ВӦТ

Ӧтчыд ме чер босьті, мӧдӧдчи вӧрӧ,
Восьлала, видзӧда: водзвылын кодікӧ вӧрӧ,
Дзоръяла гӧгӧрбок, вӧрыс зэв сук,
Шенмуні, сё морӧ, ош тайӧ тшук!

Мый эськӧ, тані кӧ чергӧдны ошкӧс?
Чабрала чер вороп, малала тошкӧс.
Ошкыд и горӧдіс: — Эн вай тэ дзӧр!
Тошка кӧ, петкӧдлы, кутшӧм тэ скӧр!
Кӧсъян кӧ чергӧдны ӧні жӧ тан,
Чожа вай петкӧдлы ассьыд бур сям.

Кыдзи тай шеновті черӧн, а ошкыд
Кок йывсьыс пӧри дай сьӧкыда пошкӧ:

— Верман кӧ, менӧ гортад тэ ну,
Сямман кӧ, быттьӧнӧсь, куль менсьым ку,
Кужан кӧ пусьыны, ог нинӧм шу,
Ай-мамлы, чой-воклы чӧскыд шыд пу.

Дзик пыр ме моздорӧ кватиті оштӧ,
Ӧнітӧ некор нин малавны тоштӧ,
Кыски ме горт дорӧдз, шыбиті брун,
Он нин тэ ӧні некытчӧ мун!
Лоан тэ менам дас пудъя яй,
Чожа вай ачыд пос кузя кай!

Помнита, ачым ме пос кузя кайи,
Помнита, горӧді: — Ошкӧс ме вайи!
Тані и вӧлӧма бур вӧтлӧн пом,
Сӧмын тай эг вермы тупкыны вом,
Садьми да век горза: — Кут, мамук, кут!
Ошкыс мед кок йылас бӧрсӧ оз сувт!

— Мый тэкӧд, пиукӧ? — повзьӧма мам. — 
Абу жӧ некутшӧм ош миян тан,
Дзизгӧ да дӧзмӧдчӧ войбыд тай гут,
Сӧмын ӧд пемыднас сійӧс он кут.
Вод бӧр да узьышт на, узь, дитя, узь,
Ывлаыс пемыд на, арся вой кузь.