БОНЯ-БОНИФАЦИЙ

Гуляйтігас Серёжа аддзис няйт канаваысь понпиӧс, пыртіс гортас, чукӧстіс мамсӧ:

— Мамӧ, мамӧ, видзӧдлы! То кычипи ме аддзи!

Мамыс дӧзмыштіс: — Мукӧдыс шыбитӧны, а тэ ваялан. — Но водзӧ эз жӧ кут пинясьны, аддзис ичӧтик коньӧркодь понпитӧ, жальыс петіс:

— О-лё-лёль! Синтӧм на, буракӧ. Чожа вай шоныд ваӧн мыськышт, да йӧлӧн юктӧдам.

Купайтчӧм да шоныд позйын узьӧм бӧрын, аскинас понпи збоякодь нин варгылясис джодж кузяыс. Серёжалӧн радыс!

— Быдта да кыйсьыны кутам вӧрӧ ветлыны, — кайтіс сійӧ да сӧветуйтчис мамыскӧд, кутшӧм ним пуктасны.

— Вай Бонифаций ним пуктам. Но, мамӧ?

— Ме пондаысь... Мед, колӧкӧ, лоӧ Бонифаций.

Ӧдйӧ сӧвмис Серёжалӧн быдтасыс, но ичӧт рӧд вӧлӧма да эз и ыджыда быдмы, явнӧ абу вӧралан пон. А сідзсӧ зэв визув да тӧлка, быд кыв гӧгӧрвоӧ. Кампеттӧ мыччан, да лӧсьыда и служитас.

Ӧтчыд Бонифаций вошлі кытчӧкӧ лун-мӧд кежлӧ. Шогыс Серёжалӧн: воши кӧ? А гашкӧ, абу нин ловъя?

Ловъя, эз вош. Локтіс гортас, сӧмын та бӧрын быдмыны кутіс кынӧмыс.

— А сё лешак, Бонифацийыд Боня вӧлӧма! — скӧраліс мамыс, кор Бонифацийлӧн чужис ичӧтик пи. — Кытчӧ гажыд вошты понписӧ. Мый ми пондам керны сы мында поннас? Нӧшта на вед мӧдысь дай коймӧдысь ваяс.

— Оверин Шуриклы сетам, сійӧ корӧ, — лӧньӧдіс мамсӧ Серёжа. Но Шуриклӧн мамыс кыккокйыв сувтіс, кор Серёжа вайис на ордӧ мусаник понписӧ. Ог пӧ лэдз гортӧ и ставыс. Нуӧ пӧ базарӧ да козьналӧй кодлыкӧ.

— А збыль, вай базарӧ и нуам, — вӧзйис медбӧрын другыслы Шурик.

И со кык друг базарынӧсь. Ӧдйӧ и кытшалісны найӧс челядя мамъяс да зонпосни. Видзӧдӧны-любуйтчӧны мусаник понпинад, а босьтны некод оз кӧсйы.

Жугыльмисны нин зонкаяс, да друг кыськӧ явитчис ӧчкиа дядьӧ, гажа гӧлӧсӧн юӧртіс: — У, меным тайӧ и колӧ! — Да босьтіс понпитӧ киас, юаліс: — Вузаланныд?

— Да, — яндысьӧмпырысь нурбыльтіс Серёжа.

— Кутшӧм пӧрӧда нӧ эськӧ? Ай-мамыс кодъяс? — водзӧ юаліс дядьыд.

Серёжа и кывсӧ шуны эз удит, Шурик другыс пыр и ордйӧдіс:

— Зэв бур пӧрӧда! Служитны кужӧ и быдӧн! Серёгаяслӧн Бонифацийыс вайис.

Дядьыд гӧрӧктӧмӧн серӧктіс:

— Збыль тай бур пӧрӧда, Бонифаций кӧ вайис! Но, зонъяс... Уна-ӧ нӧ коранныд? Вежапи менам аски именник, пӧнимаете ли...

Бара на Шурик суитчис сёрниас. Серёжа сӧмын лапйӧдліс синъяссӧ.

— Дядь, сетан кӧ кык тысяча, ой, зэв бур лоӧ! — дзикӧдз варовмис Шурик. — Ӧти тысячасӧ со Сергейлы, мӧдсӧ — меным.

— Ах да, ті кыкӧн, — нюммуніс дядьыд да кыскис портманетсьыс вит тысячаа, мыччис Шуриклы: — Нате тіянлы и в расчёте будем, да, зонъяс?

Вит тысячаа босьтігмоз Шурик первойсӧ падмыштліскодь, а сэсся паськыда вашмуніс да сюся видзӧдліс Серёжа другыс вылӧ — аддзан пӧ ме кутшӧм, мекӧд пӧ он пропадьты.

Гортланьыс збоя восьлаліг кык друг варовитісны. Шурик кайтіс: — Тэнад Бонифацийыд нажӧтка на тэд пондас вайны.

Серёжа сійӧс пановтіс:

— Ӧні абу нин Бонифаций. Мамӧ Боняӧн нин тшӧктіс шуны.

Сійӧ гӧлӧсын кыліс жуглясьӧм и ӧттшӧтш радлун. Абу ӧмӧй ӧткодь, кыдз кӧть шу нёль кока другсӧ. Главнӧйыс, сійӧ эм, и мамыс ӧні оз кут на вылӧ ропкӧдчыны. Нӧшта эм Серёжалӧн мӧд друг, со этайӧ орччӧн восьлалысь Шурикыс, коді пыр локтас сы ордӧ отсӧг вылӧ.