ИЧӦТИК ВАСЬӦ

Васьӧлӧн батьыс висьмӧма, больничаӧ водтӧдӧмаӧсь. Вӧскресенньӧӧ мамыс кутіс нуӧдны писӧ, Васюк пӧ, талун садикад он мун, вай жӧ мекӧд ветлам батьыд дорӧ больничаас. Гажтӧмтчис, пӧди, ёна.

Больничнӧй городокӧ мунысь автобус виччысигмоз Васьӧ мамыскӧд пукалісны автобус сувтанінас да видзӧдісны, кыдзи локтӧны-мунӧны машинаяс, кыдзи чеччӧны-пырӧны йӧзыс.

Со «Орбиталань» мунысь автобусӧ тырыс шӧтісны йӧз, автобусыс вӧрзьыны нин кутліс. Но кысянькӧ машина мышсянь тэрмасьӧмӧн локтіс куш юра дядьӧ понйыскӧд. Понмыслӧн исасигкості кӧзяиныс удитіс тюркнитны-пырны автобусад, а понйыд коли. Автобус ӧдзӧс пӧдласис. Понйыд кватитчис, а кӧзяиныс некӧн абу. Гӧгӧрвоис: автобусад мунӧ. Никӧстіс сэки понйыд да уськӧдчис бӧрсьыс. Ӧдйӧ котӧртіс, да вӧтӧдан ӧмӧй машинатӧ.

Пон бӧр бергӧдчис автобус сувтанінад, кашкӧ, кывсӧ нюжӧдӧма, никӧстыштлӧ. Водіс муас, пуктіс лапа вылас юрсӧ, куйлӧ.

Регыд и Васюклӧн автобусыс локтіс. Пуксисны, ӧдйӧ и тӧвзьӧдіс найӧс автобусыд больничнӧйӧдзыд.

— Тані и папӧ менам? Тані и папӧным? — тёльӧдчис детинка мамыскӧд. А кор батьыс дорын сывъясьӧм да окасьӧм бӧрын батьыс юаліс, кыдзи пӧ, пиук, олан-вылан метӧг да мамтӧ кывзысян он, Васюк друг бӧрддзис.

— Ме мый... Ме ола, кывзыся... А вот понйыс... Аддзылі ӧд, кыдзи лапанас синвасӧ чышкаліс.

Батьыс шай-паймуніс, но мамыс аддзис, мый шунысӧ:

— Питорным миян зэв шань зонка, — шылькнитіс зонкалысь юрсӧ мамыс. — Зэв бур сьӧлӧма и. Понсӧ жалитыштіс и. Кӧзяиныс ӧд оз сійӧс эновт, локтас сы дорӧ. Эн шогсьы...

Батьыслӧн вомыс вашмуніс да тшӧтш малыштіс Васюклысь юрсӧ.