ВУГЫРА НИНА

Тіян эмӧсь ичӧтджык чойяс? Эмӧсь кӧ, ог тіянлы завидьты: кӧнкӧ, миян Нинтур кодьӧсь жӧ. Нинтурӧн ме шуа ичӧтджык чойӧс, Нинаӧс. Сійӧ миян ичӧтик, шурыдик да, ой-ой, наян! Он кӧ сы кок туйӧ тальччы, скӧрмӧдӧм кань кодь. Лэчыд пиньяссӧ да гыжъяссӧ на мукӧддырйиыс оз яндысь петкӧдлыны. Та вӧсна сійӧс пӧдругаясыс нимтӧны косясьысь Нинтурӧн. Збыль, тайӧ нимыс эськӧ сылы зэв лӧсяліс, да таво гожӧмсянь... Чӧвлӧ. Висьтала лючкиджык ставсӧ помсянь помӧдз.

Ӧтчыд ми ворсім зонпосникӧд галаӧн. Дзебси ме, ок, некод эськӧ эз аддзы! Да Нина вӧсна... Сійӧ пыр меным быдлаын торкасьӧ.

Видзӧда дзебсьӧминсяньыд — Нинтур миян! Морӧссӧ лэптӧма, дзодзӧг моз сэтшӧм тшапа дзабзьӧдӧ-мунӧ. Пельпом вылас кыскӧ вугыр шатин, киас тоньйӧдлӧ ыджыд жӧч банка, кутшӧмын тай лавкаясын юмов повидло вузалӧны.

«Сизим адгорш. Менсьым тай нӧ босьтӧма шатинсӧ! Медбӧръя вугырсӧ лотас вильышпозыд!» — скӧрми ме.

— Ни-на! — вашкӧдан гӧлӧсӧн скӧрысь чуксала ме да мый верма мыччӧдла сылы кулакӧс.

Прӧйдитӧ Нина ме дорті да зэв тешкодя петкӧдлӧ меным паськыд кывсӧ.

— Эн, мися, лысьт! Кылан тэ? Ну бӧр гортӧ вугыр шатинсӧ! — горза сылы ме.

А сійӧ:

— Дзебсин кӧ, кӧйвидз сэн амбар пельӧсас! Мый ме дорӧ сирасин? Ог пов, эн кулактӧ петкӧдлы! Юмань да дарга коркӧ вугравлас, да нӧшта и ышнясьӧ: менам шатин! Абу тэнад! Аслам! — заводитіс Нина чилзыны да ланьтны оз вермы.

Ме нин ас вылӧ абу рад, мый кӧвъяси сы дорӧ, да сёр нин!

Эк-ма! Кузь пиньыд ӧд явитіс! Аддзисны менӧ.

А Нина, виж синнас сералігтыр, видзӧдліс ме вылӧ дай ва дорлань. Дзив-дзав, дзив-дзав — дзуртӧ сылӧн киас тыртӧм жӧч банкаыс.

— Мун! — медбӧрын ме шенышті киӧн. — Видзӧдлам, уна-ӧ черитӧ ваян!

А рытъявылыс, кватитчи да, чойыд менам век на абу гортын.

«Вӧйи кӧ нин-а?» — тӧждысьӧмӧн думышті ме и котӧрӧн ва дорӧ.

Кыр йывсяньыс на аддзи: сулалӧ Нина берег дорын и вӧрзьӧдчывтӧг сюся видзӧдӧ ваас плавъялысь таб вылас. Кузь пиня кӧть, а жаль жӧ мем нывторйыд лоис: эстшӧма зільӧ. Матысми ме сы дорӧ, шуа:

— Вай ме тшӧтш! Кӧні нидзулыд? Медся госанас самавлам, ёкыш кыям!

— Кутшӧм нидзув? — скӧрысь шыасьӧ Нинтур да шалснитӧ-кыскӧ васьыс шатинсӧ.

— Ме и нидзувтӧгыс кыя, и тэнад мешайтчытӧг, вешйы сэсь! Дзик кыя! — пӧся кӧсйысьӧ вуграсьысь да метитчӧ бара шыбитны вугырсӧ ваас.

Сэсся тай лёкгоршӧн горӧдіс:

— Лэдз! Мыйла кутан!

— Ой-ёй-ёй! — эг вермы терпитны да вом тырӧн горӧді ме.

Нинаыд кыйӧма вугырас асьсӧ!

— Эсытшӧм тэд чери шедӧма!.. Но и вугыр Нина!