ВОГӦГӦРСА КАРУСЕЛЬ

Гӧгыльтчӧны, быгыльтчӧны,
Мӧда-мӧдсӧ тэрмӧдлӧны
Тӧв да гожӧм, тулыс, ар.

Тӧв да гожӧм... Тулыс... Ар...
Тӧвнас вой тӧв вывті яр,
Гожӧм бара вывті жар,
Арнас помся киссьӧ зэр,
Тулыс — сійӧ тшап тай зэв!
Вӧччас-пасьтасяс да чайтан,
Райыс пӧ тай вӧлӧм татӧн!

Коді тэныд медся любӧ?
Висьтав меным, ичӧт другӧ.
Ме тай бӧрйи, да эг аддзы,
Мый тэ эськӧ шуан татчӧ?

Нӧшта висьтав, вильышпоз:
Радейтан-ӧ коляоз?
Кодыр кисьмӧ сьӧлаоз?
Кодыр дзоридзалӧ льӧм?
Коді оз и вежлы рӧм?
Коді тӧвнас узьӧ гуын?
Коді уялӧ ва улын?
Кодыр челядь купайтчӧны?
Кодыр чойсянь исласьӧны?

Чайта, ставсӧ нин тэ тӧдан,
Арнас школаӧ нин мӧдан.

Но, а пока эн на мун,
Гожъяв, купайтчы быд лун,
Оз да мырпом вот зэв уна,
Тшактӧ вотны эн жӧ вунӧд.

Со ӧд мыйта вичмас шудыс!
Гожӧмлӧн кӧ тамда уджыс.