КВАЙТ ЧУНЬ

Аннушкалы нёль арӧс тырис. Сійӧ ыджыд нин, артавны нин велӧдчӧ. Асывбыд нин пукалӧ кильчӧ вылас да лыддьӧ ассьыс чуньяссӧ: ӧтик, кык, куим, нёль,.. квайт!

Да, да, ӧти киын квайт чунь и мӧдас квайт жӧ!

Бабыс керкаысь петіс помӧй ведраӧн, Аннуш уськӧдчис бабыслы паныд:

— Бабӧ, бабӧ! Менам квайт чунь! Ме ачым нин лыдди! Бабыс пуктіс помӧй ведрасӧ, шензьыштіс:

— Квайт чунь? Ен мед видзас! Квайт чуняясыс вед гуськульяс сӧмын! Вай ноко выльысь да бурджыка лыддьы.

Аннуш чургӧдіс чуньяссӧ, мӧд кинас лӧсьӧдыштіс кымӧсас лёзь юрсисӧ дай пондіс лыддьыны чурвидзысь чуньяссӧ:

— Видзӧд, бабӧ: ӧтик, кык... ку-им... нёль... квайт! — Медбӧрын инмӧдчыліс пев йылас. — Квайт чунь!

Бабыс дзӧрӧдыштіс юрнас, мыччис внучкаыслы ассьыс кисӧ:

— А ноко, менсьым лыддьы!

Аннуш ошйысьӧмӧн моз да тэрмасьӧмӧн и лыддис бабыслысь кыз чуньяссӧ.

— Тэнад квайт жӧ! — Кыв кӧрталіс нывкаыс.

— А витӧдыс нӧ инӧ кытчӧ воши? — серӧктіс бабыс.

— Ме ог тӧд, ме эг гусяв, — жугылиника шуис Аннуш да лэдзис юрсӧ. Бабыс босьтіс помӧй ведрасӧ, кайтыштіс:

— Пыр гортӧ, батьыд вежӧс сайын, сыкӧд нӧшта велӧдчыштӧй лыддьысьныс, а ме петкӧда польӧыдлы сёянсӧ. Пыра, да нӧшта на лыддьыштам.

Пырис Аннуш папыс дорӧ вежӧс сайӧ, юрсӧ лэдзӧма.

— Аннушка, сёшайтӧй, мый нӧ сэтшӧм жугыль талун? Эн-ӧ висьмы? — Папыс босьтіс нывкасӧ ки йылас, видзӧдліс чужӧмас.

— Висьми, — жугыля нурбыльтіс Аннуш. — Бабыдлӧн витӧд чуньыс кытчӧкӧ вошӧма. Чайтӧ: ме гусялі. А ме — эг. Тӧрыт сӧмын ӧти кампет сылысь юавтӧг босьтлі.

— А-а, со инӧ тэ кутшӧм грека! — Батьыс вак-вакӧн серӧктіс, гильӧдыштіс, кыдзи и пыр, нывкаыслысь мышкусӧ, киняувъяссӧ дай бӧр лэдзис джоджас. — А менам, колӧкӧ, воши жӧ витӧд чуньӧй да? Вай ӧтвылысь кыкӧн лыддям!

Пондісны лыддьыны: ӧтик, кык, куим, нёль, вит...

— А квайтӧдыс нӧ кӧні? — горӧдіс Аннуш.

Батьыс бара гораа серӧктіс. Но сэсся лабутнӧя нин содтіс:

— Квайтӧдсӧ аддзам жӧ, эн тэрмась. Вай кыкнан кисьым ӧтлаын став чуньсӧ лыддям дай аддзам и квайтӧдсӧ.