КЫК ӦТКОДЬ

Автобусӧ тэрыба тювк пырис ичӧтик зонка. Нырнас ӧтторъя шлюпкӧ, синъяснас гӧгӧрпӧв дзӧръялӧ. Сэні пукаліс пӧчӧ. Майшасьыштіс пӧрысьыд, вошӧма пӧ, тыдалӧ, кагаыс, ӧтнас мамыстӧг ветлӧ да.

— Детин, тэ кутшӧм улич вылын олан? — шыасис зонка дорӧ бабыд.

— Няйт улич вылын, — вочавидзӧ зонка.

— А гортыд?

— Миян гортыд сӧстӧм. Ме мамӧлы отсася идрасьны.

— Но-о, бур пи инӧ тэ да зіль зонка, — ошкыштіс зонкаӧс пӧчыд да бара юалӧ: — А кыдзи тэнӧ шуӧны?

— Д-д-д-ёмаӧн, — мыкталӧмӧн да зэв гора артмис зонкалӧн.

— Кристос тэкӧд, абу жӧ ёма! — пернапас чӧвтіс пӧчыд.

— Тэ ачыд ёма! Ме — Д-д-ёма!

Бабӧ ӧбидитчис, пондіс ропкыны:

— Со ӧнія челядьыд...

Локтіс автобус мӧдар помсяньыс томиник ань, кватитіс зонкаӧс ки пӧлӧдыс, тэрмӧдлыштіс:

— Дёма, лок ӧдйӧджык! Миянлы петны кад.