ЫДЖЫД ЛУН
Танюшка садьмис нин, но дыш вӧлі чеччыныс да сідз куйліс вольпасяс. Помӧй ведраӧн пырис пӧчыс, шызьӧдіс керка пытшкӧссӧ:
— Танюшкаӧ, тэ тай нӧ век на узян! Толикыд батьыскӧд важӧн сарайӧ гычан ^гытсан/^ ӧшӧдны петісны-а. Вунӧдін ӧмӧй: Ыджыд лун талун. Поснияслы качай лун.
Танюш звирк чеччис, тэрыба мӧдіс пасьтасьны:
— Ой, ме пета видзӧдла!
Кӧмтӧм кокнас и ризӧбтыны дась нывкаыд, да пӧчыс кутыштіс, сывъяліс да окаліс шоныд бандзибсӧ внучкаыслысь, «Кристос вӧскресе» шуис дай вӧлись лэдзис:
— Петав инӧ, да кокад мыйкӧ сюй, эн сідз пет.
Кашкигтыр пырис Толик, шапкаыс киас, ӧвтчӧ сійӧн, юӧртіс:
— Лёняӧс чукӧсті! Шурикӧс...
— Но-о, удитін нин? — шензьыштіс пӧчыс.
— Ме ӧдйӧ тӧвзьыштлі...
Таня чушнитіс парсӧ, бугжыльтчыліс вокыс вылӧ:
— Шурикыс нерсьӧ пыр, сійӧс эз ков корны.
— А коді ӧддзӧдны кутас? Шурикыс — медся ён! — пыксьыны кутіс Толик.
Эз сетчы и чойыс:
— Ми асьным. Галкаӧс кора, Катяӧс.
— Да-а, ті няргысь нывкаяс сямманыд мыйкӧ! Колӧ вед качнитчыны вылӧ-вылӧ! Улӧсӧ ачыс качайыс лайкнитчас, а вылӧсӧ бара на выныштчыны колӧ!
— Но и мый? И качнитчам! — дэльӧдчыштіс чойыс.
Пӧчыслы ковмис суитчыны на костӧ:
— Энӧ кӧть венӧ воӧй, чоя-вокаяс, вежа лун талун. Ставныдлы тырмас, ставныд тӧранныд. Бурджык, пӧрччысьӧй да пуксьӧй пызан сайӧ. Мамыдлӧн самӧвар дась, пӧсь нянь петӧма, вежа нянь пӧжалыштім и. Сёйыштанныд да петӧй, сэсся лунтыр кӧть качайтчӧй Тіянлы гажа ворсӧм и лоӧ...
Лун шӧр кад кежлӧ чоя-вокалӧн сараяс чукӧрмӧма посни гӧстьыс унакодь. Нарошнӧ Толик лыддис, да кӧкъямыс ӧкмис. Шурик ассьыс ичӧтик чойсӧ, Анечкаӧс, вайӧдӧма, дай Катя абу ӧтнас, Сергунчик вокыс тшӧтш сулалӧ зонпосни пӧвстас. Сійӧс и медводз пуксьӧдісны гычан пӧв вылас, самӧй шӧрас, орччӧн Танечка да Катя сӧлісны. Кутчысьӧй пӧ асьныд гезъяс дай Сергуньсӧ кутӧй, мед оз усь, велӧдісны Толик да Шурик. Асьныс сувтісны гычан пӧв ӧтар-мӧдар помас да кутісны качайтны.
Качмуніс гычаныс, а сэсся мӧдіс лайкъявны. Первойсӧ чилзӧмыс вӧлі пукалысьяслӧн и ортсын сулалысьяслӧн. А сэсся велалісны да Таня Катякӧд сьывны босьтчисны.
«Вӧрын чужис ёлочка» дум выланыс усьӧма, да Шурик вомалыштіс найӧс, абу пӧ ӧд Выль во.
Падмыштлісны нывкаяс. Сергуньыс на и мездіс найӧс: «Пызйӧн кывтатӧ пӧ вай сьыйыстам».
Серӧктісны ставныс да шушкыль кывлысь вӧзйӧмсӧ и горӧдісны. Гычанын пукалысьяс и коді эз тӧр гычанас. «Кывтам-кывтам Эжва вывті-и...»
Коді на и тӧдас, кодлы лӧсьыдджык вӧлі тайӧ здукас — гычанын пукалысьяслы али сарай пасьта котралысьяслы? Патурликасисны найӧ сарай пельӧсас кос турун пытшкын, шуркнитлісны восьса звӧз ӧдзӧсті ывла вылӧдзыс, дзользисны, чилзісны лэбачпиян моз.
На бӧрся син да син колӧ. Пӧчыс тӧдіс тайӧс да раз-мӧдысь нин петыштліс сараяс. Гычанӧ выльяслы отсаліс пуксьыны, кодсюрӧлысь ныр увнысӧ нагруник бӧждорнас чышкыштліс да збодера кайтіс:
— Со ӧд, со ӧд, бобукъяс! Гажыс тіянлы! И ми ичӧт дырйи тадз жӧ... Ӧчередьӧн, ӧчередьӧн вежласьӧй... Мед ставныд пӧттӧдзныд качайтчанныд...
Танюшӧс, Катяӧс да Сергуньӧс джоджас лэдзисны, на местаӧ пуксьӧдісны Леняӧс да Галяӧс, а коймӧд местаыс тыртӧм лои. Анна тьӧтка жӧ Ванюшсӧ вайліс! Кӧн нӧ сійӧ? Регыд на патурликасис кос турун вылас да!
Ичӧтик Галюк мыйлакӧ бӧр пондіс лэччыны джоджас.
— Галюк, тэ мый? Исясьны, гашкӧ, кӧсъян?
Галюк нем шутӧг тапиктӧ мӧс сёӧдчан лясни дорас да индӧ чуньнас уліас, карталань:
— Сэні сійӧ.
— Сэ-э-ні-и?! — шай-паймуні пӧчӧ. Уськӧдчис ляснилань, видзӧдліс увлань — некод оз тыдав. Мӧскыслӧн баксӧмыс сӧмын кылыштіс.
— Господи... Ванюш! Ванюш! Тэ кӧні? Кылан менӧ?
Гузь чукӧрмисны лясни дорӧ и челядь, горзӧны: «Ванюш!»
Лясниын туруныс быттьӧкӧ вӧрзискодь. А сэсся и еджыд юрыс мыччысис, усигас шапкасӧ воштӧма. Гӧлӧсыс кыліс и:
— Ме вед эг нарошнӧ... Ми Галякӧд ворсім-ворсім...
— Эз некыт доймы? — юасисны челядь, а пӧчӧлӧн пос нин дась.
— Толик! Шурик! Ті мукӧд бӧрсяыс видзӧдӧй, а ме, час, лэччыла!
Регыд и пӧчыд Ванюшӧс мездіс лясни пленсьыс, сӧмын шапкасӧ корсьны Толик да Шурик мӧдысь на лэччылісны картаӧ.
Ванюш чушкӧдӧма парсӧ, дузгӧдчӧма да код вылӧ кӧ норасьны зільӧ:
— Дыр эз пуксьӧдны качаяс да...
— Сійӧн инӧ и лэбыштін увлань юрӧн? — сералӧны челядь.
— Гыйкнуис туруныс да...
— Абу тай доймӧма. Мед лэбыштліс кӧ! — воштылӧм шапкасӧ Ванюшлы юрас пуктігмоз стрӧгакодь шмонитыштіс Шурик, а Толик содтіс: — Лётчик лоӧ, космонавт! Пуксьы качаяс, самӧй шӧрас, да ёна кутчысь. Энлы, ми Шуриккӧд тэнӧ лэбӧдлам сарай йирк дорӧдзыс!
Пӧчӧ кевмысьыштіс:
— Энӧ, пиукъяс, эн Ванюшсӧ ӧбидитӧй. Ньӧжйӧник...
— Да ми шмонитам, пӧчӧ! Вай тэ тшӧтш пуксьы Ванюшыскӧд. Ньӧжйӧник и пондам лайкйӧдлыны, — корны кутісны Шурик да Толик. Танюш внучкаыс и мукӧд челядь дзайгыны кутісны и:
— Пӧчукӧс, пӧчукӧс тшӧтш пуксьӧдны!
Пӧчӧ ышловзис, сывтыръяліс матігӧгӧрсаяссӧ, кайтыштіс:
— Эштіс, дитюкъяс. Менам кадыс кольӧма. Меным и гычантӧгыс долыд. Тіянлы кӧ гажа и. Ванюшӧс со Енмыс видзӧма доймӧмсьыс и.
Пажын кадӧдз сэсся сідзи и эз эновтлы пӧчӧ сарайсӧ. Челядькӧд ноксис. Нуръясян кад локтіс, пӧсь шыд сёйны ставнас аравасӧ керкаас пыртіс.
Танялы да Толиклы радыс!
— Миянын та мында гӧстьыс некор на эз и вӧвлы! Мед и гажа лоас ставнымлы! Телик на ӧзтам да мультик видзӧдыштам и, — бергаліс джодж шӧрас Таня да радліс медъёна.
