ПОЖӦМА ЯГЫН

Васӧд нюрйысь кос ягӧ кор петан,
Он и тӧдлы, ыджыд ышлов сетан,
Морӧс пытшкад радлуныс нин горзӧ,
Гажа нюмыд вомдоръясад ворсӧ.

Пожӧмъясыс!.. Пожӧмъясыс сьылӧны!
Вильыш тӧлыс юрсӧ налысь сыналӧ,
Багатыръяс долыдысла мургӧны,
Тӧвруыслысь мелілунсӧ кылӧны.

Дерт, и бурсӧ эсылы то сиӧны,
Став олӧмсӧ му вылас код лӧсьӧдіс,
Козьнавліс код шондісӧ и тӧврусӧ,
Жар гожӧмсӧ, кӧдзыд тӧвсӧ, тулыссӧ.

Горш косьмигӧн шоныд зэрӧн юктӧдліс,
Аръявылыс вотчысьясӧс вайӧдліс,
Кынмалігас небыд лымйӧн шебрӧдліс,
Омлялӧмӧн, тӧв отсӧгӧн баййӧдліс.

А кор гым-чард енвевт шӧрсӧ поткӧдліс,
Ызгысь зэрӧн такӧдліс да эскӧдліс,
Туганъясыд вежджыкӧсь пӧ лоӧны,
Шондіыслы зумыдӧсь пӧ коланныд.