ДРӦЧКА ЛЕНА

Чеччалӧ да бӧрдӧ Лена,
Он пӧ радейтӧй ті менӧ,
Мамук, ог шу тэныд «аттьӧ»,
Ньӧбӧмыд сӧмын кык платтьӧ.

А ме кӧсъя нёльӧс, витӧс,
Гӧрдӧс, лӧзӧс, турунвижӧс...
Абу ме гут кулан тшак,
Ӧшкамӧшка кодь ме тшап.

Нӧшта кӧсъя шоныд пась,
Тӧв кежлас мед вӧлі дась!
Да мед пасьыс дона куысь! — 
Кокнас зымнитіс тадз шуысь.

Кӧсъя! Кӧсъя... Кӧсъя... Кӧсъя...
Кӧсйӧмыслы абу пом,
Быд лун сылӧн выльтор кӧсйӧм,
Дрӧчка оз и тупйыв вом.

Кӧсъя тупли джуджыд бӧра,
Кӧсъя Барби, да мед вӧрӧ!
Кӧсъя «Орбит», шакалад,
Яблӧг, груша, виноград...

Батьлӧн паськавлӧны синъяс,
Мамлӧн доршасьлӧ нин синва,
Ӧтчыд пӧльыс пыртіс ньӧр,
Гӧлӧс сылӧн лои скӧр.

— Этайӧстӧ кӧсъян он?
Ыждавнытӧ дугдан он?
Кӧсъян кӧ, и швуч-вач вӧча!
Мышкутӧ малышта стӧча!

Дрӧчкалы забеднӧ лои,
Мамыс дорӧ лажгис-воис,
Босьт пӧ, мамӧ, менӧ киад,
Пӧльӧыд пӧ менӧ виӧ!

Татчӧ сюйсис тшӧтш и пӧчыс,
Гашкӧ, пӧльӧ ног пӧ вӧчлам?
Тырмас такӧд тӧршасьны!
Дугдас дрӧчка горшасьны.