ГАЖТӦМ

Ичӧт Машуклӧн ыджыд семьяыс водз асывсяньыс разаліс коді кытчӧ. Батьыс трактор дорас муніс, мамыс дворӧ тайтӧяс дорас, пӧльыс чер босьтіс да вӧрӧ мӧдіс. Лена чойыс да Витя вокыс школаӧ котӧртісны дай. Машук да бабыс сӧмын и колины гортас. Да со и бабыс пасьтасьны кутіс. Петыштла пӧ сараяд, картупель бӧрйышта, а тэ пӧ, Машук, ворс гортын, эн некытчӧ пет, кӧдзыд ывлаыс, шлякыша зэр киссьӧ.

— Ме аканьӧн ворсны кута, — збоякодь и кӧсйысис Машук да дзик пыр чача кудсӧ кыскис шкап увсьыс, сюр-сяр разӧдіс чачаяссӧ.

— Со, со... Ворс, дитя, ворс, — кайтыштіс бабыс дай петіс ӧдзӧс мӧдарас. Дзуртыштліс ӧдзӧсыс, воссьыліс да пӧдласис. Лӧнь лои керкаын. Машукӧс друг босьтіс сэтшӧм гажтӧм. Ни аканьыс, ни мукӧд мича чачаяс эз гажӧдны ловсӧ. Окота лои вӧтчыны бабыс бӧрся. Но бабыс ӧд тшӧктіс гортас ворсны. Дӧзмас, он кӧ кывзысь. Сывъяліс нывка муса аканьсӧ дай пондіс лимзыны-бӧрдны. Но регыд сылы юрас воис мӧвп. Лӧнис. Водтӧдіс аканьсӧ, ӧввӧ-бай сьылыштіс да сэсся бабыс гӧлӧсӧн шыасис:

— Узьышт, дитя, ме петала сарайӧ. Регыд бӧр локта, эн бӧрд. Сюйис кокас чойыслысь ыджыд тапки да шлёп-шлёп пасьтӧгыс и петіс посводзас. Сарайӧ катӧдан пос тшупӧдсянь и горӧдіс:

— Ба-а-бӧ!

Сараяс вӧлі рӧмыд, пемыдгорув кодь, ван восьса звӧз ӧдзӧсті пӧльтіс скӧр тӧв. Сарай джодж пасьта пасьвидзис ыджыд картупель чукӧр. Сэні и ноксис бабыс. Аддзис Машукӧс, броткӧдчис:

— Куш кокчӧрнад тай нӧ! Лешакпи, мыйла нӧ петін?

— Ме... Ме нӧкъя нянь кӧсъя!

— О господи, ӧні на сёйим да! — шензьыштіс бабыс, но эз понды пыксьыны, эновтіс картупель ведрасӧ, веськӧдчис посводзлань. — Лок, титимера. Пыр вай, гегдан!

Пырисны. Бабыс эз и пӧрччысь, мыськыштіс кисӧ да шӧрыштіс ыджыд шӧрӧм, мавтіс нӧкйӧн, сетіс Машуклы:

— На, сёй, да сэсся ӧбедайтны мамыд регыд воас.

Бабыс эз и дыр манитчы гортас, «ме петыштла на нӧшта» шуис да бара петіс. Машуклы бӧр гажтӧм лои. Кӧть тэ мый кер, ымзӧ сьӧлӧмыс дай став. И нӧкъя няньыд оз пыр вомас.

Чӧвлы жӧ... Ӧні Машук абу нин йӧй, оз понды гортас никсыны-бӧрдны, петас сараяс бабыс дорӧ. Сӧмын пасьтасьны колӧ. Кыдзи мый кужис да артмис, пасьталіс вылас дай петіс сараяс.

— Ба-а-бӧ!

Бабыс юаліс шензяна:

— Бара нӧкъя нянь ковмис?!

— Э-эз. Ме, бабук, петі тэныд отсасьны.

— Отсасьысь... — серӧктіс бабыс да медводз ныр увсӧ нывкалысь чунь помнас чышкыштіс, сэсся выльысь пасьтӧдіс-кӧмӧдіс да вӧлись шуис:

— Ладнӧ инӧ, отсась. Со мыйта картупель колӧ бӧрйыны.