ЗЭВ СЮСЬ КАТЯ

Анна баблӧн бабӧн шуысьыс кыкӧн — Петя да Катя.

Бабӧ ветліс лавкаӧ, кампет ньӧбӧма. Локтіс да кутіс гӧститӧдны чоя-вокаӧс. Ичӧтика пӧ ньӧбышті да вай жӧ, донаяс, юкамӧй куим пельӧ, мед тіянлы и меным ӧтмында лоӧ.

Медводз сетіс Катялы куим кампет, сэсся Петялы сымда жӧ. Мукӧдсӧ колис аслыс.

Катя — нывкаыд сюсь. Лыддис ассьыс — куим. Лыддис вокыслысь — сымда жӧ. Видзӧдліс бабыслы кулёкас, юрсӧ дзӧрӧдыштіс, шуис:

— Аслыд, бабӧ, медуна кольӧмыд. Сет ӧтиӧс Кыстурнымлы, мед куимнаннымлӧн ӧтмында лоӧ.

Бабыс нюмдіс. Торйӧдіс ӧти кампет аслас кулёкысь, пуктіс сакарнича дозъяс да шуис:

— Кыстурыд оз радейт кампетсӧ. Сета, инӧ, тэныд, зэв сюся артасян да. Бӧрти рытнас кампета чай юан.

Катя радлыштіс. А Петя дузгысис. Пыр пӧ Катькалы медуна вичмӧ. Катькаыс гораа серӧктіс:

— Йӧй тэ, Петюк, ме ӧд кӧсйи, мед ставнымлы ӧтмында вӧлі. Позьӧ ӧти кампетсӧ юкны куим пельӧ.

— Сідз, инӧ, и вӧчам, — ышловзьыштіс бабыс.