ГОРТ ОЛЫСЬЯС

Миян суседка тётя Маша частӧ менӧ чукӧстліс ичӧтик нывка Катенькаыскӧд ворсны. Лок ворсышт, шуас, пукалышт Катенькакӧд, бур пи, ме магазинӧ котӧртла или сэн почта вылӧ. Могыд тай сулӧ быдлаӧ.

Мем кажитчыліс Катенькаясын. Налӧн уна мича дзоридз, стенас картинаяс и, главнӧйыс, зарни черияс аквариумын и кык мича попугай клеткаын. Ме некор эг ӧткажитлы тётя Машалы. А сійӧ луннас зэв эз вӧв окота. Кӧсйысим Женякӧд лыжиӧн иславны петавны. И колі жӧ, чукӧстісны.

— Петас, петас, пукалыштас, — пока ме падъялі да думайті ӧткажитчан кывъяс, сы кості бабӧ менӧ и вузаліс.

Бабӧ кӧ кӧсйысис, быть пет. Босьті рисованиеысь тетрадь, краскаяс, мися, кӧть рисованиеысь гортса удж сэн вӧча, и петі.

Катенькалӧн радлӧм! Кекӧначасьны кутіс. Юрик пӧ локтіс, ворсны кутам!

— Кутам, — шуа ме, а ачым думайта: Женя иславны кутас, а ме тэкӧд тан пукав.

— Юрочка, мыйысь тэ ворсны кӧсъян? — дзользьӧ водзӧ нывкаыд. — Давай детсадйысь! Но, Юрик? Первой вӧчам зарядка. Раз-два! Раз-два! Вӧч кинад ме моз жӧ!

— Мун, тэнад зарядкаӧн и быдӧн! Зарядкасӧ ӧд вӧчӧны вольпасьысь чеччӧм бӧрын.

— Но инӧ, огӧ кутӧ зарядка вӧчны. Вай ворсыштам тӧнъя мозыд «шырӧн-каньӧн»! Тэ быттьӧ шыр, ме быттьӧ кань! Но, Юрик?

— Ладнӧ-ӧ, давай! — дышпырысь кӧсйыси ме. — Пышйы, тэ шыр! Сӧмын удитіс Катенька воськов-мӧд вӧчны, кань сійӧс тшапкис-кутіс.

— Тэ он куж ворсныд да! — дӧзмис нывка. — Вай выльысь. Каньыс ӧд первой узьӧ. Куткыртчы, кунь синъястӧ.

Ме кывзыси сылысь. Пукси улӧс вылӧ, шуа: — Мун котрав, узя нин.

Катенька малыштіс менсьым синъясӧс, прӧверитіс збыль узя ог да заводитіс котравны. Пыраліс крӧвать улас, дзебсьыліс шкап сайӧ, тотшӧдыштіс кияснас джоджас: — Тані зэв уна шыдӧс, шыръясыд радейтӧны ӧктыны шыдӧстӧ, а этані нянь, и няньтӧ йирыштісны... — шуаліс ачыс джоджӧ тотшӧданмоз. Сэсся кыйкъялӧмӧн муніс кань дорті да пондіс кавшасьны пызан вылас.

— Катенька, да тэ пызан вылад кокъяснад каян да! — горӧді ме.

— А шыръясыд быдлаті ветлӧны, — вочавидзӧ сійӧ да скӧрмӧ ме вылӧ: — Тэ вед кань. Мыйла сёрнитан? Узь на!

— Ме садьми нин.

— Садьмин кӧ, «няв» колӧ шуны, — велӧдіс Катя.

— Няв! — горӧді ме да уськӧдчи сы вылӧ, куті. Шошаӧдыс вайӧді улӧс дорӧ, шуа: — Ӧні тэ кань. Ме шыр лоа. Топыда кунь синъястӧ и узь. Дыр узь!

— Куни нин, — шыасис Катя да содтӧд кикарнас личкис синсӧ.

Ме, дерт, шыравны эг и думайт. Муні пызан дорас, понді дасьтысьны рисуйтчыны. Гортса удж, мися, вӧчтӧм, а тэкӧд понда ворсны.

Тайӧ здукас кодкӧ ӧдзӧсас звӧнитіс. Ме уськӧдчи восьтыны, чайті тётя Маша бӧр бергӧдчӧма. Но тайӧ эз вӧв тётя Маша. Тайӧ вӧлі Женя.

— Юрочка, Юр! Коді сэні? — кылӧ горзӧ Катенька, но куткырвидзанінсьыс эз вӧрзьы и синъяссӧ век кикарнас кутіс.

Женялы ме шуи, мися, виччысь, регыд локта и пӧдлышті ӧдзӧсӧс, а Катенькалы жӧ сійӧ юалӧм вылӧ вочавидзи: — Женя Синицын тай.

— Сійӧ тшӧтш кӧсйӧ шырсьыд-каньсьыд ворсны? — юалӧ Катя. И друг меным юрӧ кучкис мӧвп: а мый кольла кӧ Катенькаӧс здук-мӧд кежлӧ ӧтнасӧс? Пырысь-пыр жӧ и аддзи петан туйсӧ. Шуа Катюшалы:

— Ме ог куж шыравнытӧ. Тэ ичӧтик, тэ и ло шырнас, а ме кань бӧр лоа!

Катенька мудзис куткырвидзныд, сійӧ и рад, мый котралыштны позьӧ. Дзик пыр сӧгласитчис: — Давай! — и пондіс кок чунь йылас котравны.

— Няв! Няв! — стрӧга шыаси ме и уськӧдчи шырыд вылӧ. Тшапки-куті. — Ням-ням... сёйи ме тэнӧ. Тэ ӧні кулӧмыд, абу нин ловъя, — шуала ме Катялы да кыска сійӧс улӧс дорӧ.

— Пыр улӧс улас и эн вӧрзьы, тэ кулӧмыд.

Нывка зэв зіля кывзысис, пырис улӧс улӧ, водіс. — Ме кулі, — вашнитіс вомгорулас.

Ме ӧдйӧнджык ӧдзӧслань.

— Тэ кытчӧ, Юрик? Ме тэкӧд тшӧтш! — Катенька лэптіс юрсӧ и заводитіс кыссьыны улӧс улысь.

— Йӧюк, ми жӧ сідзи ворсам! Ме кань, тэ шыр. Ме тэнӧ сёйи, тэ кулін. А ме нӧшта на кӧсъя шыръяссӧ кутавны. Тэ жӧ аддзылін — Женяыд пышйис, сійӧ шыр жӧ, муна сійӧс кута.

И уйкниті. Чайті, и збыль нывкаыд улӧс дорад куйлыны кутас.

Эг эськӧ и дыр ветлы. Недыр Женя бӧрысь сӧмын котралышті.

Пыри — тӧкӧтьӧ ог ымӧст! Катенька бубуля кодь, усъяс аслыс вӧчалӧма, пукалӧ пызан саяс и малсйӧ-рисуйтӧ менсьым тетрадьӧс!

— Тэ мый керан?! — горӧді ме сы киысь кисточкаӧс кватитанмоз.

— А шырыд ловзис! А шырыд ловзис! — сӧмын и воча кыв долис меным нывка.

— Ме тэныд сета «шыр»! Мыйла пакӧститін тетрадьсӧ?!

— А шыръясыд пыр пакӧститчӧны, — вочавидзӧ нывка.

Мый эськӧ сылы сэтчӧ шуан? Шлёпӧдны эськӧ кӧсйи, да эг нин. Ачым ӧд мыжаыс.

Регыд воис тётя Маша. Суис миянӧс рисуйтчанінӧ. Катенька туй кузя гӧгыльтчысь кӧлӧбӧс рисуйтіс, а ме пашкыр бӧжа ручӧс ещӧ содті.

Аттьӧ шуис тётя Маша меным и Катенькалы, бура пӧ горт олінныд да.

А рисуйтчан тетрадьӧс ставнас лои козьнавны Катенькалы.