ЭН НЕСЪЯВ

Василёкӧс талун мамыс эз ну детсадъяс. Несъялан пӧ да ов гортын, висьман дай мат тэкӧд лоӧ. Бабыд со висьӧдчӧ и...

Мамыс муніс удж вылӧ, баб-внука кольччисны. Ворсыштісны дуда-будаысь да мый да. Бабыс мудзис, кайис паччӧр вылӧ. Василёк видзӧдыштіс гыӧрзьӧм ӧшинь пырыс ывлаас дай сэтшӧм гажтӧм сылы лои.

— Бабӧ, ывлаӧ кӧсъя, гуляйтны кӧсъя!

— Сӧтанникыс, дӧзмӧдчӧ, муртса ойбырті да. Эз тшӧкты мамыд, ворс гортын!

— Ме здук кежлӧ сӧмын, кильчӧ помӧдз сӧмын.

Клянчитіс ӧд, нормӧдіс бабсӧ мудер зонкаыд.

— Петыштлы инӧ, лолышты, — сӧгласитчис бабыс. Пасьтӧдіс питорсӧ, шоныд чышъян на кӧрталіс шапка вывтіыс дай лэдзис ӧдзӧс мӧдарас.

Сулалӧ тӧбсьӧм Василёк кильчӧ помас. А сэні Зина да Катя, кык пӧдруга, воӧмаӧсь нин школасьыс, исласьны петӧмаӧсь.

— Василь, мый кильчӧ столбтӧ пыкан? Лок миянкӧд исласьны! — чуксалӧны нывкаяс.

— Мем оз позь, ме вися. Дай даддьыс абу менам, — шуӧ Василёк.

— Ой, дадь пӧ абу! Лок ме тэнӧ ислӧдла! — корӧ Катя.

— А мекӧд быттьӧ оз позь? — чушкӧдӧ парсӧ Зина. — Тэнад и даддьыд со бӧртӧм.

— Но и мый, бӧртӧм кӧ?

Тайкӧ венӧ воасны пӧдругаяс, да Василёк мездіс: поезд пӧ вӧчам.

— Поезд, поезд! Збыль вай поезд вӧчам! — Ӧти кывйӧ воисны нывкаяс да ӧдйӧ йитісны дадьяссӧ.

— Пуксьы, Василёк, тэ лоан пассажир! Шор чойӧ мунам. Ок, сэні лӧсьыд! Кыр горулыс исковтан да самӧй шор дорӧдзыс даддьыд нуӧ.

Медводдзаысь исковтігас сідзи и артмис. А мӧдысьсӧ пӧперегасис поездыд дай ставӧн тутісны лым пытшкас. Нывкаяслы мый, ваксьӧны-сералӧны да пыркӧдчӧны. А Василёклы нырас и вомас лымйыс пырӧма, видлы татшӧма тӧбсьӧмнад пыркӧдчыны. Чушкӧдіс парсӧ:

— Уськӧдінныд... Ог сэсся тіянкӧд ворс. Исласьӧй, колӧкӧ, асьныд.

— Он кӧ и... Сулав сэн!

Нывкаяс со чой горув нин шуркнитісны. Василёклы забеднӧ. «Сытӧг исковтісны! Но и мед! Ме лым питіыс собавны кута!»

Пурс-пурс, небыд лымйӧдыс лӧсьыд собны! И мун кытчӧ кӧсъян, со тай и шорыс дзольгӧ! Абу кынмӧма!

— Шор! Шор! — горзӧ Василёк да пӧрччӧ кепысьсӧ, медым шор ванас ворсыштны. Воськов на вӧчис, и вӧйи кокыс. Гӧгӧр ойдіс ваӧн.

Чилзӧ Василёк, а петнысӧ оз вермы, пленӧ шедіс.

Нывкаяс кылісны горзӧмсӧ, уськӧдчисны сы дорӧ.

— Ак тэ, Василёк, ак тэ, дурачок, мыйла нӧ ваас пыран?!

— Ме эг нарошнӧ, — лимзӧ зонка.

— Ланьт вай, тупкы вомтӧ, ракаяс со лэбалӧны, вомад пырасны! Ӧдйӧджык колӧ гортад мунны. Сулик ва гынкӧмыд! Прӧстудитчан!

Кыскисны нывкаяс Васильӧс ваысь, пуксьӧдісны даддьӧ, мӧдісны навыскокавны сиктлань. Чӧла пукалӧ Василёк, оз лимзы ни дзирнясь, дрӧжжитӧ сӧмын.

Со и керка дорас воисны. Чеччӧдісны Васильӧс дадьсьыс, сувтӧдісны кок йылас.

— Сулавнысӧ верман? А гортад пырны?

— Верма, верма! — горт дорад воис да збоймыштіс зонка. — Менӧ ӧнтай несйӧдліс, а ӧні ог несъяв.

Туп-тап, кӧсйӧ вӧчны Василёк воськов, да турдӧма кӧмыс, оз сет места вывсьыс вӧрзьыны. Сойбордйӧдыс кыскӧмӧн и пыртісны нывкаяс Василёкӧс гортас.

Бабыс повзьӧма, ӧтторъя шлапкӧдӧ киясӧн: — А сӧтанник тэ... Эг вед кӧсйы лэдзны да...

— Нинӧм, бабӧ, ставыс бур лоӧ, — тапкӧдӧны пӧрысьӧс нывкаяс. — Весиг несъявны дугдіс Василёкыд. Пӧрччысь вай, Василёк!

— А кӧмыс шедас кокысь?

— Шедас. Мыйла нӧ оз шед? Кыскам вед! Бабыд косьтас пачад. Аски бара на шор чойӧ лэччылам!