КЫК НИНА, ДА ШЫР ОЗ ПОВ
Челядь ворсісны школаысь. «Школаыс» налӧн Мишӧ Вась керка мышкын лэбув бокас, пашкыр льӧм пу дорын. Партаяс пыдди — гажа ласта вылыс. Учительлӧн пызаныс — сельмаг дорысь вайӧм панера ящик, а улӧсыс — дженьыдика пилитӧм кер пом. Учительницаыс — Мишӧ Вась дядьяслӧн ӧтка нылыс, Нинаыс. Сійӧ сюсь да тӧлка нывка, сизим ар нин тыртӧ.
Нӧшта мӧд учительница школаын эм, Мишӧ Ниналӧн пӧдругаыс, Нина нима жӧ. Кык Нина тшӧтшъяяс, ёна лӧсялӧны. Ӧтиыс кӧ урок нуӧдӧ, мӧдыс — пуктас пель саяс карандаш, вӧчас стрӧг чужӧм да пуксяс велӧдчысьяскӧд ласта вылас жӧ, бокӧджык. Сійӧ — школа директор, локтіс урок кывзыны.
А велӧдчысьясыс — сиктысь матігӧгӧрса посни войтыр. Катя да Маша аканьяснас, Нюрка — путкыль кодь кыз да лӧнь Василь вокыскӧд. Шушкыль кывъя Шурик сӧмын ӧтнас, да и то тшӧкыда зептас вайлӧ истӧг кӧрӧбӧ йӧртӧм гут либӧ гаг.
Овлӧ налӧн школаас физкультура, сьылан-йӧктан да коми кыв велӧдан урокъяс.
Физкультура да сьылан урокъяс дырйи тшӧкыда артмывлӧ, мый и учительница, и стрӧг директор ышмӧны да заводитлӧны кекӧначасьны да патурликасьны веж ласта вылас.
Медся лӧнь урок — пырджык коми кыв велӧдан урок.
Талун стрӧг директорнас ачыс кӧзяйкаыс, Мишӧ Нина. Сійӧ весиг бабыслысь ӧчкисӧ петкӧдӧма да ляскӧма ныр вылас. Урок нуӧдны пуксис панера ящик сайӧ мӧд Нинаыс. Сылӧн тайӧ урокыс артмӧджык дай мича серпасалӧм картинаяс сылӧн эм. Со пызан пасьтаыс картинаяссӧ разӧдіс, а ӧтиӧс лэптіс да шыасис посни велӧдчысьяс дорас:
— Мый татчӧ серпасалӧма? Коді тӧдӧ?
Ставныс жӧ аддзӧны: керка тайӧ. Весиг ичӧт Васьтоль лэптіс кисӧ.
Тайӧ кадас друг лэбувсянь кыліс ыж бакӧстӧм шы: «М-ме-е-е!»
Челядь серӧктісны, но эз пыдди пуктыны бакӧстӧмсӧ. Эз ышмыны.
— Кымын ӧшинь керкаас, коді висьталас? — водзӧ нуӧдӧ уроксӧ учительница. Лэбувсянь бара «М-ме-е-е!» кыліс.
Но, тайӧ нин вывті! Челядь босьтчисны нерны ыжӧс, баксыны, ӧта-мӧдныслы сюраня-бутаня петкӧдлыны. Учительница эз тӧд, мый керны. Урокыс сылӧн дзикӧдз торксис. Жугыльмис. Но кӧзяйкаыс, Мишӧ Нина, сы вылӧ и директор, пӧрччис ӧчкисӧ да сійӧн шенасиг кыдз тай горӧдас:
— Прекратить!
Ачыс уськӧдчис лэбувланьыс да пондіс кулакнас гымӧдны стенас:
— Мегӧ, ланьт, буди! Тэ менӧ кылан? Ог вед кут няньнад чӧсмӧдлыны!
Но ышмӧм челядьтӧ сьӧкыд нин лӧньӧднытӧ ӧні. Ку пиысь быттьӧ петісны. Тшӧтш ичӧт кекӧньяснас вачкӧны лэбув стенӧ да чилзӧны:
— Ланьт, буди!
Найӧ эз и казявны, кыдзи лэбув пельӧсысь чепӧсйис шыр да дзебсянін корсигмоз котӧртіс учительницалӧн панера ящиклань. Ӧтнас ичӧт Василь шыртӧ аддзыліс. Сійӧ вывті кыз да лӧнь кага, медым мукӧдъяс моз чиктывны. Пукаліс прӧста турун вылас да видзӧдіс тайӧ ставсӧ. Шыртӧ тай аддзис да ловзьыштіс жӧ быттьӧ. Чуньнас индӧ панера ящиклань да «Шыр!» горзӧ. Сэки и учительница Нина шогалӧмсӧ эновтіс. Сійӧ ёна полӧ шыръяссьыд да «Кӧні?» чилӧстіс Васюклы, да пондіс кавшасьны учитель пызан вылас.
Сылӧн чилзӧмыс да пызан вылас кайӧмыс и лои быттьӧ команданас, медым ставӧн лӧнисны. Видзӧдӧны чилзысь учительница вылас да оз гӧгӧрвоны, мый лоис.
Буракӧ, ас садяс медводз воис век жӧ кӧзяйкаыс, Мишӧ Нина. Сы вылӧ и сійӧ директор. Сибӧдчис учитель пызан дорӧ да юӧртіс:
— Всё! Урок помасис. Бурджык физкультура вӧчам.
Сэки век на места вылас пукалысь Васёк лэптіс кисӧ да шыасис:
— А ме мыйкӧ кӧсйи на висьтавны да.
— Висьтав! — стрӧга крапкис директорша Нина.
— К-кык Нин-на, д-да шыр оз-з пов-в, — мыкталігтыр шуис Васёк да кекӧньяснас тупкис чужӧмсӧ. Сылы вӧлі яндзим мыкталӧмсьыс да.
Стрӧг директорша кайтыштіс сылы:
— Двойка тэныд! Оз кӧ пов вед, эз пышйы.
Васёклы сэтшӧм ӧбиднӧ лои, чушкӧдіс парсӧ да бӧрддзис. Нюрка чойыс такӧдіс сійӧс, чышкаліс вокыслысь синвасӧ, шуаліс:
— А ыжыс вед, шу, повзис. Да вед, Васик, тайӧс вед кӧсйин шуны?
— Т-т-тайӧс, — нурбыльтіс зонка.
— Тайӧс, дерт. Молодеч Василёк! — дорйыштіс ичӧтиктӧ и Нина-учительница, коді панера ящик вывсьыс чеччыштігӧн музгыльтӧма коксӧ да буретш малаліс сійӧс.
Сэки бурмис и стрӧг директор да шуис мӧд Нинаыслы:
— Пятёрка инӧ пукты. Сійӧ ӧд некор на эз пӧлучитлы пятёркасӧ.
Та бӧрын челядь дыр на чиктылісны да кайтісны Василёклысь кывъяссӧ:
«Кык Нина, да шыр оз пов! Кык Нина, да шыр оз пов!»
