ӦБЛЕЗЗЯНА
Мӧдісны челядь матысса вӧрӧ чӧд вотны. Вӧтчис на бӧрся и ичӧтик Света. Вокыс скӧрмис сы вылӧ, чирыштіс:
— Светка, весась гортӧ! Вошан вӧрас да сэсся корсь тэнӧ.
— Ме вед ог кольччы тэ дорысь. Ме тшӧтш кӧсъя чӧдсӧ вотны.
— Но, эн норась, мудзан кӧ, ог кут кыскавны тэнӧ кӧшельӧн.
Светка бӧрддзис, но эз эновтчы челядь дорысь.
Воисны вӧрӧ. Дзик пыр и сатшкысисны зіль войтырыд вотчыны. Кок уланыс и чӧдйыс. Воӧма нин. Розъясыс лӧз тусьяснас быд боксянь чуксалӧны найӧс:
— Вотышт менӧ! Вотышт менӧ!
Светалӧн некутшӧм дозмук абу. Тшӧтш вотны кутіс платтьӧ зептас. Регыд и горӧдіс:
— Петя-а, менам зептӧй тыр нин! Вай тэнад чуманӧ кисьта! Да Петя, мися! — дзайгис нывка. Мӧдыс броткыштіс:
— Босьтны дозтӧ колі. Коді зептӧ чӧдсӧ вотлӧ? Лякӧсьтан сӧмын платтьӧтӧ.
Бӧрти бурмис жӧ да мыччис чойыслы ассьыс чумансӧ:
— На вот ректы этатчӧ. Ме гӧгӧртышта, сикаджыкин корсьла. А тэ смотри, эн торйӧдчы мукӧд дорсьыс. Ылалан.
— Ог, ог, — кӧсйысис нывка да зіля вотіс гырысь лӧз тусьяссӧ.
Недыр мысти нывкаяс пӧвстысь друг кодкӧ лёкгоршӧн чирӧстіс:
— Ӧблеззяна! Ой, ӧблеззяна! Ме аддзылі! Коз йылӧ кавшасьӧ!
Ставӧн полошуйтчисны. Кодкӧ пыксьыштіс на:
— Кутшӧм ӧблеззяна? Сійӧ Африкаын олӧ! Чирзан сэні, повзьӧдчан.
— Да аддзылі...
— Ош, гашкӧ, да? Сійӧ кужӧ пуяс йылад кавшасьны, — шыасис ӧти зонка. — Ме лыддьылі...
— И миян батьӧ висьтавліс.
Ӧні нин челядь повзисны збыльысь. Эновтісны вотчӧмтӧ.
— Пышъямӧй ӧдйӧнджык! Кушинас колӧ петны! — юралісны челядь гӧлӧсъяс.
Повзис и Света. Пондіс чуксавны воксӧ:
— Ош тані, ош, Петя! Лок ӧдйӧ миян дорӧ!
— Петя-а-а! — горзісны и мукӧдъясыс да гузьӧбӧн мӧдісны ризӧдны сиктбердса кушлань.
— Зӧр му дорас сетчӧй, зӧр му дорас! Сэтчӧ ошкыд оз пет! — горзіс кодкӧ зонкаяс пӧвстысь. Нывкаяс повзьӧмнысла никсігтыр вӧтчисны сійӧ гӧлӧс шы улӧ.
Котӧртіс на бӧрся и Петя. Зӧр му дорын нин вӧтӧдіс найӧс, горзіс:
— Светкаыс миян, Светкаыс?..
Света аддзис воксӧ, но эз тӧд да кыдз тай чилӧстас:
— Ой, то вӧтчӧ миян бӧрся ӧблеззянаыд! Кутас кӧ? Петя-а! Да кӧні нӧ сійӧ ? Ы-ы-ы, — бӧрддзис тиньгӧмӧн.
— Кутшӧм ӧблеззяна чилзан? Тиньгӧ ещӧ бӧрдӧ. Ме тэныд шулі: эн вӧтчы ми бӧрысь.
— Тэ-э, тэ ӧблеззянаыс! — Пондісны серавны челядь да индыны чуньнас Петя вылӧ.
Ӧні нин найӧ збыль вылӧ гӧгӧрвоисны весь полошуйтчӧмсӧ да окота лои вильшасьыштны да сералыштны.
Петя и збыль ӧбезьяна кодь. Чужӧмыс ставнас сьӧд. Чӧдсӧ сёйигӧн да лякӧсь кияснас номъяссӧ вӧтлігӧн сяммӧма ныр-вомсӧ сідз лякӧсьтны, со рӧднӧй чойыс эз тӧд. Сэтчӧ жӧ нӧшта моздорас мыйлакӧ шымыртӧма Петя дзор рой тошка коз пу чальяс да гырысь колля коз да пожӧм вожъяс.
Светка сулаліс мукӧдсьыс бокынкодь да век видзӧдіс вокыс вылӧ. А вокыс жервидзис еджыд пиньяснас:
— Светка, тэ мый? Эн ли мый менӧ тӧд? Аддзан, мый ме вайи? Тайӧ кольяссьыс да ройсьыс ме тэныд сэтшӧм чачаяс вӧчала! Вӧрса дядьӧӧс, позьӧ вӧрса пӧткаяс! Ме важӧн нин кӧсйи татшӧм кольяссӧ чукӧртны. Вай чӧд наберушкаад и тэчам. Талун сэсся вӧрас ог пырӧй. Мӧд лунӧ бара на воламӧ.
Тёльӧдчисны ас костаныс челядь, котӧртісны гортланьыс. Восьлаліс вокыскӧд орччӧн и Света да помся тёльгис ассьыс:
— А вӧрса лэбачьясыслы синъяссӧ вӧчам чӧд тусьысь. Ме сы мында чӧд воті! И эг мудз!
