ЗАРНИ АР

Ар локтіс, ар! Зарни коръяса ар!
Ыркыд тӧвруыс бандзибӧс нюлӧ,
Векни ордымыс кытчӧкӧ вӧрас век нуӧ,
Сьӧлӧм морӧсын радысла варкйӧмӧн пуӧ.

Вӧрыс зарнисӧ кок улӧ койӧ.
Мый нӧ вашкӧдан, кыдз пуӧ, чойӧ?
Пасьтӧг кольӧмысь полан да бӧрдан-ӧ?
Бурджык сьыв, пока шоныд. Тэ кылан-ӧ?

Регыд вой тӧлыс швичкыны кутас,
Да ӧд сійӧ жӧ толанас тыртас,
Лоӧ вевт тэныд да шоныд шебрас,
Он и казявлы — тулыс бӧр локтас.

Таво, майбырӧй, тшак петӧм мыйта!
Тшаксӧ ӧктігмоз вӧртіыс шӧйта,
Менам пестерӧй лои нин тыр.
Мича гӧрд гобӧй, чуманӧ пыр!

Векни ордымыс уйӧ, век уйӧ,
Регыд петкӧдас гортланьӧ туйӧ,
Енмӧй, донаӧй, висьтав тэ меным,
Меысь озырыс кодкӧ нӧ эм-ӧ?

Муна-шалскӧда, восьласӧй тшап,
Зарни — кок улын, пестерын — тшак.