КЫСУЛЬӦЙ ДАЙ КАНИЛЬӦЙ

Бабӧ кильчӧ помын куткырвидзӧ Кыстур да горӧн омлялӧ-бӧрдӧ:

Коньӧрӧй ме кысунь,

Ой-я жӧ дай ой-я,

Вӧтліс менӧ бабӧ,

Муртса нин ме ловъя.

Буретш сэті котӧртӧ лапъя пеля Катшыс, аддзис Кыстуртӧ, юалӧ:

Ув-ув-ув! Кысуньӧй,

Шыльыд гӧна канильӧй,

Кутшӧм шог нӧ суис?

Лытӧ код нӧ гуис?

Кысук вочавидзӧ:

Няв! Няв! Катшыс другӧй,

Дзикӧдз абу шудӧй,

Эн пыр мекӧд венӧ,

Жалитышт тэ менӧ.

Ӧтчыд сӧмын баблысь

Нӧк кашниксӧ видлі,

Бабӧ менӧ гортысь

Шулки-пелки вӧтліс.

Кӧні кута овны?

Мый ме кута сёйны?

Ой-я да и ой-я,

Кодлы ӧні мойдны?

Катшыс аслыс:

Коркӧ эськӧ менсьым

Синмӧс чуть эз перйы!

Да нӧ шудтӧм ёртӧс

Кыдзи нӧ он дорйы!

Кысуклы:

Со тай менам чомйӧй,

Век кӧть кургы-мойд,

Овмӧдчамӧй кыкӧн,

Ог ме тэнӧ дойд.

Кута вайны тэныд

Быд лун чӧскыд лы,

Колӧк, мургы-вильӧд,

Ог и сетлы шы.

Кыстур радпырысь кутыштлӧ да окалӧ Катшысӧс:

Ог ми воӧй зыкӧ!

Вильӧдамӧй кыкӧн!

Кыстур йӧктігтыр ветлӧдлӧ чом дорті, радлӧ:

Олышта тэ ордын,

Быттьӧ аслам гортын!

Аттьӧ, Катшыс другӧ,

Ёртасьӧм ог дзугӧй!

Кыстур тюв-пырӧ чомйӧ. Катшыс радысла тшӧтш йӧктыштӧ:

Тара-тара-тара-рам,

Ӧні абу ме ӧтнам,

Войбыд тавой кыкӧн

Стӧрӧжитны кутам!

Эз на удит помӧдз радлыштны Катшыс, Кыстур бӧр нин брысь-петіс чомйысь, нӧшта ёна бӧрдӧ:

Ок, вольпасьыд тэнад

Зэв чорыд да мисьтӧм,

Ассьым пасьӧс сэні

Ӧти здукӧн кисьта.

Бӧрдігтыр кысуньыд и муніс кытчӧкӧ. Катшыс синнас лапйӧдлігтыр видзӧдіс сылы бӧрсьыс:

Со нӧ кутшӧм сійӧ!

Кутшӧм сійӧ ёрт!

Сьӧлӧм вылас сылы

Эз во менам горт.

Ӧти кыв ог шулы,

Ньӧти шы ог сет.

Татшӧм ёртыд, вокъяс,

Мунас кӧ, и мед!

Жугылиника пырӧ чомъяс.

А кысук мунӧ водзӧ да бӧрдӧ горӧн. А сэні буретш Петук-Петрӧван кутшкӧдчӧ да горзӧ-чуксасьӧ:

Крутш-крутш-крутш, кикируллю!

Аддзис бӧрдысь кысуньӧс, юалӧ:

Кикируллю, кысуньӧй,

Кысульӧй дай канильӧй,

Мыйла нӧ тэ бӧрдан!

Кутшӧм могысь лӧвтан!

Кыстур вочавидзӧ:

Няв-няв, Петра другӧй,

Дзикӧдз абу шудӧй,

Эн пыр мекӧд венӧ,

Жалитышт тэ менӧ.

Ӧтчыд сӧмын баблысь

Нӧк кашниксӧ видлі,

Бабӧ менӧ гортысь

Шулки-пелки вӧтліс.

Катшыс дорӧ ветлі,

Пиняс сылы шедлі,

Удиті жӧ кыдзкӧ

Мынтӧдчыны лэчкысь.

Петя-Петрӧван аслыс:

Кутш-кутш-кутш-кутш, кутшӧм срам,

Катшысыс быттьӧкӧ-й рам.

А со, вӧлӧм, кутшӧм,

Каньӧс эльтны кужӧм.

Кысуклы:

Дугды бӧрдны, кысульӧ,

Дугды лӧвтны, канильӧ,

Ог ме сюйсьы венӧ,

Ог и эновт тэнӧ.

Гортӧ нуа, чипан позйӧ,

Дас кык сильӧпи

Нӧшта быдтам ми.

Кӧнтусь сера чипан

Кысукӧс тшӧтш видзас.

Найӧ мунӧны. Водзас зэв тшапа восьлалӧ Петрӧван, бӧрсьыс вӧтчӧ кысук. Воисны чипан поз дорӧ, кысук заводитіс ошкыны позсӧ:

Ок и мича тэнад куд!

Тані овны ӧти шуд!

Быттьӧ вои гортӧ,

Петя-петук ордӧ!

Позйысь петӧны чивзігтыр сильӧпиян да накӧд кӧнтусь сера чипан.

Кот-кот-кот...

Кот-кот-кот...

Кодкӧ кӧ кылӧ-а!

Петук:

Гӧтыр, повзин! Тайӧ ме,

Тэнад верӧс — Петя.

Тшӧтш и мекӧд локтіс то

Кысунь, зэв бур гӧсьтя.

Петя-Петрӧван индӧ гӧсьтя вылас, а кысукыд аддзис сера чипантӧ да заводитіс петитчыны, а сэсся и уйкнитіс-пышйис. Петук нинӧм эз гӧгӧрво да шензьыштіс:

Мый нӧ тайӧ!

Гӧсьт, тэ кытчӧ!

Кань пышйигмоз воча горӧдӧ:

Тонӧ шыр, а ме ӧд кань,

Шырыс бӧрся вӧтча!

Чипан горзӧ:

Кутш-кутш-кутш!

Кут-кут-кут!

Тайӧ шышыс менсьым

Сильӧпиӧс гуис!

Петук:

Тайӧ гуис менсьым пи!

Сюрлан меным, аняби!

Петук, чипан и став сильӧпиыс вӧтчӧны кань бӧрся, кӧсйӧны сійӧс кокавны. Сӧмын каньтӧ кутсис. Кокыс муас оз волы — пышйис каньыд дай коркӧ-некоркӧ мудзис, сувтіс, пошкӧ да кашкӧ:

Ой-ой-ой, коля татчӧ коктӧг,

Уф-уф-уф, шойччӧдышта лов кӧть.

Видзӧдӧ гӧгӧрбок, а гӧгӧр — сьӧд вӧр. Повзьӧ да бара бӧрддзӧ:

Мый нӧ тайӧ?

Кӧн нӧ ме?

Кытчӧ нӧ ме локті?

Гӧгӧр шувгӧ пемыд вӧр,

Сиктӧ кыдзи муна бӧр?

Мыр сайсянь кыліс серӧктӧм шы, сэсся мыччысис пель. Кысук зэв ёна повзис:

Тонӧ кодкӧ,

Кодкӧ эм!

Тані-й помала ме нэм (бӧрдӧ).

Блянсйигтыр петіс мыр сайысь кӧчиль:

Эн, эн пов, ог сёй ме тэнӧ.

Вай жӧ висьталышт тэ меным,

Коді тэ да кытысь воин.

Кань вочакыв сетӧ:

Эн, эн юась ӧні нинӧм,

Сӧмын висьтала ме нимӧс.

Кысіль-каниль лоа,

Шуд корсьны со воа.

Ӧтчыд сӧмын баблысь

Нӧк кашниксӧ видлі,

Бабӧ менӧ гортысь

Шулки-пелки вӧтліс.

Катшыс дорӧ ветлі,

Пиняс сылы шедлі.

Коньӧрӧй ме кысунь,

Муртса лэчкысь мыні.

Курӧг корліс овны,

Сильӧяссӧ видзны,

Скӧр петукыс налӧн

Син кокыштіс — видзлы.

Кӧть ме и лев рӧдысь,

Ачым полысь-родысь (бӧрдӧ).

Кӧчиль:

Мыйла ойзан,

Ов ме ордын,

Менам керка быд лап улын,

Пырам со нӧ коз пу улас.

Кань:

Сё пасибӧ тэд, кузь пель,

Нэм ог вунӧд буртӧ.

Тані менам гортӧй,

Лоа тэд бур ёртӧн.

Пырӧны коз пу улӧ.

Кӧчиль:

Шойччы, кысунь, вай да шонтысь,

Лыддьы асьтӧ рӧднӧй гортысь...

Друг кӧчиль заводитӧ дрӧжжитны:

Ойя, ойя, руч со локтӧ!

Ковмас эновтлыны гортӧс,

Пышйы, кысуль, пырысь-пыр,

Ручыд оз и сёрнит дыр.

Лыйыштіс кузь пельыд, кань сӧмын и аддзыліс сылысь мышсӧ.

Кысуль:

Аттӧ дивӧ, руч пӧ локтӧ,

Ме ог аддзы звер ни мортӧс.

Гӧгӧрпӧв видзӧдлӧм бӧрын водӧ-нюжгысьӧ нитшпод вылас:

Ой-ой-ой, тан кутшӧм небыд!

Куйла-нежитчышта недыр...

Коз лап улӧ бырснитӧ-пырӧ руч, кашкӧ, гӧгралӧ синнас, аддзӧ куйлысь кыстурӧс:

Тэ нӧ коді? Тэ нӧ мый?

Мыйла кузь пельсӧ эн кый?

Кысук, вольпассьыс чеччывтӧг:

Мыйла кузь пельсӧ эг кый ме?

Да тэ, чойӧй, эн на йӧймы?

Кӧчиль менам медбур друг,

Кӧин дорӧ тюрис тшук.

Талун кӧчиль именича,

А ме гортсӧ сылысь видза.

Чеччӧ:

Кысіль-каниль ачым ме.

А тэ коді? Коді тэ?

Коді тэнӧ татчӧ корис?

Руч мудера:

Каниль, он жӧ тадзи шу,

Ог ме нинӧм татысь гу,

Кузь пель йылысь сӧри прӧста,

Сійӧ меным медбур тӧдса,

Жаль, мый кӧчильӧс эг су,

Вайи сылы платтьӧпу.

Кыстур:

Локтін кӧ нин, пыр да пуксьы,

Пушыд бӧжыд мед оз дзугсьы,

Этатчӧ со — нитшпод вылас,

Кӧчӧ-чойӧ дзик пыр воас.

Руч пуксьӧ кань дорӧ матӧджык:

Воас? Сідзкӧ, виччысьла нин,

Кӧзяйкалы мыччысьла нин.

Руч гильӧдӧ каньлысь бокъяссӧ, юрсӧ, нетшкӧ уссӧ. Кань дӧзмис, чапыштіс ручлысь ныр-вомсӧ:

Тырмас дэльӧдны тэд каньӧс,

Левлӧн рӧд оз радейт тайӧс!

Со нӧ локтӧ, кылӧ, ачыс,

Сыкӧд менам друг, пон Катшыс.

Руч тойыштӧ каньӧс дінсьыс, тэрмасьӧ:

Катшыс? Вот бӧлбаныд!

Муна сылы паныд!

Уйкнитіс руч, лыйыштіс вӧр пуяс костӧ. Кысук:

Ок-ок-ок, ёкмарьёк!

Кутшӧм тэрыб сылӧн кок!

Буракӧ, и меным

Усйысьны жӧ колӧ,

Ой-я жӧ да ой-я,

Кытчӧ-й бара тюрны!

Ӧдйӧджыка пышъя,

Мед жӧ нин оз суны!

Кысунь уськӧдчӧ коз пу улысь пышйыны. Пышйис-пышйис дыр, сувтовкерис, видзӧдлывлӧ мышкас, оз-ӧ кодкӧ вӧтчы:

Пышйи! Эбӧсӧй нин бырис,

Лолӧй весиг ставнас тырис,

Бабӧлӧн зэв муса сыв.

Муна, сылысь прӧща кора.

Няв-няв! Сьылышта зэв нора,

Абу ӧмӧй ме

Небыд, мича, шань,

Абу ӧмӧй бабӧлӧн

Шӧвк тупыль кодь кань!

Дона челядь, кыдзи ті чайтанныд, прӧститас оз менӧ бабӧ? Лэдзас оз бӧр гортас? Прӧститас кӧ, ог сэсся некор нӧк кашниксӧ исышт, кута амбарсьыс шыр кутавны да прӧст кадӧ бабӧ дорын куйлыны, кургыны-мойдны сылы мича-мича мойд. Да и Катшыс понкӧд миритчыны колӧ, петуклысь да чипанлысь прӧща кора и.

И тіянлы, челядь, аттьӧ видзӧдӧмсьыд да кекӧначалӧмсьыд. Няв! Няв! Няв! Аддзысьлытӧдз. Муна баб ордӧ. Мыссьышта сӧмын и муна.