ГУСЬКУЛЬЯС
Таво гожӧмыс жар вӧлі да зонпосни вадорысь эз и кайлыны. Войсӧ коллявны сӧмын и волісны гортас. Купайтчӧны да, гожйӧдчӧны да.
Вӧліны и дошлӧй вуграсьысьяс. Габӧ Митя Сергей другыскӧд вугыр шатинкӧд эз и торйӧдчывны. Сӧмын чериыс прамӧя эз шедлы. Та мында араваыс нӧ оз повзьӧдлыны черисӧ? Чилзӧны да равзӧны — сё верст сайӧ, пӧди, чериыс пышйис.
Медбӧрын сёрнитчисны чери кыйысьяс мунны джуджыд кыркӧтш сайӧ. Сэні торкасьысьяс оз лоны, тшук мыйкӧ шедас. Колӧкӧ, и пирӧг пасьта ёкышъяс на самасясны? Сэки небось некод оз лысьт на вылын серавны.
Шуӧма кӧ и — нинӧм нюжмасьны. Аски асывсяньыс и тапиктасны. А сам вылас нидзувсӧ корсьны талун жӧ и пемдытӧдзыс ветласны нюкӧс дорӧ. Сэні важ зорӧд местаяссьыс ой госа лёльӧяс сюрлӧны.
Сергейяс ордын и мыйсюрӧ сёйыштісны-тяпӧдчыштісны да мӧдӧдісны чери сам корсьны. Верст гӧгӧр лоӧ сэтчӧдз. Пода трӧпка нуӧдӧ сикт помӧдз, сэсся Матрен пӧч керка дорті прӧйдитан дай нюкӧсыс и заводитчӧ.
Пӧчлӧн керкаыс ӧткӧн и сулалӧ, сиктса стрӧйбаясысь бокын. Йӧрыс паськыда шевкнитчӧма, топыд потшӧсӧн потшӧма. А потшӧс саяс ӧмидзыс ӧшалӧ, кисьмӧма нин, пев пом гырсяӧсь.
«Ӧтнас олӧ пӧчыс, мый сылы та мында ӧмидзсьыс?» — думыштіс мыйлакӧ водзын ротсьӧдысь Митя да ньӧжмӧдіс воськовсӧ. Сувтовкерис и Сергей. Сылы, буракӧ, тшӧтш чужис мисьтӧм мӧвпыс. Дыр думайттӧг тай и гогнитіс юрнас пӧчӧ йӧрлань да вӧзйис: — А пыралам кӧ?
— Ме ог, ме ог! — Петитчыштіс Митя, — рӧдня миян Матрен пӧчыс. Тӧдлас кӧ батьӧ, бокъясӧс куляс.
— А-а, — шеныштіс кинас Сергей, — тэ нин, трус мешӧк, пыран! Сулав, сідзкӧ, тані. Ме ӧтнам пырала. Тэ сӧмын видзӧд, мед некод оз су. Ачыс пӧчӧыс, пӧди кӧ, гортас и. Петас кӧ, шуам, кильчӧ вылас, тэ меным сигнал сет. Сійӧ зверь кодь скӧр, сюран кӧ сійӧ кабырӧ...
Сергей кӧ мыйкӧ думыштас, оз бара-й бӧрыньтчы. Митя тайӧс тӧдӧ. Повзискодь, мыкталӧмӧн юаліс:
— А кыдзи сигналсӧ сетны?
— Гораджыка раз-мӧдысь кызӧкты дай, — серӧктіс Сергей дай ур моз кокниа звиркнитіс потшӧс саяс. И сылі быттьӧ.
— Сергуня, тэ эн дыр, эн дыр, — кевмысьыштіс на Митя, но мӧдыс эз нин шыась.
Сулалӧ Митя трӧпа вылас пӧчӧ потшӧс дорын, видзӧдлывлӧ сиктлань, оз-ӧ сысянь кодкӧ мыччысь. Да и Матрен пӧчлысь кильчӧ ӧдзӧссӧ колӧ кыйӧдны, друг да петас кӧзяйкаыс.
Ёна дырсӧ эськӧ эз на и дӧзьӧрит Митя, да прӧста сулавнытӧ ӧдйӧ дышӧдӧ. Дӧзмыны кутіс:
«Лешак жӧ эськӧ тайӧ да. Сулав вот татӧн. Сергей, пӧди кӧ, вом тырӧныс чӧскыд ӧмидз апйӧ-а. Тэ дульватӧ ньылав».
Тадз мӧвпыштӧмсьыс ли мый ли збыль горшас мыйкӧ сатшис. Семдытӧдзыс курксіс-кызіс.
«Сергейыс кылӧ оз бара? Шуас, нарошнӧ пӧ тэ. А ме нарошнӧ ли мый? — Маитчыштіс зонка. Друг нем виччысьтӧг мышсяньыс кыліс кирган старука гӧлӧс:
— Купайтчӧны, лунтыр васьыс оз петавны да этадзи курксӧны!
Тайӧ гӧлӧс шыас бергӧдчис Митя да тайкӧ эз весьӧпӧр: Матрен пӧчыс турун нӧбъя сылы паныд кыссьӧ. Кызӧднысӧ кӧть дугдіс зонкаӧс, а мыйкӧ шуны либӧ лыйыштны-пышйыны сідзи и эз вермы. Видзӧдӧ старука вылӧ да думайтӧ: «Но, ӧні сюримӧ!»
А пӧчыс лэдзис турун нӧбсӧ потшӧс дорас, веськӧдыштіс коссӧ да шыасис зонка дорад:
— Ме ӧд пӧрысь бугыльнад ог нин и бура аддзы да, абу-ӧ тэ Митюк, Габӧ Вась вежапилӧн йылӧмыс? Сійӧ и эм. Дитюкӧ, ёна тай нӧ прӧстудитчӧмыд. Вай жӧ пыралам Матрен пӧч дорад, ӧмидза чайӧн юктӧда. Сійӧ зелляыс киӧн босьтас прӧстудатӧ. Ми тэнад пӧчӧкӧд, Ӧдӧття покончакӧд, ёна ӧмидза чайнад чурскӧдчылім, быд висьӧм лечитлім.
Зонкалӧн тай кыв-ворыс татчӧ петіс жӧ кыдзкӧ, нурбыльтыштіс:
— Менӧ оз нин кызӧд. Дай ӧні ог эшты. Нидзув корсьны нюкӧсӧ мӧдім да... — Татчӧ сійӧ джӧмдіс, оз тӧд, мый водзӧ висьтавны, пӧръясьны мудерлуныс абу и, збыльторсӧ висьтавны смеллуныс оз тырмы.
Сергей другыс мездіс. Сійӧ — ушлӧй! Мыччысис, быттьӧ енэжсяньыс друг уси. Котӧртӧ налань, шенасьӧ киас жӧч банкаӧн да горзӧ:
— Мить-ка-а! То, нидзув дозтӧ вая! Гортӧдз котӧртлі! Вунӧма..
Нетшыштчис места вывсьыс Митька сылы паныд, кулаксӧ петкӧдлӧ, синъяссӧ арышталӧ, кӧсйӧ быттьӧ потшны туйсӧ другыслы. Кытчӧ пӧ резан? Он ӧмӧй аддзы пӧчӧсӧ?
Но мӧдыс оз и пыдди пукты сылысь пановтӧмсӧ, стрӧга шуӧ:
— Ризйӧд ме бӧрся!
Сэсся заводитӧ горзыны оз нин Митялы, а мед Матрен пӧчыс кылас:
— Сідз нин манитчим! Котӧрӧн давай!
Сідзи и резӧбтісны пӧчӧ дорті да бердісны трӧпкапӧлӧнса бадь кустъяс сайӧ.
— Со, зонпосниыд том кокъяснас ризӧдісны дай, — ышловзьывліс Матрен пӧч. — Налӧн асланыс шог да мог. Нидзув ӧктыны пӧ тай. Ме-ед, вильшасьӧмсьыс век нин ылаласны.
Колльӧдіс челядьӧс пӧчӧ, вештыштіс потшӧс праслӧсьыс ӧти потш, тювгис сэті турун нӧбсӧ йӧрас, сэсся ачыс вуджис.
А зонкаяс пӧчӧсьыд кокниа мынтӧдчисны да пондісны ӧта-мӧд вылас серавны.
Первойӧн крукасис другыс дорӧ Митя:
— Сергуня, но мый? Гашкӧ, ӧмидзнад чӧсмасьыштамӧ? Кӧсйин жӧ банка тырыд вотны.
Мӧдыс водзӧс сеттӧгыд эз жӧ коль. Ланьт нин пӧ, чӧв ов, мездісны кӧ ӧмидза чайтӧ юӧмысь. Ме пӧ вед абу синтӧм ни пельтӧм, ставсӧ кывлі и аддзылі, кыдзи мыкталін пӧчӧ водзас и.
Артмис кык друглӧн футболӧн мачасьӧм кодь жӧ. Ӧтиыс мӧдсӧ крукыштіс, мӧдыс воча сылы мачсӧ чужйыштіс.
— А йӧй ме, буракӧ, да сійӧн и мыкталі — серӧктіс ас вылас Митя. — Пыри кӧ чайсӧ юны пӧчӧкӧд, гусясьтӧгыс эськӧ ӧмидзтӧ тяпкӧдышті. Гуськульяс ми, гуськульяс.
— Да но, ӧмидз миянлы ковмис, — серам выв лэптіс асьнысӧ и Сергей. — Аски мунам кӧ Джуджыд кыркӧтш саяд вуграсьнытӧ, сэтӧрсӧ сэтысь позьӧ додь тыр вотны да сёйны!
