ОЗ ВОТІГӦН

Таня да Петя чоя-вока гожӧмнас гӧститісны сиктын баб ордас. Ӧтчыд бабыс нуӧдліс найӧс вӧрӧ оз вотны. Важ пес керасын пӧ уна озйыс овлӧ, сэтчӧ ветлам. Локтісны пес керасӧ, а озйыс сэні и збыль гӧрд вольсалӧма! Пев пом гырсяӧсь сярвидзӧны! Зіля и пондісны кокасьны-вотчыны чоя-вока. Мурзӧны сӧмын да кватлалӧны тусьяссӧ. Но регыд вӧр йывсяньыс сьӧд кымӧр пондіс пуритны-кайны. Бабыс шуис:

— Чорыда и зэрмас. Вайӧ жӧ, дитяяс, зэртӧдзыс лэччамӧй бӧр гортӧ. Кӧтасям да зэв мустӧм лоӧ.

Но чоя-вокалы жаль лои кольны эта мында озсӧ, эз тэрмасьны гортас, век вотчисны. А кымӧрыд юр весьтаныс нин. Со и войтасьны кутіс. Гырысь зэр тусьяс, быттьӧ кӧрт тувъяс, сатшӧны ныр-вомад, пельпомад, муас.

Бабыс аддзӧма сук козъяин да сэсянь нин, кылӧ, горзӧ-чуксасьӧ:

— Аня, Петя! Татчӧ, пиукъяс, татчӧ котӧртӧй! Кӧтӧдас! Анялӧн тэрмасьӧмысла юрсьыс чышъяныс лэччӧма, кватитӧ век оз тусьсӧ кок увсьыс да воськов вӧчӧ кобувлань. Медбӧрын котӧртны жӧ пондіс. Вокыс вӧтчис сы бӧрся. Друг Таня чилӧстіс зэв гораа, тон сувтіс да кватитчис юрсиас, скӧрысь уськӧдчис вокыс вылӧ:

— Петька, мустӧм тэ! Кузь уска гагсӧ, буракӧ, юрӧ пуктін? Босьт, буди, шыбит!

— Ме? — шай-паймуніс вокыс, — ме тэ дорӧ эг на сибӧдчыв.

— Коді нӧ? Ме али мый? Кыла ӧд, чажакылӧ юрси пытшкын! Корсьлы!

Друг тайӧ кадас резьӧбтіс-гымыштіс, да сэтшӧм чорыда, челядь тайкӧ оз ляпмунны места вылас.

Петя тойыштіс чойсӧ водзлань, горӧдіс:

— Котӧрт! Сулик кӧтасям! Кутшӧмкӧ кузь уска гаг думыштӧмыд!

— Да юрын, юрын! Корсьлы!

А бабыс кобувсяньыс, кылӧ, мыйкӧ лёкгоршӧн горзӧ налы да шенасьӧ кияснас.

Бабыс дорӧ кобулӧ воӧм бӧрын сӧмын челядь аддзисны, кыдзи насянь неылын няръялӧмӧн сотчис вылын юра ӧтка пожӧм. Чардыс пожӧмас инмӧма. Со мыйла, вӧлӧмкӧ, бабыс тадз горзӧма да шенасьӧма. Повзян ӧд. А Таня юрысь уска гагсӧ корсисны да сідзи и некодӧс эз аддзыны.

Гашкӧ, челядь, ті тӧданныд помкасӧ, мыйла чажакыліс нывкалӧн юрсиыс?