УКОНОК

Анна пӧчлы суседкаыс вайис ичӧтик бальӧпи, тӧвйӧд пӧ, мӧд во ар кежлӧ яй лоӧ. Аттьӧаліс бабыд суседкасӧ да бальӧпитӧ лэччӧдіс гидас. А вӧлі кӧдзыд тӧв, да балюкыд гидад кӧйдӧма дзикӧдз. Ковмис пӧчӧлы ичӧтиктӧ пыртны гортас. Пач бокас чомтор вӧчис да сэтчӧ и йӧршитіс балюкӧс, кӧдзыд тӧвсӧ пӧ инӧсь ӧтув и коллялам тэкӧд. Бальӧпикӧд варовитанінас и суисны пӧчӧс гӧстяяс. Пӧдругаыс локтіс карса внучкаыскӧд, кагаыд аддзис чомсьыд бальӧпитӧ, горӧдіс:

— Уконок, уконок, посмотли, баба!

— Кутшӧм уконок? Абу, дитя, тайӧ утёнок, бальӧпи тайӧ. Балька, — тӧдчӧдыштіс бабыс, но нывка век ас ногыс «уконокӧн» нимтіс бальӧтӧ да судзӧдчис кекӧньяснас малавны уконокыслысь небыдик гӧнсӧ.

— Но-о, уконок кӧ и мед уконок лоӧ, — серӧктіс Анна пӧч да та бӧрын Уконокӧн и пондіс ыдждӧдлыны быдтассӧ.

Балюк и ачыс ӧдйӧ велаліс тайӧ ним дорас. Бабӧ шуас: Уконок, давай жӧ нуръясьыштам. Бальӧпи сэн нин, сёян доз дорас гартчӧ, бӧжнас тіралӧ. Бабӧ шуас: петалам ывла вылас пальӧдчыны. Уконок ӧдзӧс дорас нин, дась ӧдзӧс сайӧ уйкнитны.

Сідз найӧ и кутісны сэсся ӧтлаын ветлыны и вала юкмӧс дорӧ, и няньла лавкаӧ, и весиг аптекаӧ порошки судзӧдны.

Воис коркӧ и тулыс. Вежӧдіс видз выв. Мукӧдъяс пондісны лэдзлыны ыжъяссӧ кук йӧрӧ.

— Уконок, и тэнӧ аски йирсьыны нула, — шуӧ бабӧ.

Петісны аски асывнас. Мунӧны орччӧн кук йӧрӧ. Сувтовкерас бабӧ — сувтас и бальӧ. Тувччӧ бабӧ — тувччӧ и быдтасыс. Коркӧ и воисны кук йӧр дорӧ. Восьтліс бабӧ заворсӧ, йӧткыштіс быдтассӧ:

— Но, бласлӧ кристос, пыр йирсьы.

Йӧртіс бабӧ бальӧсӧ кук йӧрӧ, ачыс пырис кук йӧр дорын сулалысь керкаӧ, ӧшинь пырыс пӧ видзӧдла, мый кутас керны сылӧн быдтасыс.

А Уконокыд гӧгӧрвоис, мый кӧзяйкаыс вошис кытчӧкӧ, да давай сійӧс корсьны. Дзизъялӧ кук йӧр пасьта да горш тырӧныс баксӧ.

Сідз коньӧранӧй ризъяліс, мый и баблы жаль лои пемӧсыс. Усяс пӧ йӧюкыд кок йывсьыс, лоӧ петны.

Керкаса кӧзяйкаыс ӧлӧдыштіс, нӧрӧвитлы пӧ, мед велалас мукӧд ыжъяс дорас. Вай пӧ пуксьы чай юам.

И збыль, стӧкан чай юӧм бӧрын бабӧ казяліс — кук йӧрын лӧнь лоӧма.

— Сайкаліс жӧ кӧ-а? — радлыштіс бабӧ да мӧдіс гортас. Но эз на удит ас потшӧс дорӧдзыс воны, казяліс Уконоксӧ кильчӧ вывсьыс. Сулалӧ ӧдзӧс водзас да юрнас ӧтторъя люкыштӧ ӧдзӧссӧ. Вӧзйысьӧ пырны. Сӧмын и шензяна коли бабӧ, но пӧ и пемӧс этайӧ! А Уконокыд казялӧма потшӧс сайсьыс кӧзяйкасӧ да кыдзи тай кильчӧ вывсяньыс уськӧдчис муас да потшӧс вомӧныс звирк чеччыштіс, тайкӧ Анна пӧчӧс эз уськӧд кок йывсьыс. Мыйла пӧ тэ менӧ колин, кытчӧ пӧ тэ пышйылін?

Гожӧмбыд и ковмис сэсся Анна пӧчлы ветлыны кук йӧрӧ Уконокыскӧд.

Ӧтиыс пукалӧ ласта вылӧ вольсалӧм эшкын вылын да кыӧ-вӧчӧ мыйкӧ, мӧдыс йирсьӧ сы дорын, бӧжнас тірӧдчӧ.