МЕДВОДДЗА КӦДЗЫДЪЯС
Садьмис асывнас Танюшка, муртса на эшкын увсьыс петіс, пыр и йӧжгыльтчис. Керкаыс кӧдзыд. Ӧшиньясыс гыӧраӧсь, ывлаас шонді ворсӧдчӧ, ассьыс югӧръяссӧ веськыда ӧшиняс швачкӧ.
Мамыслӧн ыджыд пачыс ваймӧма нин, ичӧт пачсӧ буретш ломтӧ, трачкӧдчӧ сартасӧн. Танюшка тапсьӧдіс мамыс дорӧ кӧмтӧм коконьяснас, сывъяліс мышсяньыс.
— А-а, чеччин, дыр узьысьӧй? — шыасис мамыс. — Аддзан, шондіыс мый вылна нин.
— Ывлаыс шондіа, а мыйлакӧ гортын кӧдзыд, — норасьыштіс нывка.
— Тӧв воис, сы вӧсна и кӧдзыд. Тӧвся шондіыд оз нин шонты. Войнас сэзьдӧма дай керкатӧ дзикӧдз кӧдзӧдӧма. Сы пыдди ывлаыс кутшӧм гажа лоӧма! Видзӧдлы ӧшинь пырыд. Пелысьыд да кыддзыд кыдзи вӧччӧмаӧсь. Пушкырвидзӧны гыӧрысла.
— Вӧччӧмаӧсь? Найӧ ёлка вылӧ мунны кӧсйӧны? — шензьыштӧмӧн юалӧ Таня.
— Йӧюк тэ, — нюммуніс мамыс, босьтіс кӧмтӧм нывкаӧс моздорас, окыштіс да мӧдіс ӧшинь дорас. — Ёлкаасян кадыс Выль во дырйи лоӧ. Дай кытчӧ пуясыд мунасны? Найӧ оз ветлыны йӧз моз. А вот гӧстьяс, пыстаяс, воӧмаӧсь ми ордӧ. Ті, чоя-вока, петанныд да гажӧдчыштанныд на дорын. Ольӧ вокыд петіс нин даддьӧн. Исласьышта пӧ дай пыстаяссӧ вердышта. Порсь тшӧг торпыриг петкӧдісны батьыдкӧд. Шӧртӧн пӧ пу вожъясас ӧшӧдлам. Да со и асьныс найӧ буретш кыдз пу дорад тшӧг торъяссӧ ӧшлӧны. И пыстаясыс сэнӧсь жӧ, жбыръялӧны пу вожъяс косттіыс. Сёйны корӧны.
Аддзис и Танюшка жбыръялысьястӧ да босьтчис кекӧначасьны:
— Сэтшӧм ичӧтикӧсь! А морӧсныс виж!
Нывкалы тшӧтш окота лои петны ывлаӧ, мынтӧдчис мам моздорсьыс.
— Петан, петан, — лӧньӧдыштіс Танюшкаӧс мамыс. — Удитан на. Луныс сӧмын заводитчӧ. Вай кокад мыйкӧ ӧдйӧджык сюй да мыссьышт. А сэсся сёйыштам дай петан.
— А найӧ кӧ пышъясны?
— Коді? Батьыд да Ӧльӧкыд? Найӧ сёйны жӧ пырасны.
— Мамӧ, тэ кутшӧм тӧлктӧм. Ме пыстаяс йывсьыс шуа.
— А-а, найӧ? Оз пышйыны. Порсь тшӧгтӧ найӧ ок ёна радейтӧны. Тӧвбыд тан кутасны ноксьыны. Тулысъявылыс сідз тьвинькайтны-сьывны пондасны, тэныд да Ӧльӧлы аттьӧ висьтавны кутасны.
— И батьыдлы тшӧтш. И тэныд. Тэ ӧд ичӧт пачтӧ ломтін, да налы шоныдджык лои.
Мамыслӧн петіс серамыс:
— Ок тэ, менам Танюшӧй. Ставнымлы, дерт, пондасны сьывны.
