М-МЕ...

Коркӧ миянлысь ыжнымӧс машина таляліс. Сылӧн колис ичӧтик баля.

— Кытчӧ тайӧ сирӧтинкасӧ? — бальӧпиӧс меліаліг шуӧ мам.

— Кытчӧ? Ме дінӧ! — пырысь-пыр суитчис Нина. — Мед мекӧд олас. Ме аслам юрлӧс вылӧ сійӧс узьны понда водтӧдлыны, а вердны — блюдйысь.

— Тэкӧд оз позь, — ышловзьӧмӧн шуӧ мамӧ. — Живӧтина да морт оз узьлыны ӧтлаын.

— Ӧткодь! Мед мекӧд! Ме крӧвать улӧ сылы вольсала. Но, мамӧ? Шу: «Но».

Веніс ӧд Нинтурыд мамӧӧс. Колисны гортӧ бальӧпитӧ...

Ӧні эськӧ абу нин бальӧпи, а зэв ыджыд меж. Сюръясыс! Гартӧм кӧлач кодьӧсь, крукыляӧсь. Посни челядь полӧны сыысь зэв ёна. А Нина нарошнӧ пыр сьӧрсьыс новлӧдлӧ сійӧс. Сетас межыдлы нянь кусӧк да чукӧстас ас бӧрсьыс. Межыд лунтыр сы бӧрся жботъялас-ветлӧдлас. Сідз велаліс Нина дінӧ, воськов сыысь оз кольччы.

Ӧтчыд Нинтур кино вылӧ мунас. Межыд сы бӧрся. Нина видзӧдӧ кино, а Васька меж кильчӧ помас, виччысьӧ кӧзяйкасӧ. Гашкӧ, мудзис виччысьнысӧ, а, гашкӧ, окота лоис тшӧтш кинотӧ видзӧдны. Кайӧма кильчӧ вылас да бӧрыньтчӧмӧн трак клуб ӧдзӧсад сюръяснас.

Петас клубсьыд билет прӧверитысьыд, сэтшӧм скӧр тьӧтка, некор кино вылад эз лэдзлы ми вок билеттӧмтӧ, — чайтӧ, кодкӧ вӧзйысьӧ, да зэв скӧра юалас:

— Коді сэні сёрмӧма?

— М-ме! — зэв гораа вочавидзӧ сылы межыд.

— Тьпу! — сьӧласигтыр ӧдзӧстӧ бӧр клопкас-пӧдлалас тьӧткаыд. Вот серамыд билеттӧм зонпоснилӧн вӧлі. А Нинтурӧс миянлысь ошкыштісны сэтшӧм тӧлка межтӧ быдтӧмысь!