ЧЕЛЯДЬ СЁРНИЫСЬ

* * *

Машӧ пуксис вышивайтчыны. Лена чойыс горзӧ мамыслы:

— Мамӧ, мамӧ! Миян Машӧыд сэтшӧма Енлы эскӧ!

— Мед, бласлӧ Кристос. Тэ кытысь тӧдан?

— Со мыйта крест нин вӧчис. Лӧз сунисӧн и гӧрдӧн.

* * *

Батьыс ичӧт Борисӧс босьтіс карӧ. Мунӧны уличаті.

— Пап, а кыдзи тайӧ уличыс шусьӧ?

— Бабушкина.

— А дедушкинаыс кӧні?

* * *

Пӧчӧ нукыскӧд гуляйтӧны садйын. Друг бабыс ойӧстіс да кутчысис коскас:

— Ой, коскӧ лыйыштіс!

— Тэ пистолет гыньыктін?

* * *

Ира узьны водігас шыблаліс паськӧмсӧ кытчӧсюрӧ. Мамыс шуис:

— Идӧртӧм Сидӧр тэ, нылук.

Ира дзик пыр став паськӧмсӧ тэчис улӧс юр вылӧ, тшапа шуис:

— Ӧні ме бӧр — Ира!

* * *

Асывнас мамыс чӧсмӧдліс челядьсӧ гранатӧн.

Рытнас ичӧт Олег пондіс корны:

— Мамук, эсытшӧм гӧрд пистолеттӧ вайышт нӧшта.

* * *

— Талун менам праздник! Март кӧкъямысӧд лун! — юӧртіс асывнас мамыс.

— Праздник кӧ, мыйла ёлкатӧ ог вӧчӧй? — юаліс пиыс.

* * *

Батьыс чирыштіс писӧ:

— Менсьым юавтӧг кӧ кутан чуткыны телевизорсӧ, ме тэныд петкӧдла пуж!

Пиыс радлыштіс:

— Сідзкӧ, гожӧмбыд на кута видзӧдны мультикъястӧ!

— Мыйла гожӧмбыд?

— Пужъялас арнас сӧмын.