ вузалісны: оз радейтны понъястӧ. Мӧд письмӧ Женясянь эз вӧв ёна интереснӧй, гижа пӧ карантинсянь, карантин вылын пукӧдӧны, кынӧмӧй висьмис да. Ме пинялышті сійӧс, мися, гашкӧ, китӧ мыськытӧг сёйин да, дерт, кынӧмыд висьмас.
А коймӧд письмӧ локтіс да чуть ог тшӧкмун завидьӧйла. Гижӧ, настоящӧй военнӧй корабль линкор вылын пӧ вӧлімӧ, военнӧй морякъясыд аддзысьлімӧ. Позьӧ пӧ вӧлі корабляс быд каютаӧ пыравны, быдлаті чутӧдыштны, весиг руль саяс пукалыштны.
Женя медся ичӧт веськалӧма найӧ отрядӧ, ӧтнас 3-ӧд классьыс, мукӧдыс — 6-ӧд да 7-ӧд классаяс. А отрядыс Женялӧн шусьӧ «Морскӧйӧн». Сэні пӧ, Артекас, сэтшӧм отрядыс вит, и ставныслӧн налӧн разнӧй нимъяс. Кодлӧн «Цветочнӧй», кодлӧн «Леснӧй», кодлӧн «Морскӧй» и сідз водзӧ.
Женя гижӧ, тӧдмаси пӧ асланым отрядса став пионеръясыскӧд нин. Эмӧсь рочьяс, украинецъяс, киргизъяс, весит болгаръяс да немецъяс. А Артуркӧд пӧ, сьӧд синъяса и смоль сьӧд кудриа юрсиа, дзик ичӧтик Пушкин кодь болгарскӧй зонкакӧд тӧнлун ӧтлаын дежуритім столовӧйын и матӧджык нин тӧдмаси. Ме пӧ сылы висьталі, мый миян Коми муын олӧны уна болгаръяс. Артур та йылысь тӧдіг шусьӧ, дядь пӧ менам сэні уджалӧ. Артур зэв рад лоис мекӧд тӧдмасьӧмысь. Ме сылы висьталі и тэ йылысь, эм, мися, менам гортын бур друг, Юра Пыстин. Артур обязательнӧ кӧсйис волыны миян Комиӧ и тэкӧд тшӧтш тӧдмасьны.
Ещӧ Женя гижӧ, регыд пӧ главнӧй площадка вылас, Карстӧвӧй площадкаӧн шусьӧ, лоӧ встреча космонавт Титовкӧд. А аски пӧ бутылочнӧй почта пондам мӧдӧдны. Гижам пӧ письмӧ, сюям сулея пытшкӧ да лэдзам мореас. Сетісны задание думыштны, кодлы кутам гижны письмӧсӧ и мый гижны. Ме пӧ эг на думыштлы, рытнас пӧ вода да унмовсьтӧдз и думышта. Женялысь письмӧсӧ лыддьӧм бӧрын и ме думыштчи: а, мися, меным кӧ сетісны татшӧм заданиесӧ, мый эськӧ ме гижи? А сэсся думайті, думайті, дай решиті. Гижи эськӧ ме: — Вайӧ тӧдмасямӧй, пондам дружитны! Пасйи эськӧ ассьым ним-овӧс, адресӧс. А мый унасӧ гижны, и сідз ставыс гӧгӧрвоана. Дружитны — сідзкӧ радейтны, отсасьны ӧта-мӧдлы. Кыдзи ми Женякӧд дружитамӧ. Тайӧ ӧмӧй лёк? Ме чайта зэв бур, ставыс кӧ миян моз ёртасисны. А ті кыдзи чайтанныд? Гижӧй меным, Юра Пыстинлы.
