КРӦШКИА ЙӦВ

Мыйла Ниналы дум вылас усьӧма оз вотӧмыс?

— Кайлам, — шуӧ мем, — оз вотны. Сьӧрд пашняын пӧ сы мында озйыд!

— Да ӧд водз на, сӧмын на дзоридзалӧ, — кӧсйи ме ӧлӧдны сійӧс.

— Дзоридзалӧ кӧ, эм нин! Ӧтияс дзоридзалӧны, мӧдъяс кисьмӧны. Ме ӧд тӧда, — дольӧ ассьыс Нинтур.

— Но, окотатӧ кӧ тешитны кӧсъян, кайлам! Меным мый. Чипсанъяс да каляяс кӧть вӧчала! — думайта ме ас кежам.

Кайим пашня вылӧ. А озйыд... ӧткымын галя тай паныдасьліс жӧ.

— Оз нинӧм сюрав! Лэччам бӧр, — шуа Нинтурлы.

— Мем тай сюралӧ-а! Певпом кодьӧсь! — ошйысьӧ сійӧ да, менӧ дэльӧдӧм вӧсна ли, мый ли, равзӧ: — Аминь, аминь! Мыйта! Гортӧ локтам да озъя нӧк сёям!

— Но, — горза тшӧтш ме сылы. — Озъя нӧксьыд нӧ коді ӧткажитчас?

Вель дыр ветлӧдлім пашня пӧлӧныс. Оз корсим. Мудзим. Рытгорулыс воим гортӧ. Кильчӧ пос кайигӧн Нинтур шуӧ:

— Пырам да крӧшкиа йӧв сёям!

— Крӧшкиа йӧв? Тэ жӧ кӧсйин озъя нӧкйӧн вердны!

— Крӧшкиа йӧлыс меным кажитчӧджык, — вочавидзис Нина.

Кажитчӧджык пӧ! Ок и мудер!