ГӦРД МАКЪЯС

Талун Нинтур лунтыр на грездӧ эз мыччысьлы. Град йӧрын мыйкӧ ноксьӧ. Весиг кывсӧ нюжӧдӧма, сэтшӧма зільӧ! Киас бедьтор босьтӧма да гудралӧ-небзьӧдӧ мусӧ град вылысь.

Мыйла, мися, сійӧ сэтшӧма зільӧ — окота мем лои тӧдны. Каттьыси забор вомӧн Нинтур дорӧ, юала:

— Мый нӧ керан?

— Дзоридз кӧйдыс кӧдза, — вочавидзӧ сійӧ, а ме вылӧ оз видзӧдлы, уджалӧ.

— Фу! Дзоридз кӧйдыс. Ме чайті, нидзув корсян... бара чери кыйны...

— Нидзув? Мый ме нидзувнас кера? Таво школаӧ нин муна. Колӧ дзоридзьяс быдтыны, учительницалы нуны.

— Колӧ тай! — ышнясьӧмпырысь шуа ме. — Менӧ тай дзоридзтӧгыс примитісны школаад.

— Мед! — скӧралӧ ме вылӧ Нина да тшӧктӧ: — Мун вала ветлы, киськалыштам.

— Пыр командуйтӧ! Он удит сы дорӧ матыстчыны — бара нин мыйкӧ тшӧктӧ вӧчны! — скӧрми Нинтур вылӧ, сапӧг нырӧн гудыр-гадыркери сылысь чередитӧм градсӧ да пышйи.

Ме сы йылысь регыд вунӧді, а сэсся коркӧ бӧрынджык нин ми мачӧн ворсім, да мачыд лэбис миян град йӧрӧ. Ме котӧрті мач бӧрсяыд. Ок и шензьышті жӧ, кор аддзи Нина град вылысь мича дзоридзьяс. Медся нин меным кажитчисны гӧрдъяс. Вӧсни кузь кокаӧсь, а йылас мича-мича гӧрд дзоридзьяс.

Вунӧді, мый мачла пыри, да понді нимкодясьны мича дзоридзьяснад.

Друг тай видзӧда: тӧвныр моз лэбӧ град йӧрӧ Нина.

«Но, сюри гым-чард улад», — думышті ме да лӧсьӧдча нин вӧлі уйкнитны забор вомӧн.

А Нина шыасьӧ ме дінӧ, да абу и скӧр.

— Мичаӧсь ӧд? Макъяс! — шуӧ сійӧ да содтӧ: — Ме тэныд тшӧтш сета, кор кутан школаад мунны. Абу жаль. Ме эг сӧмын ӧтнамлы быдты.

Кутшӧм бур вӧлӧма Нинтурным!