ЛОВЪЯ ВА ЙЫЛЫСЬ ЛЕГЕНДА

Коркӧ-некоркӧ парма ягын олісны-вылісны вӧралысь гозъя. Верӧсыс кыйис-виис, гӧтырыс сылы пуис-пӧжаліс, мыськис-песлаліс да паськӧмсӧ вурис-дӧмис. Сідзи и найӧ пӧрысьмисны.

Ӧтчыд дедыс петіс вӧравны. Унакодь шӧйтіс-ветліс ягті и нюрті. Нинӧм эз шед. Мудзис, пуксис шойччыны. Видзӧдӧ: орччӧн ключ ва дзулькйӧ-петӧ мусьыс. Радлыштіс дедӧ, юис ключ ватӧ и дзик пыр жӧ бырис мудзыс, кокъясыс том мортлӧн кодь визулӧсь лоины.

Локтіс гортас, а пӧчыс и шуӧ:

— Мый нӧ, том зонмӧ, ветлан-мунан миян парматі? Кутшӧм мог суис?

— Мый нӧ тэ, гӧтырӧ, менӧ эн тӧд? Ме — верӧсыд тэнад.

И висьталіс дедыд бабыслы ключ ва йывсьыд.

Бабӧ пыр жӧ нуӧдчыны кутіс:

— И менӧ тшӧтш нуӧдлы сійӧ ключ дорас. Ме тшӧтш том ичмоньӧн кӧсъя лоны.

— Ветлам, ветлам, — шуӧ верӧсыс. — Аски жӧ и нуӧдла. Вод ӧні узь, кадыс сёр нин.

Водасны. Аскинас садьмас верӧсыс, а бабыд абу гортас. Ӧти лун абу, мӧд, коймӧд. Кытчӧ нӧ вошис?

Петіс верӧс пармаӧ бабсӧ корсьны. Мунӧ, кӧнкӧ кага бӧрдӧм шы кыліс. Шензьыштіс, кытысь пӧ татчӧ кагаыс воис? Видзӧдӧ, а понӧль бокын ичӧтик нывка тільӧ пыктӧм синъяссӧ, кульӧ-бӧрдӧ.

— Нылукӧ, кыдзи татчӧ веськалін?

— Воши, туйсӧ гортӧ ог аддзы, — бӧрдӧ нывка.

Окма! — гӧгӧрвоис верӧсыд: старукаыс тайӧ сылӧн. Со и сера дӧра сарапаныс и чышъяныс сылӧн кодь.

Горш бабаыд уна юӧма да ичмонь пыдди ичӧт нывка лоӧма.

Оз ӧд весьшӧрӧ шулыны: колӧ быдторйын мера тӧдны.