СНИМАЙТЧЫСЬЯС
Зоя баб гӧбӧчас пыраліс. Бура дыр сэні пелькӧдчис, чышкис-мыськис майтӧга ваӧн гӧбӧч джаджъяссӧ буссьыс.
Петіс да восьса ӧшинь пырыс кыліс челядьлысь гӧлӧсъяс.
— Но-о, миян йӧрысь тай нӧ гӧлӧсъясыс кылӧны! Видзӧдліс да акнитіс. Гашкӧ, дасысь унджык нывка да зонка ӧшинь улас чукӧрмӧма. Кытысь нӧ та мындаыс? Некор град йӧрӧ челядьыс оз пыравны да.
Павгыштіс бабӧ юрас чышъянтор дай петіс ывлаӧ. Тані тайкӧ юрсиыс эз сувт. Веськыда кильчӧ помас кык нывка мелӧн пасъялӧмаӧсь кытшъяс да чеччалӧны кытшысь кытшӧ. Бабӧ кӧсйис лэччыны кильчӧ вывсьыс, да ӧти нывка пыр сылы и горӧдіс:
— Вӧян, бабӧ, эн сэтчӧ сувт! Нюр сэні, зыбуч! Этатчӧ кытшас чеччышт!
— Но и но... — шай-паймуніс быдсӧн бабӧ. Эз и ышты кильчӧ вывсьыс лэччыны. А бокынджык веж ласта вылын нывка куим-нёль какнюрасьӧны. На дорын сулалӧ гӧрд юра зонка. Ыджыд гӧгыль морӧс бердас топӧдӧма, ӧтторъя бибикнитӧ да лёк горшӧн равзӧ:
— Кежӧй, буди, таляла! Ме ӧд иномарка! Бип-пип! Он кылӧй али мый?
Ылынджык, кӧлуй ӧшланінын, кык нывка дӧзмӧмаӧсь мыйлакӧ ӧта-мӧд вылас. Лёк горшӧн чилзӧны да зільӧны юрсьыныс мича бантъяссӧ нетшкыны. Орччӧн, гач зептас кисӧ сюйӧма да гигзьӧ-сералӧ ыджыдкодь тушаа нин зонка, улыс грездысь Паком Иванъяслӧн Мишаыс. Нимкодясьӧ тышкасьысь нывкаяс вылӧ, а оз аддзы ичӧтджык воксӧ. Кӧмтӧм и гачтӧм, куш гӧгйыс тыдалӧ ичӧтикыдлӧн, вартӧдлӧ куш кокӧньяснас градъяс костті да радысла ӧтторъя нетшыштӧ град вывсьыс морковлысь веж петасъяс да летӧ найӧс.
— Ой-я дай ой-я! Куштас ӧд градсӧ! — маитчӧ кильчӧ вылас Зоя баб да чукӧстӧ гигзьысь Мишаӧс:
— Мишук, тэ ӧд ыджыд нин! Мыйла он видзӧд ичӧт вок бӧрсяыд?
Кватитчис зонка, ойӧстіс, уськӧдчис веськыда градъяс вомӧн ичӧт вок дорас, кватитіс моздорас да кутіс швачӧдны ичӧтикыслысь куш кокӧньяссӧ.
— Тэнӧ нӧ коді ыстіс град вылас? Вот нуа гортӧ, игнала томан сайӧ, тӧдлан сэки! — шуаліс ичӧтджык вокыслы Миша.
Мӧдыс чилзӧ, пессьӧ, мынтӧдчӧ вок кабырсьыс.
Пӧч уськӧдчис кильчӧ поскӧд увлань, мырддис ичӧтиктӧ вок кабырсьыс. Видыштіс Мишуктӧ дай пондіс вӧтлыны челядьтӧ йӧрсьыс.
— Кыш! Мунӧй ставныд татысь! Мый морла татчӧ чукӧртчинныд?! Улич вылас петӧй да ворсӧй, колӧкӧ!
Челядь аддзӧны: скӧрмис на вылӧ Зоя бабыд, кытшалісны сійӧс, кутісны дорйысьны.
— Ми ӧд снимайтчыны воим. Миянӧс Катяыд корис.
— Ме со выль джинсыаси...
— А менам выль бантик...
— А менам оборкиа платтьӧ...
Быд боксянь пондісны ошйысьны да мыччасьны дзолюкъясыд. Бабӧ сӧмын шлапйӧдліс кинас, а гӧгӧрвоны нинӧм оз вермы. Бӧрти нин Миша дорӧ шыасис: тэ, Микайлӧ, медыджыд, висьтав тӧлкӧн, мыйла чукӧртчинныд?
— Да корис Катяыд тіян... Экзамен кӧ пӧ сдайта «пять» вылӧ, ставнытӧ фотографируйта...
— Катя корис? Да сійӧ жӧ экзамен вылӧ муніс, кор на локтас... Лун шӧр бӧрын, гашкӧ! А ті... Асывсяньыс чукӧртчӧмыдӧсь! Грекӧ вӧйтысьяс... Ок, Катя, волас меным!.. Ноко, вай ставныд кайӧй кильчӧ вылас! Пуксьӧй мичаа да пукалӧй, воинныд кӧ... Лякӧсьтӧмныд нин мича платтьӧястӧ... Снимайтчысьяс...
Скӧралыштіс, броткӧдчыштіс Зоя баб челядь да аслас нучка вылӧ, а сэсся пыраліс керкаас да петкӧдіс тазйын ва. Мыссьӧдыштіс Мишуклысь ичӧтик воксӧ. Лӧсьӧдыштіс нывкаяслӧн юръясысь бантикъяссӧ, ва ветьӧкторйӧн чышкалыштіс зонкаяслысь гачьяссӧ, а сэсся пуксис кильчӧ лабичӧ да шуис:
— Воас, гашкӧ, регыд Катяыд. Эн на разӧдчӧй. Мойдышта ме тіянлы мыйкӧ...
