ПЕТРӦВАНЛӦН СЕМЬЯКильчӧ помас курӧгъяслы Пӧчӧ шыдӧс койис, Кокасьнысӧ ӧти гулю Кыськӧ пыр и воис. Сэсся жбыр-лэбыштіс пышкай, Бӧрсьыс мӧд дай коймӧд... Кортӧм гӧсьтъяс чӧлӧй стабун! Юрыд татчӧ кольмас! Пӧчӧ лапкерыштіс кинас, Сэсся вашмуніс вомтырнас: — Ӧктысьӧй жӧ! Ставлы тырмас! Шыдӧс кудйӧй менам тыр на. Гӧсьтъясыд тай сатшкысисны, Гулю вылӧ чирышсисны, Тайӧ нурыс пӧ зэв бур, Сӧмын оз миянлы сюр — Гулюыс пӧ ӧтнас зобъяс. Со нӧ кутшӧм сылӧн зобйыс! Весась, буди, гулю, тась! А то чашъям тэнсьыд пась! Петрӧван тай аддзӧм тайӧс, Шул-шел лэбис потшӧс сайысь, Горзӧ-равзӧ: — Кут! Кута-а! Кыланныд-ӧ, мелкота! Горзӧм шысьыд пышкай чукӧр Ушумгайтчис ӧти здукӧн, Гулю ӧтнас коли, Нюжйӧдлыштіс голя: — Петрӧван, тэ лӧньышт вай! Эз нин коль ни ӧти кай! Кӧнтусь сера чипан-мам, Став семьянас лоӧ тан. Со нӧ найӧ ватликтӧны, Мамыс бӧрся гӧгыльтчӧны, Вижов пушыд ёкмыльяс, Артавны кӧ, гашкӧ, дас! Бать тэ налы, Петрӧван! Быдтасъяскӧд ло тэ рам! А ме дзик пыр лыддя найӧс, Абу сьӧкыд меным тайӧ. Ӧтик, кык, куим, нёль... Бӧрынджык со нӧшта нёль! Нёль да нёльыс мыйта лоӧ? Тайӧс мӧвпыштлыны колӧ. Чайта: кык нёльыс — кӧкъямыс, Ӧкмысӧдыс лоӧ Мам, Дасӧдыс тэ, Петрӧван! Арталіссӧ — Гулеван! Дерт жӧ, тшӧтш и пӧчӧ, Тонӧ сійӧ, век на тан, Кильчӧ помас жӧдзӧ.
