КАГА ВИДЗЫСЬ

Асывнас пызан сайӧ пуксьытӧдз на Машук паніс сёрни мамыскӧд.

— Мамук, тэ талун некутшӧм удж вылӧ менӧ эн нарадит. Мамыс серӧктіс:

— Ёна нин и ме тэнӧ удж вылас нарадитла да. Гортысь петігӧн тай закажита, мед кильчӧ ӧдзӧстӧ мунігад он восьсӧн коль.

Машук дӧзмис мамыс вылӧ, скӧрысь видыштіс:

— Сійӧ мӧй удж? Уджыс вед видзӧдны чипан-петук бӧрся, мед градъястӧ оз пуркйыны! Лунтыр колӧ видзӧдны да видзӧдны на бӧрся, а талун меным некор!

— Но-о, мый нӧ сідз? — бара на серӧктыштіс мамыс.

— Да ми жӧ Колькакӧд лунтыр кутам видзны сылысь ичӧтик чойсӧ, Катенькаӧс. Марина пӧчыс налӧн карӧ муніс вичкоӧ. Аскиӧдз оз лок.

— А-а, со мый инӧ. Молодечьяс. Видзӧ, видзӧ! Ме сизим арӧснад ёна нин кагатӧ видзлі.

— И ми видзам! Бабыс вед кӧсйис вайны вичкосьыс гӧснеч. Прӧскур! Мамӧ, прӧскурыс сійӧ ыджыд-ыджыд торт? Да?

— Нылукӧ, талун тэ асывбыд на серамӧс менсьым петкӧдлан. Прӧскурыс сійӧ тупӧсь кодь, вичкоын вежӧдӧм булки, — воча кыв сетіс мамыс.

— Ой, а ме чайті... — Мисьтӧма вежыньтліс вом доръяссӧ Машук.

— Сідзкӧ инӧ он мун кагатӧ видзны? — Ышловзьыштіс мамыс.

— Кӧсйыси, да кыдз ог мун?! Но и мамӧ тэ, нинӧм гӧгӧрвотӧм.

Мамыслӧн бара петіс долыд нюм. Меліа шылькнитыштіс нылыслысь еджыд, люзьвидзысь юрсисӧ.