МАЛАННЯ ИВАНОВНА
Сизим арӧс тыран лунас Катенькалы пӧдругаясыс козьналісны пушыдик, лым еджыд каньпиӧс. Гӧгрӧс ныр-вомас каньпилӧн ичӧтик нырыс муртса и тӧдчыштӧ, но синъясыс — кык югыд рӧмпӧштан — сідзи и дзирдалӧны.
Катялы ёна и любӧ лои татшӧм козинсьыд. Сьыліас гӧрд бантик кӧрталіс мусукыслы да кисьыс эз и лэдзлы. Водігас дась вӧлі и вольпасяс босьтны.
Быдмис Катенькалӧн быдтасыс да нӧшта на пушыд лои, но сэтшӧм нин лӧнь да ньӧжмыд вӧраса. Он кывлы сылысь нявӧстӧм, ни котӧртӧм он аддзыв. Абу кӧ Катенька киын, то куйлӧ аслас радейтанаинас, кухня пызандорса ӧшинь вылын, да мый вермӧ мыссьӧ, нюлӧ асьсӧ.
— Чистюля тэ менам, чистюля! — нимкодьпырысь горӧдліс Катя. А мамыс Катялӧн ярскӧбакодь и кайтыштліс:
— Небыд Малань тайӧ, Малання Ивановна! Баруня-сударыня дворянка! Кымын каньпи быдтылі да татшӧмтӧ эг на аддзыв! Медым со тадзи зобвидзӧ-куйлӧ каньпи! Котраласны и вильшасясны, пӧтӧлӧкӧдз чеччыштласны да стенсьыд став шпалерсӧ чашъясны! А тайӧ... татшӧм ньӧжмыдыд ӧдвакӧ коркӧ шыртӧ кутлас.
Мамыс шуасьӧм дорӧ и батьыс Катенькалӧн шыасис:
— А сюсь вежӧра, брат, тайӧ пушыд ёкмыльыс! Казялас кӧ Катенькалысь пызан сайӧ пуксьӧм, пыр и пондас ӧшинь вывсяньыс лапасӧ нюжйӧдлыны. Корӧ, мед нурйӧдыштасны!
Катенька дӧзмӧ мам-бать шуасьӧм вылас да пыр и вомалас батьсӧ:
— Эн сералӧй менам мусук вылас. Абу сійӧ дыш Малання-баруня. Муса Пушок тайӧ менам! Дзик пыр ме пукся, Пушокӧ, пызан сайӧ сёйны, чӧсмӧдышта тэнӧ нӧкъя рыськӧн.
Но Пушок нӧкъя рысьтӧ исыштӧ сӧмын. Катенька татчӧ скӧрмӧ да тойыштӧ быдтассӧ джоджӧ.
— Чайті: сёян да кургыны-мойдны кутан. А тэ... Ог сэсся тэнӧ любит.
Но дыр скӧравны нывка оз вермы, босьтӧ мусуксӧ киас, шуӧ:
— Час, зонпосникӧд вадорӧ вуграсьны лэччыла, вая тэныд арпиянӧс.
И гӧгӧрвоӧ ӧд Пушокыс, мудерпозйыд, пыр и кургыны заводитас да нювны Катенькалысь пельсӧ. Татшӧм вылад ӧмӧй дыр скӧравны верман? Окалас да окалас Катенька быдтассӧ.
А ӧтчыд скӧрмыліс жӧ Катенька каньпиыс вылӧ да весиг вачӧдіс.
А артмис со тадзи.
Мамыскӧд Нюкус логӧ сэтӧр вотны ветлісны. Воисны мудзӧсь, тшыгӧсь. Катенька пыр и пондіс пызан дорас бергавны, мыйкӧ да мыйкӧ сюйыштӧ вомас. А Пушокыс эз лок ӧшинь вылас, дай некӧн оз тыдав.
— Маланняыд, баруняыд, торъя чуксалӧм тай нӧ виччысьӧ талун. Кӧні сійӧ? — шыасис мамыс.
Катенька уськӧдчис мусуксӧ корсьны-чуксавны. Керкасьыс и кильчӧ помсьыс видзӧдаліс-чуксаліс — некӧн оз кыв ни оз тыдав.
— Ой, мамӧ, вӧтчис кӧ миян бӧрся Нюкус логад да вошис сэтчӧ! — повзис нывка да дась нин и уськӧдчыны ӧдзӧс мӧдарас, котӧртны Нюкус логӧ. Но мамыс ӧлӧдіс, нӧрӧвитлы пӧ, гашкӧ, ачыс локтас. Каньясыд ӧд найӧ оз вошны, нырисныс налӧн бур. Петав град йӧрад да лук турун пырт, окрошка вӧчам да лючки-бура пажнайтам.
Катенька — нывкаыс кывзысьысь. Петіс лук турунла да амбар дорті мунігӧн аддзис каньсӧ. Нюжгысьӧма муас, куйлӧ, оз вӧрзьы.
Чилӧстіс тай лёкгоршӧн нывка да скач бӧр гортас.
— Кулӧма! Мамӧ-ӧ! Кулӧма-а! — горзӧ.
Горзӧм шыас мамыс пыр и петіс нывкаыслы паныд:
— Мый нӧ нин лоис?
— Кулӧма-а! Пласьтвидзӧ...
Эня-нылалӧн пласьтвидзысь кань дорын пойгигас суседыс, Ёгор дядь, шыасис потшӧс сайсяньыс:
— Мыйкӧ тай нӧ эня-ныла зэв ойзанныд? Мый лоис?
— Каньӧй со... Ловтӧм пласьтвидзӧ... Сэтӧр вотны ветлім... Мунігӧн лючки вӧлі, — норпырысь висьталіс Катя.
— Ку-лӧ-ма? Неважӧн на миян канькӧд мыйкӧ абу юкӧмаӧсь, авзісны... Ме асланымлысь чуксалі, да торъялісны-а...
Ёгор дядь вуджис потшӧс вомӧныс да тшӧтш сибӧдчис эня-ныла дорӧ. Здук видзӧдіс пласьтвидзысь пемӧс вылӧ да сэсся колошиа кокнас вӧрзьӧдыштіс каньӧс. Каньыд сы дорӧ инмӧдчыштлӧмысь восьтыштліс син пӧвсӧ, дӧзмӧмпырысь нявӧстіс да мӧдар бок вылас бергӧдчӧмӧн бӧр пласьтмуніс.
— Ловъя-а! — ымӧстіс нывка. Тшӧтш и мамыслӧн шензяна горӧдӧм артмис. А Ёгор дядь лӧсьыдика шпыньмуніс:
— Мый нӧ нин сідз: абу ловъя? Кайпуйтӧ баруняныд! Коддзӧма и кольмӧма, райын лэбалӧ. А ті... Кулӧма-а! Нем абусьыс оз кув!
Мамыс лапкерис кияснас:
— Господи! Мыйысь коддзис-кольмис?
Ёгор дядь довкйӧдлыштіс юрнас, шеновтіс кияснас град йӧрланьыс:
— Со тай... ладан турунтӧ град вылад быдтан-вӧдитан да... Каньяс сійӧ быдмӧгсӧ уй ёна уважайтӧны!..
Дядьыдлысь водзӧ сёрнисӧ эз и кут кывзыны Катенькалӧн мамыс, уськӧдчис амбар дорас да сысянь нин гӧлӧссӧ сетіс:
— Сідзи и эм... То нӧ тай... Асывнас кымынкӧ вуж нетшыштлі, амбар бокӧ коли, мед, мися, тӧлалыштас... Аддзӧма небось...
Мамыс мыйкӧ дыр на ас кежас шуаліс, сэсся Ёгор дядькӧд варовитыштіс, сералыштісны ӧтвылысь. А Катя кань весьтас копыртчӧмӧн сёрнитіс сыкӧд, чуньсӧ петкӧдлӧмӧн чиршӧдліс да и бокас на чорыдакодь шлопнитіс.
— Нӧшта кӧ ӧтчыд коддзан, ог кут радейтны. Этадзи менӧ повзьӧдін да...
