ТЕШКОДЬ СЁРКНИ
Машук локтіс школасьыс, а бабыс буретш град йӧрас. Аддзис нучкасӧ, радлыштіс:
— А-а, воин, школьнича! Лок, дитя, отсышт бабыслы. Заводиті морков кӧдзны, да ылӧдлӧмаӧсь, буди, кӧйдыс вузалысьясыс. Сёркни веськалӧма.
— Сёркниыс лёк ли мый? Ме радейта сёркнисӧ! — шыасис нучкаыс.
— Абу эськӧ да... И сёркни згӧдник. Но, деливӧ тай мыйкӧ лои...
Бабыс падъялыштіс на мыйкӧ дыра, а сэсся шеновтіс кинас:
— Кӧдзам, инӧ, Машук! Мыйкӧ быдмас жӧ! Тэ тайӧ град помсяньыс заводит, а ме мӧдар помас кӧдзышта.
Сідзи и вӧчисны баба-нучкаа да пондісны виччысьны, мый петас. Сёркни ли, морков ли. Мед сӧмын абу ёг турун-а.
— Бабук, эз на пет? — быд лун юасьліс Машук да кытшовтліс град йӧрсӧ.
И со лун дас мысти Машук аддзис веж петас. Коръясыс морковлӧн кодьӧсь.
— Морков жӧ тай вӧлӧма, — нюмъяліс бабыс петаснас любуйтчиг. — Абу жӧ пӧрйӧдлӧмаӧсь, весьшӧрӧ эляси. Шуисны ӧд и эм сетігас, мун да пӧ дзик пыр и кӧдз, эн кӧтӧд ни нинӧм. Тайӧ пӧ «дӧрӧмӧн пасьтӧдӧм» кӧйдыс. Бур пӧ. А бура со и ӧдӧбсьӧмаӧсь петасъясыс! Слава Богу...
Баба-нучкаа ёна зілисны, бура чередитісны веж петасъяссӧ. И со... Аръявылыс, морков град дорті прӧйдитігӧн, бабыс аддзис морковъяс пӧвстсьыс ыджыд, мича, виж бокъяса сёркни. Но мыйлакӧ сёркнилӧн корйыс вӧлі морковлӧн кодь жӧ.
— Но-о, кутшӧм нин и фрукты тайӧ миян быдмӧма? — шензьыштіс бабыс да кӧсйис нин нетшыштны, но эновтчис жӧ. Машук пӧ локтас шойччан лагерсьыс, да сэки чӧсмасьыштам.
Но, кор локтіс нывкаыд да нетшыштісны тӧршасянторсӧ, аддзисны: кодкӧ чӧсмасьӧма нин. Сёркнилӧн пытшкӧсыс тӧштшӧ, коркаыс сӧмын кольӧма.
— Ойя жӧ да... Коді нӧ тадзсӧ пакӧститчӧма!? — лапкучкысьӧмӧн маитчыштіс бабыс. А Машуклы зэв окота видлыны дивӧ кодь сёркнилысь кӧрсӧ, да дыр на гӧграліс град гӧгӧр, думсьыс корсис мӧдӧс, да сідзи и эз аддзы.
— Ӧти и убӧлитӧма быдмыны, — ропкӧдчыштіс Машук. — Сідзи и ог тӧдмалӧй, морков али сёркни кӧра быдмылӧма тайӧ дивӧыс.
Бабыс лӧньӧдыштіс:
— Та вӧсна огӧ жӧ кутӧй синва кисьтны да шогсьыны! Мӧд во бара на ньӧбам «паськӧма» кӧйдыссӧ. Мӧд во, гашкӧ, бара на быдмас татшӧм дивӧыд, да некодлы ог сетӧй удзӧдны таво моз. Мӧд во и кӧрсӧ тӧдмалам.
