КӦЧ ГӦСНЕЧ

Бать миян кайліс таво тӧвнас кыйсьыны. Локтіс рытнас, пуктіс нопсӧ кӧтшас лабичӧ, шуӧ:

— Ок, Нинук, мудзи сэтшӧма! Вай отсышт меным кӧмӧс пӧрччыны.

Нинтур видзӧдіс-видзӧдіс батьлы кок вылас да шуӧ:

— Ме киӧс пыр кежлӧ нин мыськи.

— Но, — шуӧ бать, — кӧч гӧснеч вайи, сета, мися, сылы, коді менӧ медъёна радейтӧ. А, вӧлӧмкӧ, менӧ некод оз и радейт.

— Ой, радейта, батьӧ, радейта ме тэнӧ, вай окышта!

— Тэ кӧмсӧ пӧрччыны первой отсав, а сэсся вӧлисти окасьны кутам, — нюммуніс батьӧ.

Нинтур чунь йывнас кутчысис батьлы сапӧгас да, быттьӧ мый вынсьыс кыскӧ, пиньяссӧ векыштіс.

— Вот и бур, нылӧй, — ошкыштіс сійӧс бать. — Отсасин кӧ, и кӧч гӧснеч сета! — Перйис нопсьыс кын нянь шӧрӧмтор.

Нина кватитіс кӧч гӧснечтӧ да, паччӧр пос вылӧ пуксьӧмӧн, сэтшӧм азыма сёйис. Менам дульваӧй тшӧтш петіс.

Бать видзӧдіс сы вылӧ, шпынняліс, сэсся меліа юаліс:

— Кажитчис кӧч гӧснечыд, ныланӧй?

— Кажитчис, — вашмуніс Нина, сэсся недыр чӧв олӧм бӧрын содтіс: — А мӧдысь кайны кутан вӧрад да, батьӧ, босьт сьӧрсьыд мороженӧй. Оз ӧд сыв. Мед меным кӧчыд гӧснеч пыдди мороженӧйсӧ мӧдӧдас.