ЧУЖАН ЛУН

Мишук Оверин олӧ карын. Сентябрь 5-ӧд лунӧ тырӧ сылы сизим ар. Сиктса бабыслы гижӧма письмӧ, корӧны именник ыдждӧдлыны.

— Ой, дзик некор! — Маитчыштіс Таись баб письмӧсӧ лыддьӧм бӧрын. — Картупель керан кад локтӧ дай вӧрӧ на тшак да пув вотны колі тапиктывны. Но корӧмаӧсь, да быть нин ковмас ветлыны именниктӧ ыдждӧдлыны. Ӧтчыд овлӧ морт олӧмас сизим арыс, школаӧ, первой классӧ мунан воыс. Ачыс на со Мишук письмӧас тшӧтш каракуля киподсӧ пуктылӧма да: «Бабуль, волы тшук».

Мӧд лунас жӧ Таись баб тэчис пестер тыр гӧснеч, вышивайтӧм сулӧкӧн гартовтіс «Висер вожса мойдъяс» да «Сё коми сьыланкыв» — кык важ коми книга, тшӧтш найӧс сюйис пестер вомас дай петіс туйӧ.

Автобус чожа таркӧдӧ-нуӧ карлань, а Таись пӧч оз-оз да бара и маитчыштас, кыдзи нӧ пӧ именниксӧ понда чолӧмавны? Колӧ кыдзкӧ лӧсьыдджыка да тешкодьджыка, мед дыр кежлӧ паметяс кольӧ.

Со и кар да Мишукъяслӧн патераыс. Керкаын гажа шум, ворсӧ музыка, зонпосни, Мишуклӧн ёртъясыс, воӧмаӧсь нин гӧститны, именник другсӧ ыдждӧдлыны, котралӧны да ворсӧны ковёра джоджас. Пи-моньыс кухняас ноксьӧны, дасьтӧны гӧстьясыдлы праздничнӧй пызан.

Пырис Таись пӧч, сувтіс порог дорас, пернапас чӧвтіс, чолӧм-здорово шуис. Мышку саяс сылӧн пестер, киас бедь — бедьтӧгыс пӧрысь мортыд эз лысьт туяд петны — юрас мича дзоридзӧсь чышъян, кокас сера чулки да югыд галош.

Аддзисны татшӧм гӧстятӧ пи-моньыс, уськӧдчисны паныд, мамук дай матушкаӧй пӧ локтӧ! Лок, лок, пӧрччысь, шойччы, шонтысь. Кузь кокыд вӧлӧма, самӧй пызан дасьтам.

Таись пӧч оз на тэрмась шыбитны пестерсӧ да паськӧмсӧ, горакодь, мед и жыръяс ворсысь внукыс кылас, кайтыштіс:

— А именникыд нӧ кӧні? Оз тай нӧ встречайт-привечайт бабсӧ? Ачыс письмӧӧн корӧма-а. Лок пӧ, бабук, тшук. Да сэтшӧм мичаа на и гижӧма! Любуйтчи да любуйтчи сійӧ каракульясӧн, шаня жӧ, мися, кӧнкӧ, пессис да старайтчис грамотейыд.

Кылісны гора гӧлӧссӧ бабӧлысь жырйын ворсысь челядь, дугдісны патурликасьны, кывзысьыштісны. Ӧти шырпи кодь зонка бырс петыштліс жырсьыс, бӧр тюрс пырис, кылӧ, юӧртіс ёртъясыслы:

— А сэні яга-баба воӧма!

Жыр ӧдзӧс дорӧ пыр и мыччысисны куим-ӧ-нёль чужӧм, шешъялӧны да видзӧдӧны баба-яга вылӧ.

Мишук тӧдіс Таись бабсӧ, нюммуніс, но эз сибӧдчы бабыс дорӧ ни чолӧм эз шу. Таись пӧч шылькнитіс ки пӧвнас чужӧмсӧ, лӧсьӧдыштіс чышъянсӧ, шыасис:

— Мый нӧ, Мишук, тешкодь бабыд? Эн тӧд менӧ? Ме ӧд тэнӧ, ыджыд питорйӧс, эг жӧ пырӧн тӧд! Быдмӧмыд да сӧвмӧмыд, со нин и сизим арӧс тыртан, школаӧ ветлан! Кыдзи нӧ тэнӧ дзик пырӧныс тӧдан? Чужан лун вылад корӧмыд да, тэрмаси да тэрмаси, этайӧ сивко-бурко чибӧсӧ пос помысь кватиті, сы вылӧ сӧлі, швачниті плетьӧн. Чибӧ тай «ий-йо!» горӧдіс да кыккокйыв сувтліс!

Таись баб татчӧ сувтыштліс, тотшӧдыштіс бедьнас джоджӧ, водзӧ сяркӧдіс, заводитас кӧ, сылӧн, майбыр, артмӧ, вежӧрыс уджалӧ, кывйыс ворсӧ:

— Скачиті да скачиті, рӧдті да рӧдті, навыскокалі да навыскокалі, вуджалім и сёнӧд нюръяс, посни ёльяс, визув юяс, джуджыд гӧра вомӧн чеччыштім. Гӧра йылас тайкӧ орел-лэбач синмӧс оз кокышт, ӧчкиасьны удиті да «кыш!» горӧдны, визув ёль дорын тюпель пӧлӧс муртса эг вӧйт...

— Пӧръясян, бабӧ, пӧръясян! — Сералӧ Мишук да кутчысьӧ бабыслы беддяс. — Бедь тайӧ, а абу чибӧ! И гӧраясыс тані абуӧсь. Вот! Урал гӧра эм, да сійӧ ылын...

Бабыс серамсӧ кутны оз вермы, кинас вач-вачкерис, ошкыштіс внуксӧ:

— О, да тэ тай, Мишукӧ, олан гажӧй менам, збыль нин школьник! Урал гӧра тӧдан!

— Тӧда, ме быдтор нин, бабӧ, тӧда! Лыддьысьны кужа и. — Бабыс дорӧ Мишук сэтшӧм меліа ляскысьліс, а сэсся кевмысяна-дзайгана синъясӧн пондіс видзӧдны бабыс вылӧ: — Он эскы, бабӧ? Кужа, мися!

— Да-а, Мишаыд збыль кужӧ нин. Ми ставӧн нин кужам, — отсыштісны ёртъясыс Мишуклы, тшӧтш эскӧдісны.

— Но и бур! Но и бур пиян, роч баяр кодьӧсь мичаӧсь, Пера-багатыр кодьӧсь тӧлкаӧсь да шаньӧсь, — бабӧ ставнысӧ малыштіс юрӧдыс, вӧлись мыш сайсьыс лэдзис пестерсӧ, сьылӧмӧн моз нюжӧдіс: — А зря ӧмӧй нӧ бабыс пестер тыр козинсӧ тіянлы вайис? Нолтӧ вай видзӧдлам, мый сэні эм?

Таись пӧч пондіс разьны пестерсӧ да сьылыштіс: — Пестерӧй, вай воссьы, вай воссьы! — Но пестер кӧвйыс эз на и другӧн сетчы да бабӧлы ковмис кӧвсӧ разялігмоз бара на варовитыштны.

— Эм сэні быдтор, — кайтыштіс, а сэсся бара на аддзысисны колана кывъясыд: — Эм быд чӧскыдыс, эм быд юмолыс, эм быд курыдыс, эм быд солаыс! Черинянь, тшака нянь, лукъя нянь, пувъя нянь, азя нянь, кока нянь, пызя тшӧг да гырнич нӧк... — Сяркӧдӧ бабӧ, кывзӧй пӧ кодлы колӧ.

Козин вылад челядь горшӧсь, кытшалісны бабӧс, сідзи и синъяснас сёйӧны-видзӧдӧны пестер вомӧ. Медбӧрын разьсис жӧ кӧвйыслӧн гӧрӧдыс. Восьтіс бабӧ пестерсӧ, кыскис сэсь вышивайтӧм сулӧкӧ гартыштӧм тубрассӧ, кагаӧс моз качйӧдлыштіс ки йылас, кайтыштіс лӧсьыдика:

— Но медся мусаыс, медся дона козиныс со тані, этайӧ ки чышкӧд пытшкас. «Зарни чери» мойдын моз жӧ комын куим во видзи, комын куим во берегиті да краниті, мед тайӧс кычан оз косяв, кыстур оз парсав, лякӧсь кекӧнь оз чабрав. Ноко, баяр пиян, висьталӧй, мый тані менам? Нӧдкыв сета, юрнытӧ песыштӧй: кышӧма кыз коркаӧн, койӧма зарни шыпасъясӧн, баситӧма югыд серпасъясӧн. Вот татшӧм нӧдкыв. Тӧдмалӧй.

Зонкаяслӧн синъясыс кодзлалӧны, ӧта-мӧдыскӧд вашкӧдчӧны, тӧдмалӧны нӧдкыв.

— Ме тӧда! Тані торт! — горӧдіс ӧти.

— Кампет кӧрӧбка!

— Печенньӧ пачка!

— Няклялан резинка!

Сідзи и пондіс киссьыны челядьлӧн. Бабӧ тракйӧдліс юрнас. А сэсся терпенньӧыс быри, горӧдіс: — Эн тӧдӧй, эн тӧдӧй! Ок ті чирукъяс, грамотейяс! Со тані мый! — Разис бабӧ кӧртӧдсӧ, мыччысисны кык ыджыд книга. Кышӧд дорышъясыс налӧн бонзьӧмаӧсь, серпасъясыс чусмӧмаӧсь, но шыпасъясыс бура на тӧдчӧны.

— Фу, тайӧ важ книга да!

Зонкаяслӧн синъяссьыс дзирдыс быри, вомъяссьыс нюмыс сылі, но век жӧ книгаяс пондісны вуджны ӧти кисянь мӧд киӧ.

— Мый гижӧма, весиг он гӧгӧрво.

— Английскӧйӧн тайӧ гижӧма.

— Ми огӧ на велӧдӧй английскӧйсӧ.

Мишук киӧдз воис книгаыд да пондыліс лыддьыны: — С... Е... К-О-М... И...

Но сылӧн ёртыс, шырпи кодь ичӧтик зонкаыд, торкис Мишаӧс:

— А-а, ме тӧда! Тайӧ немецкӧй кыв вылын! «Ком»-ыс лоӧ «Лок»! Витя вокӧ немецкӧй велӧдӧ.

Таись пӧч босьтіс внучок кисьыс книгасӧ, ёрччыштіс:

— Ак ті, грамотейяс, коми карын, Сыктывкарын олысьяс, коминас тай нӧ он кужӧй! «Сё коми сьыланкыв» тайӧ, а мӧдыс «Висер вожса мойдъяс». Сказки, сто штук. Гӧгӧрвоанныд? А со нӧ ме мый гижи коркаас: мися, Мишуклы Таись бабсӧ казьтылӧм вылӧ. Велӧд коми кыв да лыддьы тайӧ книгаяссӧ. Сэтшӧм гусятор-тайна воссяс син водзад. И коми кывйыс лоас муса, и Коми муыс, и ми вок коми пӧч-пӧльыс лоасны донаджыкӧсь.

— А ми ог кужӧ да, тэ, бабӧ, лыддян миянлы? Ӧти мойд кӧть, но, бабӧ?

Сідзи и пондіс киссьыны челядь вомысь кевмысьӧм да корӧм. Но мамыс Мишалӧн торкис найӧс:

— Сетӧй, чавканъяс, бабыслы пӧрччысьны да шойччыштны. Пуксьӧдӧй со пызан сайӧ, пызаныс дась. А сэсся сёйыштам да юыштам, сьылыштам да йӧктыштам, Мишук именникӧс ыдждӧдлам дай мойд кывзыны кутам. Таись баб ок уна мойд тӧдӧ.

Таись баб монь кывъяс дорас содтыштіс на нӧшта:

— Гуляйтны на петалам да вӧлись. Мойдӧны ӧд рытнас, пемыдгорулын.