ТЕЛЕФОН

— Талун, Танюшка, тэа-меалы ковмас горт овны, садикад ог мунӧй, — чеччӧмпырысь пыр и юӧртіс нывкалы мамыс да содтыштіс: — талун миянлы телефон мӧдасны сюйны.

— Ой, телефон! Телефон, миян лоӧ телефон!

Чиктыліс-радліс Танюшка, но мыйлакӧ телефон сюйысьясыд эз тэрмасьны. Батьыс важӧн муніс удж вылӧ, Игорь вокыс — школаӧ, а телефон пуктысьяс век абуӧсь.

— Мамӧ, кор найӧ воасны? — юасьӧ Танюшка.

— Нӧрӧвитлы, ми ӧд абу ӧтнанымӧсь. Колӧкӧ, ӧбед бӧрӧдз на оз воны, — чирыштіскодь нывкасӧ мамыс да вӧзйис: — ворсышт аканьнад.

Кутшӧм ворсӧм, видзӧдӧ ӧшиньӧ Таня, виччысьӧ. Медбӧрын воисны жӧ кык дядьӧ. Ӧдйӧ и вӧсньыдик провод тувъялісны стенас да ӧдзӧсдорса тумбочка вылӧ меститісны телефон аппаратсӧ.

И заводитчис ичӧт нывкалӧн выль олӧм.

— Вай папӧлы звӧнитлам, — никсіс сійӧ.

— Ӧні огӧ нин, ачыс регыд локтас пажнайтны, — ӧлӧдыштіс мамыс.

— Сідзкӧ, садикӧ, мед менӧ талун оз виччысьны, — эз эновтчы нывка.

— Звӧнитлам, звӧнитлам, — сӧгласитчис жӧ мамыс. Но телефоныс ачыс друг тринькнитіс.

— Алё! — пыр и кватитіс трубкасӧ нывка.

Трубкаын нывбаба гӧлӧс шуаліс кутшӧмкӧ лыдпасъяс: три, шесть, пять... А нывка сылы воча горзіс:

— Алё! Алё! Ме — Таня, Таня!

Трубка ланьтіс да дыр чӧв оліс. Сӧмын Таня эновтіс телефонсӧ, сійӧ бара триньӧбтіс.

Тадзи куимысь кымын, кытчӧдз мамыс ачыс эз босьт трубкасӧ да тӧдмав, мый звӧнитӧны телефоннӧй станциясянь, прӧверяйтӧны линиялысь уджсӧ. Зато и Танюшка крепыда босьтіс вежӧрас ассьыныс телефон номерсӧ. Порог воськовтігкостіыс тай и юӧртіс батьыслы-а:

— Папа, миян телефон номерыд 43-46-45.

Серӧктіс батьыс, шмонитыштіс:

— Сідзкӧ, ӧні жӧ и звӧнитлам!

Сэсся локтіс школасьыс вокыс. Таня бара сылы тэрмасис телефон номертӧ юӧртны. Игорьлы тайӧ и колӧ. Муртса удитіс книга сумкасӧ шыбитны, уськӧдчис телефон дорад да, буракӧ, дась вӧлі став ёртъясыслы ошйысьны, мый сылӧн ӧні эм телефон. А ёртъясыс бара дасьӧсь жӧ вӧліны юӧртны Игорьлы ассьыныс став выльторъяссӧ. Миша Морозовлӧн каньыс кык каньпи вайӧма, Лёвалы ньӧбӧмаӧсь «Денди», Стёпиклӧн оз артмы задачаыс, а Света тарыт мунас мамыскӧд цирк видзӧдны, вайӧмаӧсь пӧ быдсяма пӧлӧс артист-зверьясӧс. А трубкасӧ ӧд быд тринькнитігӧн босьтліс Танюшка. Рыт кежлас сэтшӧма мудзис, весиг ӧткажитчис радейтана мультиксӧ видзӧдны.

Унмовсьны нин кутліс вольпась вылас, да друг бара кодкӧ звӧнитіс.

Трубкасӧ босьтіс вокыс да чукӧстіс дзик пыр куйлысь чойсӧ:

— Танька, чеччы, тэнӧ корӧны.

— Ме-нӧ? Коді менӧ корӧ? — Радысла ырс чеччис Танюшка да уськӧдчис телефон дорас.

— Алё!

Трубкаын кыз мужик гӧлӧс горӧдіс:

— Таня, тэ? Привет! Тайӧ ме — Коля!

Таня радысла чеччалыштіс весиг места вылас.

— Коля?! Тэ кыдзи тӧдмалін миянлысь телефон номерсӧ? И мыйла тэнад гӧлӧсыд сэтшӧм тешкодь? Тэнад ангина?

Трубкаын кыз мужик гӧлӧс дӧзмыштіс:

— Танька, брось мекӧд ворсӧдчынытӧ. Дискотека вылад ветлам?

— Дис-дис-ко-тека вы-лӧ? — Дзикӧдз падмис нывка, юалӧмыс мыкталӧмкодь и артмис. Воча кывсӧ сідзи и эз вермы виччысьны. Трубкаыс заводитіс бипкайтны. Бип... Бип... Бип... Вот ӧд кутшӧм телефоныд!