* * *

Шувгӧны пожӧмъяс, сьылӧны,
Укайтысь нывкалысь гӧлӧссӧ кылӧмны,
Мырпома нюрйысь со яг вылӧ петіс,
Шенмунӧм ныр-вомас нюм пыр и петіс.

Чатӧрӧн видзӧдіс эстчаньӧ вылӧ,
Югыдлӧз енэжас шонді кӧн сылӧ,
Котралысь тӧврулӧн горыс кӧн кылӧ,
Чатӧра пожӧмыс кодкӧд тшӧтш сьылӧ.

Шувгӧны пожӧмъяс. Нывкалы долыд,
Тӧдӧ ӧд: пожӧмлӧн радлӧ тшӧтш лолыс,
Нывка пӧ воис, гӧлӧссӧ кылім и,
Тэныд пӧ, мусаник нывкаӧй, сьыламӧй!

Сьыв тшӧтш пӧ миянкӧд, котрав яг пасьтаыс,
Радлунтӧ, серамтӧ быдлаӧ кой,
Ягыслысь козинсӧ, яг рыжик, ӧкты,
Ми йылысь паметьсӧ ас пытшкад коль.

Быдӧн тай радлунсӧ тӧдӧ да виччысьӧ,
Этатшӧм козинлы код абу рад?
Аттьӧ жӧ тіянлы, пожӧмъяс, аттьӧ!
Ӧкта дай котӧрта, гортӧ мен кад!

Нӧшта на вола ме ті дорӧ арнас,
Дона гоб ӧкта пестерӧй тыр,
Тӧвнас ме тіянӧс казьтывны кута,
Вежӧрын, донаяс, лоанныд пыр.